ରାସ୍ତା ଅବସ୍ଥା ଶୋଚନୀୟ

ବନ୍ତ, (ଚାନ୍ଦିନୀ ମହାନ୍ତି):ବନ୍ତ ବ୍ଲକ ଗଣିଜାଙ୍ଗ ପଞ୍ଚାୟତ ୧ନଂ.ୱାର୍ଡ କାଶିପୁରରୁ ଇଛାପୁର ପ୍ରାୟ ୧କିମି ରାସ୍ତା ଅବସ୍ଥା ଶୋଚନୀୟ ହୋଇପଡିଛି । ଉକ୍ତ ରାସ୍ତା ଦେଇ ଦୈନନ୍ଦିନ କାଶିପୁର ଓ ଇଛାପୁରର ପ୍ରାୟ ୫ ଶହରୁ ଉର୍ଦ୍ଧ୍ୱ ଲୋକ ଯାତାୟତ କରିଥାନ୍ତି । ବିଶେଷକରି ଛୋଟ ପିଲା ମାନେ କାଶିପୁରସ୍ଥିତ ପ୍ରାଥମିକ ବିଦ୍ୟାଳୟ, ଅଙ୍ଗନୱାଡି କେନ୍ଦ୍ର ସମେତ ଇଛାପୁର ବିଦ୍ୟାଳୟକୁ ବହୁ କଷ୍ଟରେ ଯାଉଛନ୍ତି । ଏସଂପର୍କରେ ଗ୍ରାମବାସୀ ମାନେ ବାରମ୍ବାର ଅଭିଯୋଗ କରୁଥିଲେ ମଧ୍ୟ କୌଣସି ସୁଫଳ ମିଳୁପାରୁନାହିଁ । କିଛି ମାସ ପୂର୍ବେ ଉକ୍ତ ରାସ୍ତାରେ ମୋରମ, ମେଟାଲ କାର୍ଯ୍ୟ ନିମ୍ନମାନର ହୋଇଥିବା ଯୋଗୁ ତାହା ଅଳ୍ପ ଦିନ ମଧ୍ୟରେ ନଷ୍ଟ ହୋଇ ଯାଇଛି । ଉକ୍ତ ରାସ୍ତାକୁ ତୁରନ୍ତ ମରାମତି କରିବାକୁ ଗ୍ରାମବାସୀ ମାନେ ଦାବୀ କରିଛନ୍ତି ।