ମୋ ବିଚାରକ

କାହାକୁ ନ କହି
ତୁମକୁ କହୁଛି
ଭାବି ଅତି ଆପଣାର,
ତୁମ୍ଭେ ମହାବାହୁ
କା ଆଗେ ନ କହି
କ୍ଷମାକର ଦଣ୍ଡିପାର ।

ଯାହା ଦଣ୍ଡଦେବ
ସବୁ ମୁଁ ସହିବି
କହିବ ନାହିଁ କାହାକୁ,
କହିଲେ କହିବେ
ଯିଏ ଯେତେ କଥା
ଦୋଷଦେବି ମୁଁ ଛାମୁକୁ ।

ତୁମ ଦଣ୍ଡ ଠାରୁ
ତାଙ୍କ କଥାମାନ
ବଞ୍ଚି ଥାଉ ଥାଉ ମାରେ,
ତୁମ୍ଭେ ଦଣ୍ଡଦେଲେ
ଥରେ ସିନା ମରେ
ତାଙ୍କ କଥା ଶତ ବାରେ ।

ଦଣ୍ଡ ବା ନ ଦେଇ
ଯଦି କ୍ଷମାକର
ତଥାପି କହିବ ନାହିଁ,
ଯଦି କହିଦିଅ
ହେ କ୍ଷମାସାଗର
ତୁମ୍ଭକୁ ଡାକିବି କାହିଁ ।

ଦଣ୍ଡିବା ଶକତି
ଯାହାର ହିଁ ଅଛି
ସେ ହିଁ କ୍ଷମାକରିପାରେ,
ତୁମ ବିନା ଯିଏ
ବିଚାର କରିବ
ଦଣ୍ଡଦେବ କ୍ଷମା ଦୂରେ ।

ତୁମ୍ଭ ବିଚାରରେ
ଭରଷା ମୋ ଅଛି
ଆନକୁ ଭରଷା ନାହିଁ,
ନିର୍ଦୋଷୀ କାନ୍ଦଇ
ଦୋଷୀ ହସୁଥାଇ
ମୋ ବିଚାର କର ତୁହି ।

ଗଦାଧର ସାହୁ,ବ୍ରହ୍ମଗିରି,ପୁରୀ