ଭୋଜି ହେଲା କାଳ, ନଦୀରେ ବୁଡ଼ି ଯୁବକ ମୃତ

ନାଉଗାଁ, (ଯୁଗାବ୍ଦ ନ୍ୟୁଜ):ନାଉଗାଁ ଥାନା ଗଜରାଜପୁର ପଂଚାୟତର ତୁମ୍ଭେଶ୍ବର ନିକଟସ୍ଥ ଦେବୀନଦୀ କୂଳରେ ଭୋଜି କରିବାକୁ ଯାଇ ନଦୀରେ ବୁଡ଼ି ଯୁବକର ମୃତ୍ୟୁ ହୋଇଛି। ଯୁବକ ଜଣକ ଜଗତସିଂହପୁର ଥାନା ଅଧିନ ଗଉଡ଼ୁଣୀ ପଡ଼ିଆ(ପଦ୍ମପୁରର ନାଥ ସାହି) ଗ୍ରାମର ସୁରେଶ ନାଥଙ୍କ ପୁଅ ସ୍ନେହାଶିଷ ନାଥ(୨୨) ବୋଲି ଜଣାଯାଇଛି। ବାପା ମାଆଙ୍କର ଏକମାତ୍ର ପୁଅ ସ୍ନେହାଶିଷ। ସ୍ନେହାଶିଷର ଜନ୍ମ ଜାନୁଆରୀ ୧ ତାରିଖ ତଥା ବୁଧବାର ହୋଇଥିବାରୁ ସାଙ୍ଗମାନଙ୍କ ସହିତ ମିଶି ଆଜି ତୁମ୍ଭେଶ୍ବର ଗ୍ରାମ ନିକଟସ୍ଥ ଦେବୀନଦୀ ପଠାକୁ ଭୋଜି କରିବାକୁ ଯାଇଥିଲେ। ସ୍ନେହାଶିଷ ନଦୀପଠାରେ ବୁଲୁଥିବା ବେଳେ ହଠାତ ନଦୀ ଭିତରକୁ ଖସି ପଡ଼ିଥିଲେ । ଯାହାଫଳରେ ନଦୀରେ ବୁଡ଼ି ଯାଇଥିଲେ । ନିକଟରେ ଥିବା ସାଙ୍ଗ ପିଲାମାନେ ତାକୁ ଉଦ୍ଧାର କରିବା ପାଇଁ ଡାକ ପକାଇଥିଲେ। ସ୍ଥାନୀୟ ଲୋକ ନଦୀରେ ଖୋଜା ଖୋଜି କରି ଉଦ୍ଧାର କରିବା ପରେ ନାଉଗାଁ ଅଗ୍ନିଶମ ବାହିନୀ ସାହାଯ୍ୟରେ ନାଉଗାଁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଭର୍ତ୍ତି କରିଥିଲେ। ହେଲେ ଡାକ୍ତର ତାକୁ ମୃତ ଘୋଷଣା କରିଥିଲେ।