ଷ୍ଟେଟ୍ବ୍ୟାଙ୍କ ଏଟିଏମ୍ରୁ ଲୁଟ୍ ଉଦ୍ୟମ
ନିରାକାରପୁର ,(ଯୁଗାବ୍ଦ ନ୍ୟୁଜ୍): ପୂର୍ବରୁ ଦୁଇ ଦୁଇ ଥର ନିରାକାରପୁର କଲେଜଛକସ୍ଥିତ ଷ୍ଟେଟ୍ବ୍ୟାଙ୍କ ଏଟିଏମ୍ରୁ ଲୁଟେରା ଲୁଟ ପାଇଁ ଉଦ୍ୟମ କରି ବିଫଳ ହୋଇଥିବାବେଳେ ମଙ୍ଗଳବାର ବିଳମ୍ବିତ ରାତିରେ ପୁନର୍ବାର ଲୁଟ କରିବା ପାଇଁ ଉଦ୍ୟମ କରିଥିବାରୁ ପୁଲିସର ପାଟ୍ରୋଲିଂ ଓ ଏଟିଏମ କର୍ତ୍ତୃପକ୍ଷଙ୍କ ହେୟଜ୍ଞାନ ଉପରେ ଅଙ୍ଗୁଳି ଉଠିଛି । ଏହି ଏଟିଏମ୍ଟି ନିରାକାରପୁର ଥାନାଠାରୁ ମାତ୍ର ଦୁଇଶହ ମିଟର ହୋଇଥିବାବେଳେ ଗତକାଲି ବିଳମ୍ବିତ ରାତିରେ କିଛି ଦୁର୍ବୃତ୍ତ ଲୁଟ୍ କରିବା ଉଦ୍ଦେଶ୍ୟରେ ଏଟିଏମ୍ ଭାଙ୍ଗିବାକୁ ଚେଷ୍ଟା କରିଥିଲେ । କିନ୍ତୁ ଶକ୍ତ ଚାମ୍ବର ଭାଙ୍ଗିବାରେ ବିଫଳ ହେବାରୁ ଛାଡ଼ି ଚାଲିଯାଇଥିଲେ । ଆଜି ସକାଳୁ ଏ ସଂପର୍କରେ ଲୋକମାନେ ଦେଖିବାକୁ ପାଇଥିଲେ । ଏହି ଏଟିଏମଟି ଜନଗହଳିପୂର୍ଣ୍ଣ ସ୍ଥାନରୁ କିଛି ଦୂରରେ ରହୁଥିବାରୁ ଲୁଟେରା ଲୁଟ୍ କରିବାକୁ ସାହସ କରୁଛନ୍ତି । ପୁଲିସର ପାଟ୍ରୋଲିଂ ଢିଲା ଲାଗି ବର୍ତ୍ତମାନ ଅସାମାଜିକ ଯୁବକମାନେ ବିଳମ୍ବିତ ରାତି ପର୍ଯ୍ୟନ୍ତ ବିଭିନ୍ନ ନିଶା ଦ୍ରବ୍ୟ ଖାଇ ଦ୍ରୁତଗତିରେ ବାଇକ ଚଲାଇ ବଜାର ମଧ୍ୟରେ ଲୋକଙ୍କୁ ଭୟଭୀତ କରୁଛନ୍ତି । ବ୍ୟାଙ୍କ ପକ୍ଷରୁ ରାତ୍ର ଜଗୁଆଳୀର ବ୍ୟବସ୍ଥା କରିବାକୁ ମଧ୍ୟ ଦାବି ହେଉଛି ।
