ସ୍ତ୍ରୀର ଟାଙ୍ଗିଆ ଚୋଟରେ ସ୍ଵାମୀ ମୃତ

କରଞ୍ଜିଆ, (ଯୁଗାବ୍ଦ ନ୍ୟୁଜ):ମୟୁରଭଞ୍ଜ ଜିଲ୍ଲା ଠାକୁରମୁଣ୍ଡା ଥାନା ରାଣୀଭୋଳ ଗ୍ରାମରେ ଏଭଳି ଅଭାବନୀୟ ଘଟଣା ଘଟିଛି। ଗତ ରାତିରେ ଗ୍ରାମର ମସୁରୀ ସଏ ନାମକ ଜଣେ ସ୍ତ୍ରୀଲୋକ ତାଙ୍କ ସ୍ଵାମୀକୁ ଟାଙ୍ଗିଆରେ ହାଣି ହତ୍ୟା କରିଛନ୍ତି। ଖବର ପାଇ ଠାକୁରମୁଣ୍ଡା ଥାନା ପୋଲିସ ଘଟଣାସ୍ଥଳରେ ପହଞ୍ଚି ଶବକୁ ଜବତ କରି ବ୍ୟବଚ୍ଛେଦ ପାଇଁ କରଞ୍ଜିଆ ଉପଖଣ୍ଡ ଡାକ୍ତରଖାନା କୁ ପଠାଯାଇଛି ଠାକୁରମୁଣ୍ଡା ପୋଲିସ ହତ୍ୟାକାରୀ ସ୍ତ୍ରୀକୁ ଗିରଫ କରିଛି।ସୂଚନା ଅନୁସାରେ, ରାଣୀଭୋଳ ଗ୍ରାମର ଅନନ୍ତ ଗୋପ ଓ ତାଙ୍କର ସ୍ତ୍ରୀ ମସୁରୀ ସୟ ରାସନ ଚାଉଳ ନେବାକୁ ଗତକାଲି ହାତୀଗୋଡା ଗ୍ରାମପଞ୍ଚାୟତକୁ ଆସି ସନ୍ଧ୍ୟାରେ ଚାଉଳ ନେଇ ଘରକୁ ଫେରୁଥିଲେ । ଘରକୁ ଫେରିବା ପରେ ସ୍ଵାମୀ ଅନନ୍ତ ହାଣ୍ଡିଆ ପିଇବାକୁ ସ୍ତ୍ରୀ ମସୁରୀକୁ ପଇସା ମାଗିଥିଲେ। ଏହି ଘଟଣାକୁ ନେଇ ସ୍ୱାମୀ ଓ ସ୍ତ୍ରୀ ମଧ୍ୟରେ ଝଗଡା ହୋଇଥିଲା। ପ୍ରାୟ ଅଧିକାଂଶ ଦିନ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ଝଗଡା ହେଉଥିବାରୁ ପାଖ ପଡୋଶୀ କେହି ଏ ଝଗଡାକୁ ଗୁରୁତ୍ୱ ଦେଇ ନଥିଲେ। ସ୍ୱାମୀ ସ୍ତ୍ରୀଙ୍କ ଝଗଡା ମଧ୍ୟରେ ସ୍ତ୍ରୀ ଘର ଭିତରେ ଥିବା ଏକ କୁରାଢ଼ୀକୁ ନେଇ ସ୍ୱାମୀକୁ ଆକ୍ରମଣ କରିଥିଲା।କୁରାଢ଼ୀ ଆକ୍ରମଣରେ ଘଟଣାସ୍ଥଳରେ ଅନନ୍ତର ମୃତ୍ୟୁ ଘଟିଥିଲା। ଆଜି ଏ ନେଇ ଗ୍ରାମର ୱାର୍ଡ ମେମ୍ବର ଥାନାରେ ଜଣାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି ସାଇଣ୍ଟିଫିକ ଟିମକୁ ନେଇ ତଦନ୍ତ କରୁଛି। ହତ୍ୟାକାଣ୍ଡରେ ବ୍ୟବହୃତ କୁରାଢ଼ୀକୁ ପୋଲିସ ଜବତ କରିବା ସହ ଅଭିଯୁକ୍ତ ସ୍ତ୍ରୀ ମସୁରୀ ସୟକୁ ଗିରଫ କରିଛି। ଏନେଇ ଠାକୁରମୁଣ୍ଡା ଥାନାରେ ଏକ ହତ୍ୟା ମାମଲା ରୁଜ୍ଜୁ କରି ଅଧିକ ତଦନ୍ତ ଜାରି ରଖିଛି ଠାକୁରମୁଣ୍ଡା ଥାନା ପୋଲିସ।