ସିଂଘମଙ୍କ ହାତରେ ‘ସତ୍ତେ ପେ ସତ୍ତା’
ମୁମ୍ବାଇ : ହ୍ରିତିକ୍ ରୋଶନ୍, ସଲମାନ୍ ଖାନ୍, ରଣବୀର ସିଂ, ଅକ୍ଷୟ କୁମାରଙ୍କ ପରେ ଏବେ କଥା ଯାଇ ଅଟକିଛି ସିଂଘମ୍ ଷ୍ଟାର୍ ଅଜୟ ଦେବଗନଙ୍କ ନିକଟରେ । କଥା କ’ଣ କି ଫିଲ୍ମ ‘ସତ୍ତେ ପେ ସତ୍ତା’ର ରିମେକ୍ ପାଇଁ ଆକ୍ଟର ଅଜୟଙ୍କୁ ଅଫର୍ ଦିଆଯାଇଛି । ସୂଚନା ଥାଉ ଯେ, ଫରାହ ଖାନ୍ ଏବଂ ରୋହିତ୍ ସେଟ୍ଟୀ ଦୀର୍ଘଦିନ ଧରି ଏହି ଫିଲ୍ମର ମୁଖ୍ୟ ଅଭିନେତା ଲାଗି ସନ୍ଧାନ ଜାରି ରଖିଥିଲେ । ବହୁ ବଡ଼ ବଡ଼ ଷ୍ଟାରଙ୍କ ପରେ ପରିଶେଷରେ ‘ସତ୍ତେ ପେ ସତ୍ତା’ର ଅଫର୍ ଏବେ ମେଗା ଷ୍ଟାର୍ ଅଜୟ ଦେବଗନଙ୍କ ହାତକୁ ଆସିଛି । ଫିଲ୍ମରେ ଫିମେଲ୍ ଲିଡକୁ ନେଇ କ୍ୟାଟ୍ରିନା କୈଫଙ୍କ ନାମ ଶୁଣିବାକୁ ମିଳିଛି । ସୂତ୍ରରୁ ଜଣାପଡ଼ିଛି ଯେ, ଅଜୟ ଦେବଗନ ଏ ପର୍ଯ୍ୟନ୍ତ ଏହି ପ୍ରୋଜେକ୍ଟରେ କାମ କରିବା ଲାଗି ହଁ ଭରିନାହାନ୍ତି । ଏଥିସହିତ ଅଭିନେତ୍ରୀ କ୍ୟାଟ୍ରିନାଙ୍କ ତରଫରୁ ମଧ୍ୟ କୌଣସି ସ୍ପଷ୍ଟ ସୂଚନା ମିଳିନଥିବା ଜଣାପଡ଼ିଛି । ତେବେ ଏଥିପାଇଁ ଉଭୟଙ୍କ ସହ ଯୋଗାଯୋଗ ଚାଲିଥିବା ସୂତ୍ରରୁ ଜଣାପଡ଼ିଛି । ଏଠାରେ ଉଲ୍ଲେଖନୀୟ ଯେ, କ୍ୟାଟ୍ରିନାଙ୍କ ଫିଲ୍ମ ‘ସୂର୍ଯ୍ୟବଂଶୀ’ ଏବଂ ‘ଫୋନ୍ ବୁଥ୍’ର ସୁଟିଂ ଶେଷ ହେବା ଉପରେ ଏବଂ ଏହା ଖୁବ୍ ଶୀଘ୍ର ରିଲିଜ୍ ମଧ୍ୟ ହେବାର ଯୋଜନା ରହିଛି । ଅଜୟ ‘ସୂର୍ଯ୍ୟବଂଶୀ’ରେ ଏକ କେମିଓ ରୋଲ ପ୍ଳେ କରିବେ । ଏହା ପୂର୍ବରୁ ଅଜୟ ଏବଂ କ୍ୟାଟ୍ରିନା ଫିଲ୍ମ ‘ରାଜନୀତି’ରେ ସହ କଳାକାର ଭାବେ ନଜର ଆସିସାରିଛନ୍ତି । ‘ସତ୍ତେ ପେ ସତ୍ତା’ରେ ଅଜୟ ଓ କ୍ୟାଟ୍ରିନା ପ୍ରଥମ ଥର ଲାଗି ବଡ଼ ପରଦାରେ ରୋମାନ୍ସ କରିବେ ।
