ମହିଳାଙ୍କ ନାମରେ ପଞ୍ଜିକୃତ ହେବ ଗ୍ରାମୀଣ ଆବାସ ଯୋଜନାର ଗୃହ
କୁରୁକ୍ଷେତ୍ର: ଗ୍ରାମୀଣ ଆବାସ ଯୋଜନାରେ ସମସ୍ତ ଗୃହ ମହିଳାଙ୍କ ନାମରେ ପଞ୍ଜିକୃତ ହେବ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି। କୁରୁକ୍ଷେତ୍ରଠାରେ ସ୍ୱଚ୍ଛ ଶକ୍ତି ସମାବେଶକୁ ସମ୍ବୋଧିତ କରିବା ଅବସରରେ ମୋଦୀ କହିଛନ୍ତି ଯେ ଲାଲ କିଲ୍ଲାରୁ ସ୍ୱଚ୍ଛ ଭାରତ ଅଭିଯାନ ସମ୍ପର୍କରେ ଘୋଷଣା ବେଳେ ଅନେକେ ଏହାକୁ ଗୁରୁତ୍ୱ ଦେଇନଥିଲେ। କିନ୍ତୁ ମହିଳାଙ୍କ ସମ୍ମାନ ଓ ମର୍ଯ୍ୟାଦା ରକ୍ଷା ପାଇଁ ଉଦ୍ଦିଷ୍ଟ ସ୍ୱଚ୍ଛ ଭାରତ ଅଭିଯାନ ତାର ଲକ୍ଷ୍ୟ ପୂରଣ କରିବାକୁ ଯାଉଛି। ଆଉ କିଛି ଦିନ ପରେ ସୁନ୍ଦର ଶୌଚାଳୟ ପାଇଁ ବିଦେଶୀମାନେ ଭାରତ ପ୍ରତି ଆକୃଷ୍ଟ ହେବେ। ଏହାପରେ ପ୍ରଧାନମନ୍ତ୍ରୀ ଗ୍ରାମୀଣ ଆବାସ ଯୋଜନା ଅଧୀନରେ ନିର୍ମାଣ ହେବାକୁ ଥିବା ସମସ୍ତ ଗୃହ ମହିଳାଙ୍କ ନାମରେ ହିଁ ପଞ୍ଜିକୃତ ହେବ। ମହିଳା ସଶକ୍ତିକରଣ ଦିଗରେ ଏହା ଆଉ ଏକ ବଳିଷ୍ଠ ପଦକ୍ଷେପ ରୂପେ ସାବ୍ୟସ୍ତ ହେବ। ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭାଦ୍ସାଠାରେ ପ୍ରତିଷ୍ଠିତ ଜାତୀୟ କ୍ୟାନ୍ସର ଅନୁଷ୍ଠାନକୁ ଜାତି ଉଦ୍ଦେଶ୍ୟରେ ଉତ୍ସର୍ଗ କରିବା ସହିତ କୁରୁକ୍ଷେତ୍ରରେ ଶ୍ରୀକ୍ରିଷ୍ଣା ଆୟୁଷ ବିଶ୍ୱବିଦ୍ୟାଳୟ, ପଞ୍ଚକୁଳଠାରେ ଜାତୀୟ ଆୟୁର୍ବେଦ ବିଶ୍ୱବିଦ୍ୟାଳୟର ଶିଳାନ୍ୟାସ କରିଥିଲେ। କଂଗ୍ରେସର ନାମ ନ ନେଇ ପ୍ରଧାନମନ୍ତ୍ରୀ କହିଲେ ୧୯୪୭ରୁ ହିଁ ଭାରତର ଇତିହାସ ଲେଖାଯାଇଛି ବୋଲି କିଛି ଲୋକ ଭାବୁଛନ୍ତି। ଇତିହାସରେ କେବଳ ସେମାନଙ୍କ ନାମ ହିଁ ରହିଛି। କିନ୍ତୁ ଏବେ ନୂଆ ଇତିହାସ ଲେଖିବାରୁ ସମୟ ଆସିଛି।
