ସ୍ୱସ୍ତିନଗରରେ ନବନିର୍ମିତ ପକ୍କା ଡ୍ରେନ ଉଦଘାଟିତ

ବାଲେଶ୍ୱର, (ସରୋଜ ପଣ୍ଡା):ରେମୁଣା ବ୍ଲକ ଅନ୍ତର୍ଗତ ସରସ୍ୱତୀପୁର ପଞ୍ଚାୟତର ସ୍ୱସ୍ତିନଗରରେ ବିଧାୟକ ହାତପାଣ୍ଠିରେ ନିର୍ମିତ ପକ୍କାଡ୍ରେନ ଗୁରୁବାର ଉଦଘାଟିତ ହୋଇଯାଇଛି । ଆୟୋଜିତ କାର୍ଯ୍ୟକ୍ରମରେ ରେମୁଣା ବିଧାୟକ ସୁଧାଂଶୁ ଶେଖର ପରିଡ଼ା ମୁଖ୍ୟଅତିଥି ଭାବେ ଯୋଗଦେଇ ଏହି ନବନିର୍ମିତ ପ୍ରକଳ୍ପକୁ ଉଦଘାଟନ କରିଥିଲେ । ଜନ ସାଧାରଣଙ୍କ ଆବଶ୍ୟକତାକୁ ଦୃଷ୍ଟିରେ ଏହି ପ୍ରକଳ୍ପ ପାଇଁ ଅନୁଦାନ ମଞ୍ଜୁର କରାଯାଇଛି । ସ୍ଥାନୀୟ ଅଞ୍ଚଳର ନିଷ୍କାସନ ବ୍ୟବସ୍ଥା ପାଇଁ ଏହା ସହାୟକ ହେବ ବୋଲି ବିଧାୟକ ଶ୍ରୀ ପରିଡ଼ା ଆଶା ପ୍ରକାଶ କରିଥିଲେ । ରେମୁଣା ବ୍ଲକ ଅଧ୍ୟକ୍ଷ ରାଜେନ୍ଦ୍ର କୁମାର ରାଉତ, ଉପାଧ୍ୟକ୍ଷ ସୁମତି ବେହେରା ଓ ଜିଲା ପରିଷଦ ସଭ୍ୟା କବିତା ପାଣି ପ୍ରମୁଖ ଏଥିରେ ସମ୍ମାନିତ ଅତିଥି ଭାବେ ଯୋଗଦେଇ ଅଞ୍ଚଳବାସୀଙ୍କ ଆବଶ୍ୟକତା ପୂରଣରେ ବିଧାୟକଙ୍କ ସମୟୋପଯୋଗୀ ନିଷ୍ପତ୍ତିକୁ ପ୍ରଶଂସା କରିଥିଲେ । ଏହି ଉଦଘାଟନୀ ଉତ୍ସବରେ ସ୍ଥାନୀୟ ବାସିନ୍ଦାମାନେ ଉପସ୍ଥିତ ଥିଲେ । ସ୍ୱସ୍ତିନଗରର ଲଲାଟେନ୍ଦୁଙ୍କ ଘରଠାରୁ ଓଟିରୋଡ଼ ପର୍ଯ୍ୟନ୍ତ ପକ୍କା ଡ୍ରେନ ପାଇଁ ରେମୁଣା ବିଧାୟକ ଶ୍ରୀ ପରିଡ଼ା ଅଢ଼େଇ ଲକ୍ଷ ଟଙ୍କାର ଅନୁଦାନ ପ୍ରଦାନ କରିଥିଲେ ।