୨୬ ଖଣ୍ଡ ଶାଳ ସାଇଜ ଓ ମିନିଟ୍ରକ ଜବତ

ବୁଗୁଡା,(ଅନିଲ କୁମାର ମହାରଣା): ବୁଗୁଡା ବନବିଭାଗର ଘନ ଘନ ଚଢ଼ାଉ ଜାରି ରହିଥିବା ବେଳେ କାଠ ମାଫିଆ ଓ ବନ୍ୟଜନ୍ତୁ ଶିକାରୀ ଗିରଫ ହେବା ସହ ବହୁ ବାଇକ ଓ ମିନି ଟ୍ରକ ଜବତ ହୋଇ ପାରିଛି । ଏହି କ୍ରମରେ ବୁଗୁଡା ବନ ବିଭାଗକୁ ପୁଣି ମିଳିଛି ଏକ ସଫଳତା । ୧୨ ତାରିଖ ରାତ୍ର ସାଢ଼େ ଏଗାରଟା ସମୟରେ ପ୍ରାୟ ୧୦ ଘନଫୁଟର ୨୬ ଖଣ୍ଡ ଶାଳ ସାଇଜ ଓଡ଼ି ୨୫ – ୪୪୭୯ ଟାଟା ମେଜିକ ମିନି ଟ୍ରକରେ ବୋଝେଇ ହୋଇ ଚୋରା ଚାଲାଣ ପାଇଁ ସଜବାଜ ହେଉଥିବା ବେଳେ ମଙ୍ଗଳପୁର ନିକଟରେ ବନ ବିଭାଗ ପକ୍ଷରୁ କାଠ ଓ ଗାଡି ଜବତ କରାଯାଇଛି । ଦକ୍ଷିଣ ଘୁମୁସର ବନଖଣ୍ଡ ଅଧିକାରୀ ସତ୍ୟନାରାୟଣ ବେହୁରାଙ୍କ ସୂଚନା ପ୍ରକାରେ ଓ ବୁଗୁଡା ବନାଞ୍ଚଳ ଅଧିକାରୀ ଫକୀର ଚରଣ ବେହେରାଙ୍କ ନିର୍ଦ୍ଦେଶ କ୍ରମେ ବାଲିପଦର ବନପାଳ ସୁନିତା ପାତ୍ରଙ୍କ ନେତୃତ୍ୱରେ ବାଲିପଦର ବନରକ୍ଷୀ କ୍ଷୀରୋଦ କୁମାର ଗୌଡ଼, ଜିଲିବା ବନରକ୍ଷୀ ପ୍ରଶାନ୍ତ କୁମାର ପୋଲାଇ, ଠଣାପଲ୍ଲୀ ବନରକ୍ଷୀ ରିଙ୍କୁ ସେଠୀ ଓ ପାରା ଫରେଷ୍ଟର କର୍ମଚାରୀ ବୃନ୍ଦ ମିଳିତ ଭାବେ ଚଢ଼ାଉ କରି କାଠ ଓ ଗାଡି ଜବତ କରିଥିବା ବେଳେ ଗାଡି ଚାଳକ ଫେରାର ହୋଇଯାଇଛି । ବୁଗୁଡା ବନ ବିଭାଗ ପକ୍ଷରୁ ଏକ ୟୁଡି କେଶ ରୁଜୁ କରାଯାଇଥିବା ବେଳେ ଗାଡି ମାଲିକଙ୍କ ନାମ ଜଣାପଡିବା ପରେ ତାଙ୍କ ନାମରେ କେଶ ରୁଜୁ କରାଯିବ ବୋଲି ବୁଗୁଡା ବନାଞ୍ଚଳ ଅଧିକାରୀ ଶ୍ରୀ ବେହେରା ପ୍ରକାଶ କରିଛନ୍ତି ।