ମୋ ସେବା କେନ୍ଦ୍ରର ଶୁଭ ଉଦଘାଟନ କଲେ ମୁଖ୍ୟମନ୍ତ୍ରୀ
ହିଞ୍ଜିଳିକାଟୁ, (ଶେଷଦେବ ସାହୁ) : ପଂଚାୟତରାଜ ବ୍ୟବସ୍ଥାକୁ ତୃଣମୂଳ ସ୍ତରରେ ଶକ୍ତିଶାଳୀ କରିବା ପାଇଁ ମୋ ସରକାର ବିଭିନ୍ନ ପଦକ୍ଷେପ ଗ୍ରହଣ କରିଛି । ଗଣତନ୍ତ୍ରରେ ଲୋକ ହିଁ ଶ୍ରେଷ୍ଠ । ବିଜୁବାବୁ ସବୁବେଳେ ସାଧାରଣ ଲୋକଙ୍କ ହକ୍କୁ ଗୁରୁତ୍ୱ ଦେଉଥିଲେ । ତେଣୁ ସୁନାର ଓଡ଼ିଶା ଗଠନ ଦିଗରେ ବିଜୁବାବୁଙ୍କ ସ୍ୱପ୍ନକୁ ସାକାର କରିବା ପାଇଁ ମାର୍ଚ୍ଚ ୫ ତାରିଖକୁ ପଂଚାୟତରାଜ ଓ ଲୋକସେବା ଦିବସ ଭାବେ ପାଳନ୍ କରାଯାଇଛି । ଶୁକ୍ରବାର ଉତ୍କଳ ଜନନୀର ବରପୁତ୍ର ପ୍ରବାଦ ପୁରୁଷ ବିଜୁ ବାବୁଙ୍କ ୧୦୫ତମ ଜନ୍ମ ଜୟନ୍ତୀ ପାଳନ ଅବସରରେ ସାରା ଓଡ଼ିଶାରେ ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ଲୋକ ସେବାରେ ଲୋକାର୍ପିତ ହୋଇଛି ‘ ମୋ ସେବା କେନ୍ଦ୍ର ଓ ଓଡ଼ିଶା ୱାନ ପୋର୍ଟାଲ । ଏହି ଅବସରରେ ରାଜ୍ୟ ମୁଖ୍ୟମନ୍ତ୍ରୀଙ୍କ ନିର୍ବାଚନ ମଣ୍ଡଳୀ ହିଞ୍ଜିଳିକାଟୁ ପଂଚାୟତ ସମିତି କାର୍ଯ୍ୟାଳୟ ପରିସରରେ ମୋ ସେବା କେନ୍ଦ୍ରକୁ ଭିଡ଼ିଓ କନଫେରନ୍ସ ମାଧ୍ୟମରେ ହିଞ୍ଜିଳି ବିଧାୟକ ତଥା ରାଜ୍ୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଲୋକାର୍ପିତ କରିଛନ୍ତି । ଏହି ଉପଲକ୍ଷେ ଆୟୋଜିତ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଉଦବୋଧନ ଦେଇ କହିଲେ ଏଣିକି ଲୋକଙ୍କୁ ହାତ ପାହାନ୍ତାରେ ସମସ୍ତ ପ୍ରକାର ସରକାରୀ ସୁବିଧା ପ୍ରଦାନ ସକାଶେ ଲୋକଙ୍କୁ ବାରମ୍ବାର ବିଭିନ୍ନ ସରକାରୀ କାର୍ଯ୍ୟାଳୟକୁ ଦୌଡ଼ିବାକୁ ପଡ଼ିବ ନାହିଁ । ଲୋକମାନେ ଯେପରି ଏସବୁ ସୁବିଧା ଗୋଟିଏ ଜାଗାରେ ପାଇପାରିବେ ସେ ନେଇ ‘ ମୋ ସେବା କେନ୍ଦ୍ର ଓ ଓଡ଼ିଶା ୱାନ ପୋର୍ଟାଲର ଶୁଭାରମ୍ଭ କରାଯାଇଚି । ଏହି ସେବା ମାଧ୍ୟମରେ ବିଦ୍ୟୁତ, ଜଳ ଟିକସ, ବିଭିନ୍ନ ପ୍ରମାଣପତ୍ର ଭଳି ୧୦୦ଟି ସେବା ବର୍ତମାନ ଠାରୁ ଉପଲବ୍ଧ ହୋଇଛି । ଆଗାମୀ ଦିନରେ ୪୩୦ଟି ସେବା ଯୋଗାଇଦେବା ଲକ୍ଷ୍ୟ ରହିଛି ବୋଲି ମୁଖ୍ୟମନ୍ତ୍ରୀ ପଟ୍ଟନାୟକ କହିଥିଲେ । ଏଥି ପାଇଁ ଓଡ଼ିଶାର ସମସ୍ତ ପଂଚାୟତରେ ଗୋଟିଏ ଲେଖାଏଁ ମୋ ସେବା କେନ୍ଦ୍ର ପ୍ରତିଷ୍ଠା କରାଯିବା ସହ ୨୫ ହଜାରରୁ ଉର୍ଦ୍ଧ୍ୱ ଜନସଂଖ୍ୟା ବିଶିଷ୍ଟ ସହରରେ ଗୋଟାଏ ଲେଖାଏଁ ଏପରି ୭ ହଜାରରୁ ଉର୍ଦ୍ଧ୍ୱ ‘ ମୋ ସେବା କେନ୍ଦ୍ର ଓ ଓଡ଼ିଶା ୱାନ ପୋର୍ଟାଲ କେନ୍ଦ୍ର ପ୍ରତିଷ୍ଠା କରାଯିବାର ଲକ୍ଷ୍ୟ ରଖାଯାଇଛି । ମାନ୍ୟବର ମୁଖ୍ୟମନ୍ତ୍ରୀଙ୍କ ଦ୍ୱାରା ଉନ୍ନତ ଓ ପରିବର୍ଦ୍ଧିତ ଏହି ପ୍ଳାର୍ଟଫାର୍ମର ପରିକଳ୍ପନା ଓ ମୋ ସେବା କେନ୍ଦ୍ର ପରି ଯୋଜନା ଆଗାମୀ ଦିନରେ ରାଜ୍ୟବାସୀଙ୍କୁ ଅଧିକରୁ ଅଧିକ ସ୍ୱଚ୍ଛ ଓ ସୁସଙ୍ଗଠିତ ପ୍ରଶାସନିକ ସେବା ଯୋଗାଇ ଦେବାରେ ସହାୟକ ହେବ ବୋଲି ମୁଖ୍ୟମନ୍ତ୍ରୀ କହିଥିଲେ । ବିଶେଷତଃ ଲୋକଙ୍କୁ ସେବା ଓ ସମ୍ମାନ ଯୋଗାଇଦେବା ମୋ ସରକାରର ମୂଳ ଲକ୍ଷ୍ୟ ବୋଲି ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ କହିଥିଲେ । ପରେ ହିଞ୍ଜିଳି ଅଂଚଳର ଦୁଇ ହିତାଧିକାରୀ ମୋ ସେବା କେନ୍ଦ୍ର ମାଧ୍ୟମରେ କିଭଳି ହାତ ପାହାନ୍ତାରେ ସୁବିଧା ପାଇ ପାରିଛନ୍ତି ସେ ନେଇ ଅନୁଭୂତି ବଖାଣିଥିଲେ ।
ଉକ୍ତ କାର୍ଯ୍ୟକ୍ରମରେ ଗଞ୍ଜାମ ଜିଲ୍ଲାପାଳ ବିଜୟ ଅମୃତ କୁଲାଙ୍ଗେ, ବ୍ଳକ ଅଧ୍ୟକ୍ଷ ଏନ. ରଘୁନାଥ, ମୁଖ୍ୟମନ୍ତ୍ରୀଙ୍କ ବ୍ଳକ ପ୍ରତିନିଧି ସୁରେନ୍ଦ୍ରନାଥ ପ୍ରଧାନ, ଆସିକା ସାଂସଦଙ୍କ ରାଜନୈତିକ ସହାୟକ ନିଳମଣି ପଟ୍ଟନାୟକ, ଡ଼ି. ବିଶ୍ୱନାଥ, ସରଂପଚ ଭାଣ୍ଡି ରବିନ୍ଦ୍ର, ଲକ୍ଷ୍ମଣ ଗଉଡ଼, ସହଦେବ ବେହେରା,ରଘୁନାଥ ବେହେରା, କେ. ଦୁର୍ଗାପ୍ରସାଦ ରାଓ, ମନୋଜ ସାବତ, ଜିଲ୍ଲା ପରିଷଦ ସଭ୍ୟ ପ୍ରମୋଦ ମହାନ୍ତି, ଅଜିତ କୁମାର ପାତ୍ର, ଜି ମୋହାନ, ବିଜେଡ଼ି ମହିଳା ସଭାନେତ୍ରୀ ମମତା ରେଡ୍ଡି, ସମିତିସଭ୍ୟ ଅନୁପମ ବେହେରା, ବାବୁଲା ସାହୁ, ଅଶୋକ ପଣ୍ଡା, ଅଜୟ କୁମାର ମହାରଣା, ଲଡ଼ୁକିଶୋର ବେହେରା, ତହସିଲଦାର ପ୍ରଭାତ କୁମାର ପରିଡ଼ା, ବିଡ଼ିଓ ପ୍ରସନ କୁମାର ପାତ୍ର, ପୌର କାର୍ଯ୍ୟ ନିର୍ବାହୀ ଅଧିକାରୀ ଡ଼ଃ. ମନୋରଞ୍ଜନ ସାହୁ, ଥାନା ଭାରପ୍ରାପ୍ତ ଅଧିକାରୀ ଅଭିମନ୍ୟୁ ଦାସ, ସିଡ଼ିପିଓ ଶୁଭଶ୍ରୀ ପାତ୍ର, ଏବିଡ଼ିଓ ଅରୁଣ କୁମାର ନାହାକ, ସହକାରୀ ଯନ୍ତ୍ରୀ ପ୍ରମୋଦ ନାୟକ, ବନ ବିଭାଗୀୟ ଫରେଷ୍ଟର ବାଲାଜୀ ରେଡ୍ଡିଙ୍କ ସମେତ ବହୁ ଜନ ପ୍ରତିନିଧି ଓ ପ୍ରଶାସନିକ ଅଧିକାରୀ ମାନେ ଉପସ୍ଥିତ ଥିଲେ । କାର୍ଯ୍ୟକ୍ରମକୁ ଓଡ଼ିଶା ସରକାରଙ୍କ ୫ଟି ସଚିବ ଭି. କାର୍ତିକେୟାନ ପାଣ୍ଡିୟାନ ପରିଚାଳନା କରିଥିଲେ ।
ମୋ ସେବା କେନ୍ଦ୍ର ଲୋକାର୍ପଣ ଉତ୍ସବ ପରେ ବିଜୁବାବୁଙ୍କ ତୈଳ ଫଟୋଚିତ୍ରରେ ପୁଷ୍ପମାଲ୍ୟ ଅର୍ପଣ କରାଯାଇ ପଂଚାୟତରାଜ ଦିବସ ପାଳନ କରାଯାଇଥିଲା ।
