୨୩ ଫେବୃୟାରୀ ଭାରତ ବନ୍ଦକୁ ସମର୍ଥନ
ଭୁବନେଶ୍ୱର,(ଯୁଗାବ୍ଦ ନ୍ୟୁଜ୍) : ଗତ ୭ ଫେବୃୟାରୀ ୨୦୨୦ରିଖରେ ଭାରତର ସୁପ୍ରିମକୋର୍ଟଙ୍କ ପଦୋନ୍ନତି ମାମଲାର ବିଚାର ସମୟରେ ସଂରକ୍ଷଣ ସମ୍ପର୍କିତ ରାୟକୁ ଓଡ଼ିଶାର ଅନୁସୂଚିତ ଜାତି ଓ ଅନୁସୂଚିତ ଜନଜାତିର ବିଭିନ୍ନ ନେତା, ସଂଗଠକ, ବୁଦ୍ଧିଜୀବୀମାନଙ୍କ ଦ୍ୱାରା ନିନ୍ଦା କରାଯାଇଛି ଓ ଆସନ୍ତା ୨୩ ତାରିଖରେ ଭାରତ ବନ୍ଦ ଡ଼ାକରା ସମର୍ଥନରେ ଏହାକୁ ସଫଳ କରିବା ପାଇଁ ବିଭିନ୍ନ ଅଞ୍ଚଳରେ ହରତାଳ କରିବାକୁ ଆହ୍ୱାନ ଦିଆଯାଇଛି । ସୁପ୍ରିମକୋର୍ଟ ସମ୍ବିଧାନର ରକ୍ଷକ ଅଟେ । ସମ୍ବିଧାନର ଉପଯୁକ୍ତ ବ୍ୟାଖ୍ୟା ଓ ପ୍ରୟୋଗ କରିବା ହେଉଛି ନ୍ୟାୟପାଳିକାର ଦାୟିତ୍ୱ । ସମ୍ବିଧାନର ଧାରା ୧୨ ଠାରୁ ଧାରା ୩୫ ମୌଳିକ ଅଧିକାର ପ୍ରଦାନ କରିଥାଏ । କିନ୍ତୁ ସୁପ୍ରିମକୋର୍ଟ ୧୬ ଧାରାର ତର୍ଜମା କରି ‘ସଂରକ୍ଷଣ ମୌଳିକ ଅଧିକାର ନୁହେଁ ଏହା ରାଷ୍ଟ୍ର ତଥା ରାଜ୍ୟଗୁଡ଼ିକର ଇଚ୍ଛାଧୀନ ବିଷୟ’ ବୋଲି କହିଛନ୍ତି । ଏହି ରାୟ ସମ୍ବିଧାନର ମୌଳିକ ଲକ୍ଷ୍ୟ ‘ସମତା ଓ ନ୍ୟାୟ’ର ପରିପନ୍ଥୀ ବୋଲି ସେମାନେ ଅଭିହିତ କରିଛନ୍ତି । ଏହାଦ୍ୱାରା ଓଡ଼ିଶାର ପ୍ରାୟ ୨କୋଟି ଓ ଦେଶର ପ୍ରାୟ ୩୫ କୋଟି ଅନୁସୂଚିତ ଜାତି ଓ ଅନୁସୂଚିତ ଜନଜାତିର ବ୍ୟକ୍ତିମାନଙ୍କର ଅଧିକାର କ୍ଷୁର୍ଣ୍ଣ ହେବ । ଏଣୁ କେନ୍ଦ୍ର ସରକାର ତୁରନ୍ତ ଏହି ରାୟର ପୁନର୍ବିଚାର ନିମନ୍ତେ ସୁପ୍ରିମକୋର୍ଟରେ ଯାଚିକା ଦାଖଲ କରିବା ସହିତ ଜରୁରୀ ଅଧ୍ୟାଦେଶ ଜାରି କରିବାକୁ କିମ୍ବା ସଂସଦରେ ଏ ସମ୍ପର୍କରେ ବିଧେୟକ ଆଗତ କରି ଆଇନ୍ରେ ପରିଣତ କରିବାକୁ ଏବଂ ସଂରକ୍ଷଣ ଆଇନ୍କୁ ନବମ ଅନୁଚ୍ଛେଦରେ ସ୍ଥାନିତ କରିବାକୁ ଦାବି କରାଯାଇଛି । ଏହି ପରିପ୍ରେକ୍ଷୀରେ ଆସନ୍ତା ୨୩ ତାରିଖରେ ଭାରତବନ୍ଦ ଡ଼ାକରାକୁ ସମର୍ଥନ ଜଣାଇ ଏହାକୁ ସଫଳ କରିବାକୁ ରାଜ୍ୟର ବିଭିନ୍ନ ଅଞ୍ଚଳରେ ହରତାଳ କରିବାକୁ ଅହ୍ୱାନ କରାଯାଇଛି । ଏଥିସହିତ ରାଜ୍ୟର ସମସ୍ତ ବଣିକ ସଂଘ, ବସ୍ ମାଲିକ ସଂଘ, ଟ୍ୟାକ୍ସି ମାଲିକ ସଂଘ, ଅଟୋରିକ୍ସା ସଂଘ, ବଜାର କମିଟି, ବ୍ୟବସାୟୀ ସଂଘ, ଲେବର ୟୁନିୟନ, ସାମାଜିକ ସଂଗଠନ ତଥା ଜନସାଧାରଣ ପ୍ରମୁଖଙ୍କୁ ଏହି ବନ୍ଦକୁ ସମର୍ଥନ କରିବାକୁ ନିବେଦନ କରାଯାଇଛି ଓ ବ୍ୟବସାୟ ପ୍ରତିଷ୍ଠାନ, ଯାନବାହାନ ଚଳାଚଳ ବନ୍ଦ ରଖିବାକୁ ନିବେଦନ କରାଯାଇଛି । ଅନ୍ୟମାନଙ୍କ ମଧ୍ୟରେ ପୂର୍ବତନ କେନ୍ଦ୍ରମନ୍ତ୍ରୀ ଭଜମନ ବେହେରା, ଶେଖ ଅବଦୁଲ ୱାଲି, ସଂଗ୍ରାମ ମଲିକ, ବନ୍ଧୁ ସେଠୀ, ଅରବିନ୍ଦ ମଲିକ, ସୁନାକର ବେହେରା, ଲିଟୁ ଦାସ, ବିଜୟ କୁମାର ଭୋଇ, ସଞ୍ଜୟ କୁମାର ମଲ୍ଲିକ, ବାବାଜୀ ଚରଣ ଜେନା, ପ୍ରକାଶ ଚନ୍ଦ୍ର ପ୍ରଧାନ, ବ୍ରଜେନ୍ଦ୍ର ମଲ୍ଲିକ, ରବିନାରାୟଣ ସେଠୀ, ଲକ୍ଷ୍ମଣ ମଲିକ, ହରିଶ୍ଚନ୍ଦ୍ର ବେହେରା, ଦେବରାଜ ନାଏକ, ସାବ୍ୟସାଚୀ ମୁଦୁଲି, ସଦାଶିବ ନାଥ, ବୃନ୍ଦାବନ ନାୟକ, ଗୋପାଳ ଚନ୍ଦ୍ର ସାମଲ, ସନାତନ ଦାସ, ଦେବରାଜ ନାଏକ, ହେମନ୍ତ ଗୋଚ୍ଛାୟତ ପ୍ରମୁଖ ଏକ ପ୍ରେସ୍ ନୋଟ ଜରିଆରେ ନିବେଦନ କରିଛନ୍ତି ।
