ଲୱାମା ଆକ୍ରମଣ ଏକ ‘ଭୟଙ୍କର ପରିସ୍ଥିତି’: ଟ୍ରମ୍ପ
ୱାଶିଂଟନ: ପୁଲୱାମା ଆକ୍ରମଣ ଘଟଣାରେ ପାକିସ୍ତାନର କୌଣସି ହାତ ନାହିଁ ବୋଲି ଦେଶର ପ୍ରଧାନମନ୍ତ୍ରୀ ଇମ୍ରାନ ଖାନ ଯୁକ୍ତି ବାଢ଼ିବା ପରେ ଆମେରିକା ପୁଣି ଥରେ ଚେତାବନୀ ଦେଇଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ଘଟଣାକୁ ଏକ ‘ଭୟଙ୍କର ପରିସ୍ଥିତି’ ବୋଲି ଦର୍ଶାଇବା ସହ ପାକିସ୍ତାନ ତୁରନ୍ତ ଏ ଦିଗରେ ଆତଙ୍କବାଦୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଉ ବୋଲି କହିଛନ୍ତି।
ଆମେରିକାର ବିଭାଗୀୟ ଉପ ମୁଖପାତ୍ର ରବର୍ଟ ପାଲ୍ଲାଡିନୋ ଏହି ଘଟଣାରେ ଭାରତକୁ ଦୃଢ଼ ସମର୍ଥନ ଜଣାଇବା ସହ ଘଟଣା ପାଇଁ ଯିଏ ଦାୟୀ ତାକୁ ତୁରନ୍ତ ଦଣ୍ଡ ଦେବାକୁ ପାକିସ୍ତାନକୁ କହିଛନ୍ତି। ପୁଲୱାମା ଆକ୍ରମଣ ଘଟଣା ପରେ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ଲାଗିରହିଛି। ତେବେ ଉଭୟ ପଡ଼ୋଶୀ ରାଷ୍ଟ୍ର ଏକ ହୋଇ ଆତଙ୍କବାଦୀଙ୍କ ବିରୋଧରେ ଲଢ଼େଇ କଲେ ଏହା ଏକ ସୁନ୍ଦର ପଦକ୍ଷେପ ହେବ ବୋଲି ଟ୍ରମ୍ପ କହିଛନ୍ତି। ପାଲ୍ଲାଡିନୋ କହିଛନ୍ତି, ଆମେ ପାକିସ୍ତାନ ନିଟକରେ ଦାବି କରିଛୁ ଯେ ସେ ତଦନ୍ତରେ ସମ୍ପୂର୍ଣ୍ଣ ସହଯୋଗ କରିବା ସହ ଦୋଷୀଙ୍କୁ ଠାବ କରି ଦଣ୍ଡିତ କରୁ। ଆକ୍ରମଣ ଘଟଣା ପରଠାରୁ ଆମେ ପାକିସ୍ତାନ ସହ ଏ ପ୍ରସଙ୍ଗରେ କଥାବାର୍ତ୍ତା ଜାରି ରଖିଛୁ। ସେହିପରି ଆତ୍ମରକ୍ଷା ପାଇଁ ଭାରତର ପଦକ୍ଷେପକୁ ଟ୍ରମ୍ପଙ୍କ ଜାତୀୟ ନିରାପତ୍ତା ଉପଦେଷ୍ଟା ଜନ ବୋଲଟନ ମଧ୍ୟ ସମର୍ଥନ କରିଛନ୍ତି।
