ରକ୍ତ କର୍କଟ ରୋଗରେ ପିଡିତ ଅକ୍ଷୟଙ୍କୁ ସହାୟତା ପାଇଁ ଆକୁଳ ନିବେଦନ କଲେ ପୁଅ ଓ ସ୍ତ୍ରୀ,

ହାଟଡିହି, (ବିକାଶ ବିଶ୍ୱାଳ ) : ନୁଆ ରମ୍ପାସ ଗ୍ରାମର ଅକ୍ଷୟ ସେନାପତି ରକ୍ତ କର୍କଟ ରୋଗରେ ପିଡିତ ହୋଇ ଏବେ ମୃତୁ୍ୟ ସହ ସଗ୍ରାମ କରୁଛନ୍ତି । ତାଙ୍କର ଚିକିତ୍ସା ପାଇଁ ୨୫ରୁ ୩୦ଲକ୍ଷ ଟଙ୍କାର ଆବଶ୍ୟକତା ଥିବାନେଇ ଡାକ୍ତର କହିବାପରେ ତାଙ୍କ ପକ୍ଷେ ଏତେ ଟଙ୍କା ସଂଗ୍ରହ କରିବା ପାଇଁ ସେ ଅସମର୍ଥ ଥିବାରୁ ତାଙ୍କ ଛୋଟ ପୁଅ ଓ ସ୍ତ୍ରୀ ଏବେ ଓଡିଶାବାସୀଙ୍କ ସହଯୋଗ ଲୋଡିଛନ୍ତି । ସୁଚନାରୁ ଜଣାଯାଇଛି ଯେ ଗ୍ରାମର ଅକ୍ଷୟ କୁମାର ସେନାପତି(୪୪) ଘରେ ଚାଷବାସ କରିବା ସହିତ ବାହାର ରାଜ୍ୟକୁ ଯାଇ କାମକରି ନିଜର ପରିବାର ଚଳାନ୍ତି । ଘରେ ତାଙ୍କର ଛୋଟ ଛୋଟ ଦୁଇ ପୁଅ, ସ୍ତ୍ରୀକୁ ନେଇ ତାଙ୍କ ସଂସାର । ସେ ହାଇଦ୍ରାବାଦରେ ଏକ କମ୍ପାନୀରେ ଶ୍ରମିକ ଭାବେ କାର୍ଯ୍ୟ କରୁଥିବାବେଳେ ସେ ଯାହା ପାଆନ୍ତି ସେଥିରେ ଘରଟି ଚଳିଯାଏ । ସେଠାରେ କାମ କରୁଥିବାବେଳେ ହଠାତ ସେ ଅସୁସ୍ଥ ହୋଇ ପଡିଲେ । ତାଙ୍କ ମୁଣ୍ଡ ବୁଲାଇବା ସହିତ ଦେହ ଦିନକୁ ଦିନ ଖରାପ ହେବାକୁ ଲାଗିଲା । ସେ ବାଧ୍ୟ ହୋଇ ଘରକୁ ପଳାଇ ଆସିଲେ । ପରେ ସେ ଡାକ୍ତରଖାନା ଯାଇ ତାଙ୍କ ସ୍ୱାସ୍ଥ୍ୟ ପରୀକ୍ଷା କରିବାପରେ ସେ ରକ୍ତ କର୍କଟ ରୋଗରେ ପିଡିତ ଥିବା ଡାକ୍ତର କହିଥିଲେ । ଏକଥା ଜାଣିବାପରେ ପରିବାର ଲୋକଙ୍କ ଉପରେ ସତେ ଯେପରି ବଜ୍ର ପଡିଲା ଭଳି ଲାଗିଲା । ତାଙ୍କୁ ତୁରନ୍ତ ଚିକିତ୍ସା ଆବଶ୍ୟକ ବୋଲି ଡାକ୍ତରମାନେ କହିବାପରେ ତାଙ୍କୁ ସମ ହସପିଟାଲରେ ଭର୍ତ୍ତି କରାଗଲା । ଏପରିକି ଘର ଲୋକ ଜମିବାଡି ବିକ୍ରୀ କରି ୫ଲକ୍ଷରୁ ଉର୍ଦ୍ଧ ଟଙ୍କା ତାଙ୍କ ପଛରେ ସାରିଲେ । ହେଲେ ସେ ସୁସ୍ଥ ହୋଇପାରିଲେ ନାହିଁ । ପରେ ତାଙ୍କୁ ଏମ୍ସ ଭୁବନେଶ୍ୱର ରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି । ତାଙ୍କର ବ୍ରୋନମ୍ୟାରୋ ଟ୍ରାନସଲେଟ କରାଯିବ ଓ ଏଥିପାଇଁ ବାହାର ରାଜ୍ୟକୁ ନେବାକୁ ହେବ, ଏଥିପାଇଁ ୨୫ରୁ ୩୦ଲକ୍ଷ ଟଙ୍କା ଖର୍ଚ୍ଚ ହେବ । ୩ ରୁ ୪ସପ୍ତାହ ମଧ୍ୟରେ ତାଙ୍କର ଅପରେସନ କରିବାକୁ ପଡିବ । ତାଙ୍କ ଅବସ୍ଥା ଏବେ ଗୁରୁତର ଥିବାରୁ ତାଙ୍କୁ ଆସିୟୁରେ ଭର୍ତ୍ତି କରାଯାଇ ଚିକିତ୍ସା ଚାଲିଛି । ଏପରି ଅବସ୍ଥାରେ ତାଙ୍କ ଘରେ ଏତେ ଟଙ୍କା ଖର୍ଚ୍ଚ କରିବାକୁ କୌଣସି ସମ୍ବଳ ନଥିବାରୁ ତାଙ୍କ ପତ୍ନୀ, ପୁଅ ଓ ପରିବାର ଲୋକେ ସହାୟତା ପାଇଁ ସମସ୍ତଙ୍କୁ ନିବେଦନ କରୁଛନ୍ତି । ଓଡିଶାବାସୀ ତାଙ୍କର ଏପରି ଘଡିସନ୍ଧି ମୁହୁର୍ତ୍ତରେ ତାଙ୍କୁ ସହଯୋଗର ହାତ ବଢ଼ାଇ ତାଙ୍କ ସ୍ୱାମୀଙ୍କ ଜୀବନ ବଞ୍ଚାଇବାକୁ ତାଙ୍କ ସ୍ତ୍ରୀ ନିବେଦନ କରିଛନ୍ତି । କୌଣସି ବ୍ୟକ୍ତି ଯଦି ସହଯୋଗ ପାଇଁ ଇଛା କରନ୍ତି ତେବେ ୭୬୦୬୦୬୩୦୧୯ ନମ୍ବରରେ (ଅଭିଶେକ ସେନାପତି) ଗୁଗୁଲ ପେ କିମ୍ବା ଫୋନ ପେ ମାଧ୍ୟମରେ ସହାୟତା ରାଶି ପଠାଇବାକୁ ସେ ନିବେଦନ କରିଛନ୍ତି । ଏପଟେ ତାଙ୍କର ଏପରି ଅବସ୍ଥାକୁ ଦେଖି ନୁଆରମ୍ପାସ ଓ ବଡରମ୍ପାସ ଗ୍ରାମର ଯୁବକ ମାନେ ସହାୟତାର ହାତ ବଢ଼ାଇବା ପାଇଁ ଆଗେଇ ଆସିଛନ୍ତି । ସେମାନେ ଦୁଇଦିନ ହେଲା ବିଭିନ୍ନ ଗାଁରେ ଘରକୁ ଘର ବୁଲି ଅକ୍ଷୟଙ୍କ ଚିକିତ୍ସା ସହାୟତା ପାଇଁ ମାଗଣ କରୁଛନ୍ତି । ଗ୍ରାମବାସୀମାନେ ମଧ୍ୟ ମୁକ୍ତ ହସ୍ତରେ ଦାନ କରୁଥିବା ଦେଖିବାକୁ ମିଳିଛି ।