ମହିଳା ବସ କଣ୍ଡକ୍ଟରଙ୍କୁ ବଳାତ୍କାର

କେନ୍ଦ୍ରାପଡ଼ା, (ଚିତ୍ତରଞ୍ଜନ ଦାସ):କେନ୍ଦ୍ରାପଡା ଜିଲ୍ଲାର ମହାକାଳପଡ଼ା ଥାନା ଅନ୍ତର୍ଗତ ମହାକାଳପଡ଼ା ବସଷ୍ଟାଣ୍ଡ ପରିସରରେ ଜଣେ ମହିଳା ବସ କଣ୍ଡକ୍ଟରଙ୍କୁ ବଳାତ୍କାର କରାଯାଇଛି । ଏ ନେଇ ମହିଳା ଜଣକ ଥାନାରେ ଅଭିଯୋଗ କରିଛନ୍ତି । ଅଭିଯୋଗ ହେବା ପରେ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଏଥିସହ ମହିଳାଙ୍କ ଡାକ୍ତରୀମାଇନା କରାଯିବା ପାଇଁ ତାଙ୍କୁ ଡାକ୍ତରଖାନା ପଠାଯାଇଛି । ଏଥିସହିତ ଅଭିଯୁକ୍ତ ଦିବ୍ୟଜ୍ୟୋତି ନାୟକଙ୍କୁ ମଧ୍ୟ ପୋଲିସ ଗିରଫ କରିଛି । ପୋଲିସର ସୂଚନା ଅନୁଯାୟୀ ମହିଳା ଜଣକ ପୂର୍ବରୁ ବିବାହିତ ଥିଲେ । ହେଲେ ଏବେ ସେ ସ୍ୱାମୀ ପରିତ୍ୟକ୍ତା । ତାଙ୍କୁ ବଳାତ୍କାର କରିଥିବା ଯୁବକ ଜଣକ ସେହି ବସଷ୍ଟାଣ୍ଡରେ ସୁପରଭାଇଜର ଭାବେ କାର୍ଯ୍ୟ କରୁଥିଲେ । ଅଭିଯୁକ୍ତ ଦିବ୍ୟଜ୍ୟୋତିର ଘର କୁଦାନଗରୀ ଥାନା ଅନ୍ତର୍ଗତ ବଙ୍ଗାଳପୁର ଗ୍ରାମରେ । ଅଭିଯୁକ୍ତ ଜଣକ ଲକ୍ଷ୍ମୀ ବସର ସୁପରଭାଇଜର ଥିବାରୁ ମହିଳାଙ୍କ ସହ ସମ୍ପର୍କ ବଢିଥିଲା । ମହିଳାଙ୍କୁ ବିବାହ କରିବା ପାଇଁ କହି ବଳାତ୍କାର କରିଥିଲେ । ଥାନାଧିକାରୀ ଧୀରଜ ଲେଙ୍କା କହିଛନ୍ତି ମହିଳାଙ୍କ ଇଚ୍ଛା ବିରୋଧରେ ଅଭିଯୁକ୍ତ ଦିବ୍ୟଜ୍ୟୋତି ତାଙ୍କୁ ବଳାତ୍କାର କରିଥିଲେ । ଏ ନେଇ ମହିଳା ଜଣକ ଅଭିଯୋଗ କରିବା ପରେ ଏକ ମାମଲା ରୁଜୁ କରାଯାଇ ଘଟଣାର ତଦନ୍ତ କରାଯାଇଥିଲା । ଅଭିଯୁକ୍ତଙ୍କୁ ଥାନାକୁ ଆଣି ପଚରା ଉଚରା କରିବା ପରେ ସେ ଘଟଣା ସମ୍ପର୍କରେ ସ୍ୱୀକାର କରିଥିଲେ । ବସଷ୍ଟାଣ୍ଡ ପରିସରରେ ଏକ ଘରେ ଅଭିଯୁକ୍ତ ଜଣଙ୍କ ମହିଳାଙ୍କୁ ବଳାତ୍କାର କରିଥିବା ସ୍ୱୀକାର କରିଛି । ଫଳରେ ମହିଳାଙ୍କ ଡାକ୍ତର ମାଇନା କରାଯିବା ସହ ଅଭିଯୁକ୍ତକୁ ଗିରଫ କରାଯାଇଛି ବୋଲି ଥାନାଧିକାରୀ କହିଛନ୍ତି ।