ସ୍ୱର୍ଣ୍ଣ ପଦକ ହାସଲ କଲେ ସୌମ୍ୟ ପ୍ରକାଶ ରାଉତ

ହାଟଡିହି, (ବିକାଶ ବିଶ୍ୱାଳ):କେନ୍ଦୁଝର ଜିଲ୍ଲା ହାଟଡିହି ବ୍ଲକ ଏଲକଣା ଗ୍ରାମର ଅଧ୍ୟାପକ ଚିତ୍ତ ରଞ୍ଜନ ରାଉତଙ୍କ ପୁତ୍ର ସୌମ୍ୟ ପ୍ରକାଶ ରାଉତ ଓଡ଼ିଶା କୃଷି ଓ ବୈଷୟିକ ବିଶ୍ବବିଦ୍ୟାଳୟରୁ ସ୍ୱର୍ଣ୍ଣ ପଦକ ହାସଲ କରି ନିଜ ଗ୍ରାମ ତଥା ଅଞ୍ଚଳ ପାଇଁ ଗୌରବ ଆଣିଛନ୍ତି। ସୌମ୍ୟ ପ୍ରକାଶ ଜଣେ ମେଧାବୀ ଛାତ୍ର ଭାବେ ହାଟଡିହି ହାଇସ୍କୁଲ୍ ରୁ ୯୪ଭାଗ ମାର୍କ ରଖି ସଫଳତାର ସହ ଉତ୍ତୀର୍ଣ୍ଣ ହୋଇ ବିଜେବି କଲେଜରୁ ଯୁକ୍ତ ଦୁଇ ଶିକ୍ଷା ସମାପ୍ତ କରିଥିଲେ। ସେ ଓଡ଼ିଶା କୃଷି ଓ ବୈଷୟିକ ବିଶ୍ବବିଦ୍ୟାଳୟରୁ ସ୍ନାତକ ହାସଲ କରିଥିବା ବେଳେ ପ୍ଲାଣ୍ଟ ପାଥୋଲୋଜି ରେ ପ୍ରଥମ ସ୍ଥାନ ହାସଲ କରି ବିଶ୍ଵବିଦ୍ୟାଳୟର ସମାବର୍ତ୍ତନ ଉତ୍ସବରେ ଆଜି ସ୍ୱର୍ଣ୍ଣ ପଦକ ହାସଲ କରିଛନ୍ତି। ବିଶ୍ବବିଦ୍ୟାଳୟ ପକ୍ଷରୁ ତାଙ୍କୁ ସ୍ୱର୍ଣ୍ଣ ପଦକ ଦିଆ ଯାଇଥିବା ବେଳେ ମିହିର କୁମାର ଆଚାର୍ଯ୍ୟ ମେମୋରିଆଲ ଓ ଡ. ନରେନ୍ଦ୍ରନାଥ ମେମୋରିଆଲ ନାମରେ ଅନ୍ୟ ଦୁଇଟି ସ୍ୱର୍ଣ୍ଣ ପଦକ ହାସଲ କରିଛନ୍ତି। ଆଜି ସମାବର୍ତ୍ତନ ଉତ୍ସବରେ ରାଷ୍ଟ୍ରପତି ଦ୍ରୌପଦୀ ମୂର୍ମୁଙ୍କ ଉପସ୍ଥିତିରେ ବିଶ୍ଵବିଦ୍ୟାଳୟ ର କୁଳପତି ଡ.ପ୍ରଭାତ କୁମାର ରାଉଳ ତାଙ୍କୁ ସ୍ୱର୍ଣ୍ଣ ପଦକ ପ୍ରଦାନ କରିଥିଲେ। ତାଙ୍କର ଏପରି ସଫଳତାରେ ସମଗ୍ର ଅଞ୍ଚଳରେ ଖୁସିର ଲହରୀ ଖେଳିଯାଇଛି। ଆନନ୍ଦପୁର ବିଧାୟକଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ତାଙ୍କୁ ଶୁଭେଚ୍ଛା ଓ ଅଭିନନ୍ଦନ ଜଣାଇଛନ୍ତି।