ହିଞ୍ଜିଳି ପୋଲିସକୁ ମିଳିଲା ସଫଳତା : ଜଣେ ଗିରଫ, ୭ ମୋବାଇଲ ଜବତ

ହିଞ୍ଜିଳିକାଟୁ, (ଶେଷଦେବ ସାହୁ) : ଗତ ମଇ ୧୧ ତାରିଖ ବିଳମ୍ବିତ ରାତିରେ ହିଞ୍ଜିଳିକାଟୁ ପୌରାଞ୍ଚଳ ମାଣିକନଗର ଚଣିପଡିଆ ନିକଟସ୍ଥ ଏକ ମୋବାଇଲ ଦୋକାନରୁ ଲୁଟ୍ ହୋଇଥିଲା ।  ଦୋକାନ ସଟର ତାଲା ଭାଙ୍ଗି ଦୃର୍ବୁତ୍ତ ଦୋକାନରୁ ୮ଟି ଦାମୀ ମୋବାଇଲ ଲୁଟି ଚମ୍ପଟ ମାରିଥିଲେ । ୧୨ ତାରିଖ ସକାଳୁ ଦୋକାନୀ ମାଲିକ ସମିର ରଥ ଦୋକାନ ସଟର ତାଲା ଭାଙ୍ଗି ଦୋକାନରୁ ୮ଟି ମୋବାଇଲ ଲୁଟ୍ ହୋଇଥିବା ଜାଣିପାରି ହିଞ୍ଜିଳି ଥାନାରେ ଅଭିଯୋଗ କରିଥିଲେ । ଅଭିଯୋଗ ଭିତ୍ତିରେ ହିଞ୍ଜିଳି ଥାନାରେ ନମ୍ବର ୨୩୭/୨୨ରେ ଏକ ମାମଲା ରୁଜୁ କରି ପୋଲିସ ଘଟଣାର ତଦନ୍ତ ଚଳାଇଥିଲା। ମଙ୍ଗଳବାର ଅଭିଯୁକ୍ତ ଜଣଙ୍କ ଲୁଟ୍ ମୋବାଇଲ୍ ବିକ୍ରି କରିବାକୁ ଉଦ୍ୟମ କରୁଥିବା ବେଳେ କୈାଣସି ସୁତ୍ରରୁ ଖବର ପାଇ ହିଞ୍ଜିଳି ଥାନା ଆଇଆଇସି ଅଭିମନ୍ୟୁ ଦାସଙ୍କ ନେତୃତ୍ୱରେ ଥାନା ଏସ ଆଇ ସିଦ୍ଧାର୍ଥ ଜେନା, କନେଷ୍ଟବଳ ସରୋଜ କୁମାର ରଣସିଂହ ପ୍ରମୁଖ ଅଭିଯୁକ୍ତଙ୍କ ଘରେ ପହଞ୍ଚି ଅଭିଯୁକ୍ତଙ୍କୁ ଗିରଫ କରିବା ସହ ଅଭିଯୁକ୍ତଙ୍କ ଘର ଭିତରୁ ୭ଟି ମୋବାଇଲ ଫୋନ ଜବତ କରିଥିଲା । ଗିରଫ ଜଣଙ୍କ ହିଞ୍ଜିଳି ଥାନା ବୁରୁପୋଡା ଗ୍ରାମର ବବୁଲ ଦଳେଇ (୧୯) । ମଙ୍ଗଳବାର ଗିରଫ ଯୁବକଙ୍କୁ କୋର୍ଟ ଚାଲାଣ କରାଯାଇଥିବା ବେଳେ ଜବତ୍ ମୋବାଇଲକୁ ଦୋକାନୀ ମାଲିକ ରଥଙ୍କୁ ଜବତ ୭ଟି ମୋବାଇଲକୁ ଫେରାଇ ଦିଆଯାଇଥିବା ନେଇ ଥାନା ଆଇଆଇସି ଦାସ କହିଛନ୍ତି ।