ସଡକ ଦୁର୍ଘଟଣାରେ ୧ ମୃତ

ନାଉଗାଁ, (ଯୁଗାବ୍ଦ ନ୍ୟୁଜ୍): ନାଉଗାଁ ଥାନା ଅନ୍ତର୍ଗତ ବାଲିଭଉଁରୀ-ଶିଖରଘାଟ ମୁଖ୍ୟରାସ୍ତା ସାଧୁଗୋସ୍ୱାମୀ ପୀଠ ସମ୍ମୁଖରେ ଗୁରୁବାର ବିଳମ୍ବିତ ରାତିରେ ସଡକ ଦୁର୍ଘଟଣା ଘଟିଛି । ଦୁର୍ଘଟଣାରେ ଜଣେ ଯୁବକଙ୍କ ମୃତ୍ୟୁ ହୋଇଥିବା ଜଣାପଡିଛି । । ସୂଚନା ଅନୁଯାୟୀ ପୁରୀ ଜିଲ୍ଲା ଅନ୍ତର୍ଗତ କାକଟପୁର ଥାନାର ଭଣ୍ଡିସାହିସ୍ଥିତ ବାଲିକୁଳ ଗ୍ରାମର ବିଭୁତି ବିଶ୍ୱାଳ(୪୪) ବାଇକ ଯୋଗେ ନାଉଗାଁ ବ୍ଳକ ଅନ୍ତର୍ଗତ ଗୋଠଦା ଗ୍ରାମର ନିଜ ଭଉଣୀ ଘରକୁ ଆସୁଥିଲେ । କିନ୍ତୁ ସେ ସାଧୁ ଗୋସ୍ୱାମୀପୀଠ ସମ୍ମୁଖରେ ରାସ୍ତା ଉପରେ ପଡି ରହିଥିଲେ । ରାସ୍ତାରେ ଯାଉଥିବା ଯାତ୍ରୀ ଏହାକୁ ଦେଖି ଥାନାକୁ ଖବର ଦେଇଥିଲେ । ସ୍ଥାନୀୟ ପୋଲିସ ଖବର ପାଇ ତାଙ୍କୁ ଉଦ୍ଧାର କରି ନାଉଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଅଣିଥିଲେ । ସେଠାରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ । ପରିବାରର ଅଭିଯୋଗ ଆଧାରରେ ଥାନା ପକ୍ଷରୁ ୯୦/୧୯ ରେ ମାମଲା ରୁଜୁ କରାଯାଇ ଶବ ବ୍ୟବଚ୍ଛେଦ ପାଇଁ ମୁଖ୍ୟ ଚିକିତ୍ସାଳୟକୁ ପଠାଯାଇଥିବା ଥାନାଧିକାରୀ ସୂଚନା ଦେଇଛନ୍ତି । ସୂଚନା ଯୋଗ୍ୟ ଯେ ଶିଖରଘାଟ-ବାଲିଭଉଁରୀ ମୁଖ୍ୟ ରାସ୍ତା ପୂର୍ତ ବିଭାଗ ଅଧିନରେ ଥିବା ବେଳେ ଏହାକୁ ଟେଣ୍ଡର କରାଯାଇ କୋକିଢିହ ଠାରୁ ଶିଖରଘାଟ ପର୍ଯ୍ୟନ୍ତ କାର୍ଯ୍ୟ ଚାଲୁ ରହିଛି । ଦୀର୍ଘ ୬ ମାସ ରୁ ଉଦ୍ଦ୍ୱର୍ ହେବ ଉକ୍ତ ରାସ୍ତା କାର୍ଯ୍ୟ ଚାଲୁଥିବା ବେଳେ ରାସ୍ତାରେ ଖାଲ ଢିପ ଥିବା ଜଣାଯାଇଛି । ଏପରିକି ରାସ୍ତା ନିର୍ମାଣ ହେଉଥିବାର କୌଣସି ସୂଚନା ଫଳକ ନଥିବା ବେଳେ ରାସ୍ତା ନିର୍ମାଣ ସମ୍ବନ୍ଧରେ କୌଣସି ସୂଚନା ମଧ୍ୟ ଦିଆଯାଇ ନାହିଁ । ଯାହାଫଳରେ ଏହି ବାଟ ଦେଇ ରାତିରେ ବାଇକ ଯୋଗେ ଆସୁଥିବା ବାଇକ ଆରୋହୀମାନେ ଦୁର୍ଘଟଣାରେ ଶୀକାର ହେଉଛନ୍ତି । ଏପରିକି ଅନେକ ସମୟରେ ଜନ ଜୀବନ ହାନି ଘଟୁଥିବାର ଜଣାଯାଇଛି । ତେଣୁ ରାସ୍ତା ନିର୍ମାଣ କରୁଥିବା ଠିକାଦାର ଓ ବିଭାଗୀୟ କତୃପକ୍ଷଙ୍କ ବେପରୁଆ ମନୋଭାବ ଯୋଗୁ ଦୁର୍ଘଟଣା ଘଟୁଥିବା ସ୍ଥାନୀୟ ଅଂଚଳରେ ଚର୍ଚ୍ଚାର ବିଷୟ ପାଲଟିଛି । ଏବିଷୟରେ ବିଭାଗୀୟ ଯନ୍ତ୍ରୀଙ୍କ ମତାମତ ପାଇଁ ଚେଷ୍ଟା କରାଯାଇଥିଲେ ମଧ୍ୟ ସମ୍ଭବ ହୋଇ ପାରିନାହିଁ ।