୩.୫୦ ଲକ୍ଷ ଟଙ୍କାର ମଦ ଓ ଗଞ୍ଜେଇ ଜବତ
ଛତ୍ରପୁର, : ଗଞ୍ଜାମ ଅବକାରୀ ଜିଲ୍ଲା ଅଧୀନ ବୁଢାଆମ୍ବ, ରାଣୀପଡା, କବିସୂର୍ଯ୍ୟନଗର,ଖଲ୍ଲିକୋଟ, ପୋଲସରା ଓ ସୋରଡା ଅଞ୍ଚଳରେ ବେଆଇନ ମଦ ଓ ଗଞ୍ଜେଇ ଚାଲଣ ଉପରେ ଚଢଉ ହୋଇଥିଲା । ସାଢେ ତିନିଲକ୍ଷ ଟଙ୍କାର ଚୋରା ମଦ ଓ ଗଞ୍ଜେଇ ଜବତ କରିବା ସହ ୧୮ ଜଣ ଅଭିଯୁକ୍ତକୁ ଗିରଫ କରାଯାଇଛି । ଗଞ୍ଜାମ ଜିଲ୍ଲାପାଳ ଓ ଏସ୍ପିଙ୍କ ନିର୍ଦ୍ଦେଶ କ୍ରମେ ୧୨ ଓ ୧୩ ଦୁଇଦିନ ଧରି ଅବକାରୀ ଓ ପୁଲିସ ବିଭାଗର ମିଳିତ ଚଢାଉ ହୋଇଥିଲା । ଗଞ୍ଜାମ ଅବକାରୀ ଅଧୀକ୍ଷକ ରାଜେନ୍ଦ୍ର କୁମାର ଭତ୍ରାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଉପଅଧୀକ୍ଷକ ଅଭିରାମ ବେହେରା ଓ ସଂପକ୍ତ ଅଞ୍ଚଳର ଅବକାରୀ ଓ ଥାନାର ପୁଲିସ କର୍ମଚାରୀଙ୍କ ମିଳିତ ସହଯୋଗରେ ୬୬୪୦ ଲିଟର ପୋଚ ମଦ, ୩୩୯ ଲିଟର ରନ୍ଧା ଭାଟି ମଦ, ୩୦ ଲିଟର ବିଦେଶୀ ମଦ ଏବଂ ୨୩.୬୦୦ କିଲୋଗ୍ରାମ ଗଞ୍ଜେଇ ଏବଂ ଗୋଟିଏ ଦୁଇଚକିଆ ଗାଡିକୁ ଜବତ କରାଯାଇଥିଲା ।
