ହ୍ୱାଇଟହାଉସରେ କରୋନା ସତର୍କତା, ସବୁଦିନ ପରୀକ୍ଷା ହେବ

ୱାଶିଂଟନ: ହ୍ୱାଇଟ ହାଉସରେ କାର୍ଯ୍ୟରତ ନୌସେନାର ଜଣେ କର୍ମଚାରୀଙ୍କ ନିକଟରେ କରୋନା ପଜିଟିଭ ବାହାରିବା ପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ହ୍ୱାଇଟ ହାଉସର ସବୁ କର୍ମଚାରୀଙ୍କର ପ୍ରତିଦିନ କରୋନା ପରୀକ୍ଷା କରାଯିବ ବୋଲି ସ୍ଥିର ହୋଇଛି ।
ରାଷ୍ଟ୍ରପତି ଟ୍ରମ୍ପ କିନ୍ତୁ କହିଛନ୍ତି, ସେ ଉକ୍ତ କର୍ମଚାରୀଙ୍କ ସଂସ୍ପର୍ଶରେ ଆସିନାହାନ୍ତି । ସେ ତାଙ୍କୁ ଭେଟନ୍ତି ନାହିଁ । କିନ୍ତୁ ଟ୍ରମ୍ପଙ୍କ କଥାରେ ସନ୍ଦେହ ସୃଷ୍ଟି ହେଉଛି । କାରଣ କରୋନା ପଜିଟିଭ ବାହାରିଥିବା କର୍ମଚାରୀ ଜଣକ ରାଷ୍ଟ୍ରପତିଙ୍କୁ ଖାଦ୍ୟ ଯୋଗାଇବା ଏବଂ ତାଙ୍କର ବିଛଣା ସଜାଡିବା କାର୍ଯ୍ୟରେ ନିୟୋଜିତ ଥିଲେ ବୋଲି ଜଣାପଡ଼ିଛି । ସେ ମଧ୍ୟ ଟ୍ରମ୍ପଙ୍କ ସାଙ୍ଗରେ ବିଭିନ୍ନ ସ୍ଥାନକୁ ଯାଇଥାନ୍ତି । ତେଣୁ ତାଙ୍କ ଯୋଗୁଁ ହ୍ୱାଇଟ ହାଉସର ସମସ୍ତ କର୍ମଚାରୀଙ୍କୁ କରୋନା ଡେଇଁଥାଇପାରେ ବୋଲି ସନ୍ଦେହ କରାଯାଉଛି । ହେଲେ ରାଷ୍ଟ୍ରପତି ଟ୍ରମ୍ପ ଏବଂ ଉପରାଷ୍ଟ୍ରପତି ମାଇକ ପେନସ କହିଛନ୍ତି, ସେମାନେ କ୍ୱାରେଣ୍ଟାଇନରେ ରହିବେ ନାହିଁ । କାରଣ ସେମାନେ ଅତି ଗୁରୁତ୍ୱପୂର୍ଣ୍ଣ ଦାୟିତ୍ୱରେ ଅଛନ୍ତି । ଟ୍ରମ୍ପ କହିଛନ୍ତି ଯେ ପୂର୍ବରୁ ହ୍ୱାଇଟ ହାଉସରେ ସମସ୍ତଙ୍କର ପ୍ରତି ସପ୍ତାହରେ ଥରେ ପରୀକ୍ଷା କରାଯାଉଥିଲା । ଏବେ ପ୍ରତିଦିନ ଏପରି ପରୀକ୍ଷା କରାଯିବ । ବୁଧବାର ଏବଂ ଗୁରୁବାର ତାଙ୍କର ପରୀକ୍ଷା କରାଯାଉଥିଲା । ତାହା ନେଗେଟିଭ ବାହାରିଛି ।