ମା’ ଭଗବତୀଙ୍କ ପୀଠରେ କିନ୍ନର ପାଳିଲେ ସାବିତ୍ରୀ ବ୍ରତ

ନିମାପଡା, (ସନ୍ତୋଷ ଦାଶ):ପୁରୀ ଜିଲ୍ଲା କୋଣାର୍କ କିନ୍ନର ସଙ୍ଘ ପକ୍ଷରୁ କୋଣାର୍କର ଅଧିଷ୍ଠାତ୍ରୀ ଦେବୀ ମା’ ଭଗବତୀଙ୍କ ପୀଠରେ ସାବିତ୍ରୀ ବ୍ରତ ପାଳନ କରାଯାଇଛି । କିନ୍ନର ମାନେ ନିଜ ଗୁରୁଙ୍କ ଆୟୁଷ ବୃଦ୍ଧି ଓ ନିରୋଗ କାମନା କରି ମା’ଙ୍କ ନିକଟରେ ପୂଜାର୍ଚନା କରିବା ସହ ବ୍ରତ ଧାରଣ କରିଥିଲେ । କୋଣାର୍କ କିନ୍ନର ସଙ୍ଘ ପକ୍ଷରୁ ସାବିତ୍ରୀବ୍ରତକୁ ଭକ୍ତିମୟ ପରିବେଶ ମଧ୍ୟରେ ପାଳନ କରାଯାଇଥିଲା । ହିନ୍ଦୁ ଧର୍ମରେ ସଧବା ମହିଳା ମାନେ ନିଜ ସ୍ୱାମୀଙ୍କ ଦୀର୍ଘଜୀବନ କାମନା ପାଇଁ ସାବିତ୍ରୀ ବ୍ରତ ପାଳନ କରିଥାନ୍ତି | ସେହିପରି କିନ୍ନର ମାନେ ନିଜ ଗୁରୁଙ୍କ ଦୀର୍ଘଜୀବନ କାମନା କରି ଏହି ପର୍ବକୁ ପାଳନ କରିଥାନ୍ତି । ସଧବା ସ୍ତ୍ରୀ ପରି କିନ୍ନର ମାନେ ଫଳମୁଳ ସହିତ ସିନ୍ଦୁର, ଚୁଡ଼ି ଓ ବ୍ରତ ନେଇ ମା’ଙ୍କ ପାଖରେ ସମର୍ପଣ କରିବାପର ପରିଧାନ କରି ଉପବାସ ବ୍ରତ ପାଳନ କରିଥାନ୍ତି | ଗୁରୁଙ୍କ ମଙ୍ଗଳ କାମନା କରିବା ସହ ନିଜେ ପାଇଥିବା ଜନ୍ମରୁ ମୁକ୍ତି ପାଇବାପାଇଁ ଗୁହାରୀ ମଧ୍ୟ କରିଥାନ୍ତି | ସାବିତ୍ରୀବ୍ରତ ଅବସରରେ କୋଣାର୍କ କିନ୍ନର ସଙ୍ଘର ମୁଖ୍ୟ ଦୀପା କିନ୍ନରଙ୍କ ନେତୃତ୍ୱରେ ପାୟଲ, ଶ୍ରଦ୍ଧା, ଶାନ୍ତି, ସୁକାନ୍ତି , ମୁସ୍କାନ, ସନ୍ଧ୍ୟା, ପ୍ରଶାନ୍ତି, ଗାୟତ୍ରୀ, ରଶ୍ମୀ, ଜୁଲି , ରୁବି ଓ ଶିବାନୀ କିନ୍ନର ମାନେ ମା’ଙ୍କ ମନ୍ଦିରରେ ପୂଜାର୍ଚନା କରିବା ସହ ବ୍ରତ ପାଳନ କରିଥିଲେ |