ମଦ ଜବତ, ଦୁଇ ଗିରଫ

ଭଣ୍ଡାରିପୋଖରୀ, (ଦୁର୍ଯ୍ୟୋଧନ ଲେଙ୍କା): ଭଦ୍ରକ ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ଅବକାରୀ ଅଧିକ୍ଷକ ପ୍ରଦୀପ କୁମାର ଦାସଙ୍କ ତତ୍ୱାବଧାନରେ ଅବକାରୀ ସ୍ପେସାଲ ସ୍କ୍ୱାଡ ପକ୍ଷରୁ ଆଜି ବ୍ୟାପକ ପରିମାଣରେ ମଦ ଜବତ ହୋଇଥିବାବେଳେ ଦୁଇଜଣକୁ ଗିରଫ କରାଯାଇଛି । ମିଳିଥିବା ସୂଚନା ଅନୁଯାୟୀ ଏକ ମୋଟରସାଇକେଲ ଯୋଗେ ଆନନ୍ଦପୁର ଅଞ୍ଚଳର ମହା ହୋ ଓ ଭଣ୍ଡାରିପୋଖରୀ ଅଞ୍ଚଳର ଅଶୋକ ସାହୁ ବ୍ୟାପକ ପରିମାଣରେ ମଦନେଇ ଆସୁଥିଲେ । ପୂର୍ବ ସୂଚନା ପାଇ ସ୍ପେସାଲ ସ୍କ୍ୱାଡର ଏକ ଟିମ ବେଆଇନ ପରିବହନ କରୁଥିବା ଦୁଇ ବ୍ୟକ୍ତିଙ୍କୁ ଆଜି ସକାଳ ପ୍ରାୟ ୯ଟାବେଳେ କେନ୍ଦୁଆପଦା ଷ୍ଟେସନ ବଜାରରୁ ସେମାନଙ୍କୁ ଗିରଫ କରିଥିଲା । ଏହା ସହିତ ୧୦ଲିଟର ଦେଶୀ ମଦ ଓ ମୋଟରସାଇକେଲକୁ ମଧ୍ୟ ଅବକାରୀ ବିଭାଗ ଜବତ କରିଥିବା ଜଣାପଡିଛି । ଏନେଇ ଓଡିଶା ଅବକାରୀ ଆଇନ ଅନୁଯାୟୀ ୯୫/୨୧ରେ ମାମଲା ରୁଜ୍ଜୁ କରାଯାଇଥିବାବେଳେ ଦୁଇ ଅଭିଯୁକ୍ତକୁ ଆଜି କୋର୍ଟ ଚାଲାଣ କରାଯାଇଛି । ବିଭାଗ ପକ୍ଷରୁ ଇନସ୍ପେକ୍ଟର ସ୍ୱାତୀ ପଟ୍ଟନାୟକ, ସବଇନସ୍ପେକ୍ଟର ବ୍ରଜମୋହନ ମଲ୍ଲିକ, ଏଏସଆଇ ଭବେଶ ଦାସ, କନେଷ୍ଟବଳ ଖଗେଶ୍ୱର ଜେନା, ଅନାବିଦିତ୍ୟ ବାରିକ, ଯେମାମଣି ଜାମୁଦା ପ୍ରମୁଖ ସାମିଲ ହୋଇଥିଲେ ।