୩ ସପ୍ତାହ ପର୍ଯ୍ୟନ୍ତ ଅର୍ଣବଙ୍କୁ ଆଶ୍ୱସ୍ତି

ନୂଆଦିଲ୍ଲୀ: ରିପବ୍ଲିକ ଟିଭି ଚ୍ୟାନେଲରେ ସାମ୍ବାଦିକ ଅର୍ଣବ ଗୋସ୍ୱାମୀଙ୍କର ଟିପ୍ପଣୀ ଉପରେ ହୋଇଥିବା ମାମଲାରେ ୩ ସପ୍ତାହ ପର୍ଯ୍ୟନ୍ତ କେହି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିପାରିବେ ନାହିଁ ବୋଲି ମାନ୍ୟବର ସୁପ୍ରିମକୋର୍ଟ ଶୁକ୍ରବାର ତାଙ୍କ ଆଦେଶନାମାରେ ଦର୍ଶାଇଛନ୍ତି । ଏକ ଟିଭି ଚ୍ୟାନେଲରେ ଏକ ଆଲୋଚନା କାର୍ଯ୍ୟକ୍ରମରେ ମହାରାଷ୍ଟ୍ରର ପାଲଘର ଭିଡହିଂସାରେ ୩ ଜଣଙ୍କର ମୃତ୍ୟୁ ହୋଇଥିବା ପ୍ରସଙ୍ଗରେ ସେ ସୋନିଆ ଗାନ୍ଧିଙ୍କର ମାନହାନି କଲା ଭଳି ଟିପ୍ପଣୀ ଦେଇଥିବା ଅଭିଯୋଗ ହୋଇଥିଲା । ଏଥିପାଇଁ ମହାରାଷ୍ଟ୍ର, ଛତିଶଗଡ଼, ମଧ୍ୟପ୍ରଦେଶ, ରାଜସ୍ଥାନ, ତେଲେଙ୍ଗାନା ଏବଂ ଜମ୍ମୁ ଓ କାଶ୍ମୀରରେ ଅର୍ଣବଙ୍କ ବିରୋଧରେ ମାମଲା ରୁଜୁ ହୋଇଛି । ନାଗପୁରର ସଦର ଥାନାରେ ହୋଇଥିବା ଏତଲା ବ୍ୟତୀତ ଅନ୍ୟ ସମସ୍ତ ଏତଲାକୁ କୋର୍ଟ ସ୍ଥଗିତ ରଖିଛନ୍ତି ଏବଂ ସମ୍ପୃକ୍ତ ଏତଲାଟିକୁ ତଦନ୍ତ ପାଇଁ ନାଗପୁରରୁ ମୁମ୍ବାଇକୁ ହସ୍ତାନ୍ତର କରାଯାଇଛି । ଗୋଟିଏ ମାମଲାରେ ଏକାଧିକ ସ୍ଥାନରେ ତଦନ୍ତ ହୋଇପାରିବ ନାହିଁ ବୋଲି କୋର୍ଟ ସ୍ପଷ୍ଟ କରିଛନ୍ତି । ଏହା ସହିତ ଅର୍ଣବ ଏବଂ ତାଙ୍କ ଟିଭି କାର୍ଯ୍ୟାଳୟକୁ ସୁରକ୍ଷା ଯୋଗାଇ ଦେବାକୁ ମୁମ୍ବାଇ ପୁଲିସ କମିଶନରଙ୍କୁ କୋର୍ଟ ଆଦେଶ ଦେଇଛନ୍ତି । ଅଭିଯୋଗ ରହିଛି ଯେ ଏପ୍ରିଲ ୨୧ ତାରିଖରେ ରିପବ୍ଲିକ ଟିଭିର ପ୍ରତିଷ୍ଠାତା ସାମ୍ବାଦିକ ଅର୍ଣବ କିଛି ଘୃଣାସୂଚକ ମନ୍ତବ୍ୟ ଦେବା ସହ କଂଗ୍ରେସ ସଭାପତି ସୋନିଆଙ୍କ ମାନହାନି କଲା ଭଳି ମନ୍ତବ୍ୟ ଦେଇଥିଲେ । ଗୁରୁବାର ଅର୍ଣବ ସମ୍ପୃକ୍ତ ଏତଲାଗୁଡ଼ିକ ସ୍ଥଗିତ ରଖିବାକୁ ସୁପ୍ରିମକୋର୍ଟରେ ଆବେଦନ କରିଥିଲେ ।