୩୩ତମ କବି ବସନ୍ତ ମୁଦୁଲି ସ୍ମୃତି ସମାରୋହ
ଭଣ୍ଡାରିପୋଖରୀ, (ଦୁର୍ଯ୍ୟୋଧନ ଲେଙ୍କା) :କବି ଓ କବିତା ମଣିଷର ଅନ୍ତର୍ନିହିତ ଶକ୍ତିକୁ ବୃଦ୍ଧି କରିବା ସହ ସମାଜକୁ ଦିଗଦର୍ଶନ ଦେଇଥାଏ ବୋଲି ୩୩ତମ ବସନ୍ତ ମୁଦୁଲି ସ୍ମୃତି ସମାରୋହରେ ଅତିଥି ମାନେ ମତ ବ୍ୟକ୍ତ କରିଥିଲେ। ଏହି ଅବସରରେ ଭଣ୍ଡାରିପୋଖରୀ ବ୍ଲକ ବିଷ୍ଣୁପୁର ପଞ୍ଚାୟତ ଆଦମପୁର ଠାରେ ଅନୁଷ୍ଠିତ ହୋଇଥିବା ସ୍ମୃତି ସମାରୋହ ସଭାରେ ମୁଖ୍ୟ ଅତିଥି ଭାବେ କଥାଶିଳ୍ପୀ ଦାସ ବେନହୁର ଯୋଗଦେଇ କାର୍ଯ୍ୟକ୍ରମ କୁ ଉଦଘାଟନ କରିଥିଲେ। ପବିତ୍ର ପାଣିଗ୍ରାହୀଙ୍କ ସଭାପତିତ୍ୱରେ ଅନୁଷ୍ଠିତ ହୋଇଥିବା ସ୍ମୃତି ସମାରୋହରେ ସମ୍ମାନିତ ଅତିଥି ଭାବେ ବିଧାୟକ ପ୍ରଫୁଲ୍ଲ ସାମଲ, ଓଡିଶା ସାହିତ୍ୟ ଏକାଡେମୀ ସଭାପତି ହୃଷିକେଶ ମଲ୍ଲିକ, ନାଟ୍ୟକାର ସୁଧାକର ନନ୍ଦ, କଥାକାର ବିଜୟ ନାୟକ ପ୍ରମୁଖ ଯୋଗଦେଇ ସ୍ବର୍ଗତ ମୁଦୁଲିଙ୍କୁ ଶ୍ରଦ୍ଧାଞ୍ଜଳି ଦେବା ସହ ଓଡ଼ିଆ କବିତାର ଜୟଯାତ୍ରା ସମ୍ପର୍କରେ ବକ୍ତବ୍ୟ ପ୍ରଦାନ କରିଥିଲେ। ଅନୁଷ୍ଠାନ ପକ୍ଷରୁ ୨୦୧୭ପାଇଁ ଅଧ୍ୟାପକ କିଶୋର ପାଣିଗ୍ରାହୀ, ୨୦୧୮ପାଇଁ ଡ଼. ଶୁଭଶ୍ରୀ ଲେଙ୍କା, ୨୦୧୯ପାଇଁ ପ୍ରୀତିଧାରା ସାମଲ, ୨୦୨୦ପାଇଁ ଇପ୍ସିତା ଷଡଙ୍ଗୀ ଓ ୨୦୨୧ ପାଇଁ ବାଦଲ ମହାନ୍ତିଙ୍କୁ ବସନ୍ତ ମୁଦୁଲି ସ୍ମୃତି କବିତା ପୁରସ୍କାର ପ୍ରଦାନ କରାଯାଇଥିଲା। ଅତିଥି ମାନଙ୍କ ଉପସ୍ଥିତିରେ ପ୍ରାକ୍ତନ ସାଂସଦ ସ୍ବର୍ଗତ ବୈଷ୍ଣବ ପରିଡାଙ୍କ ଅନୁଦାନ ପାଣ୍ଠିରେ ନିର୍ମିତ ହୋଇଥିବା ପଠାଗାରକୁ ତାଙ୍କର ଧର୍ମପତ୍ନୀ ସ୍ବର୍ଣ୍ଣଲତା ପରିଡା ଲୋକାର୍ପଣ କରିଥିଲେ। କବି ନିରାକାର ଦାସ ଅତିଥି ପରିଚୟ, ଅଭିଜିତ ନାୟକ ସମ୍ପାଦକ ବିବରଣୀ ପ୍ରଦାନ କରିଥିବା ବେଳେ ଗାଳ୍ପିକ ରଜନୀକାନ୍ତ ମହାନ୍ତି ସମସ୍ତଙ୍କୁ ଧନ୍ୟବାଦ ଦେଇଥିଲେ। ସମାରୋହକୁ ବରିଷ୍ଠ ନାଗରିକ ଅରୁଣ କୁମାର ଖିଲାର, ସାମାଜିକ କର୍ମୀ ପାର୍ଥସାରଥୀ ମୁଦୁଲି, ଅମୂଲ୍ୟ ନାୟକ, ବିଜୟ ଖିଲାର, ଅମିତାଭ ଖିଲାର, ବିକାଶ କୁମାର ସାହୁ, ସୁଧାକର ମହାପାତ୍ର, ରବିନାରାୟଣ ପଣ୍ଡା, ଶାନ୍ତନୁ ମହାପାତ୍ର, ଅଭିଷେକ ଖିଲାର ପ୍ରମୁଖ ପରିଚାଳନା କରିଥିଲେ ।
