ପିପୁଲସ କଲେଜର ୪୮ ତମ ପ୍ରତିଷ୍ଠା ଦିବସ

ବୁଗୁଡ଼ା, (ଅନୀଲ କୁମାର ମହାରଣା) : ଗଞ୍ଜାମ ଜିଲ୍ଲାର ବୁଗୁଡା ପିପୁଲସ କଲେଜ ୧୯୭୮ ମସିହା ଜୁଲାଇ ୩୦ ତାରିଖ ଦିନ ପ୍ରତିଷ୍ଠିତ ହୋଇଥିବା ବେଳେ ୪୭ ବର୍ଷ ପୂର୍ଣ୍ଣ ହୋଇ ୪୮ ବର୍ଷରେ ପଦାର୍ପଣ କରିଅଛି। କଲେଜର ଏହି ୪୮ ତମ ପ୍ରତିଷ୍ଠା ଦିବସ ଉପଲକ୍ଷେ କଲେଜର ସମ୍ମିଳନୀ କକ୍ଷରେ ପ୍ରିନ୍ସପାଲ ଡକ୍ଟର ପୁରୁଷୋତ୍ତମ ମିଶ୍ରଙ୍କ ଅଧ୍ୟକ୍ଷତାରେ ଜୁଲାଇ ୩୦ ତାରିଖ ଦିନ ପ୍ରତିଷ୍ଠା ଦିବସ ଅନୁଷ୍ଠିତ ହୋଇଯାଇଛି। ଆଇ.କିୟୁ.ଏ.ସି. କୋଅଡିନେଟର ଅଧ୍ୟାପକ ସୁଶାନ୍ତ କୁମାର ସାହୁ ସଂଯୋଜନା କରିଥିବା ବେଳେ କୋ-କୋଅଡିନେଟର ଅଧ୍ୟାପକ ଆତ୍ମ ପ୍ରକାଶ ନାୟକ କଲେଜର ସଂକ୍ଷିପ୍ତ ଇତିହାସ ଉପସ୍ଥାପନ କରିଥିଲେ। ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ କଲେଜର ପ୍ରତିଷ୍ଠାତା ସଦସ୍ୟ ଡାକ୍ତର ଦୟାନିଧି ରାଉତ ଯୋଗଦେଇଥିବା ବେଳେ ମୁଖ୍ୟ ବକ୍ତଭାବେ ସେବା ନିବୃତ ଅଧ୍ୟକ୍ଷ ତଥା ବିଶିଷ୍ଟ ସାହିତ୍ୟିକ ଡକ୍ଟର ଶ୍ୟାମା ପ୍ରସାଦ ମିଶ୍ର ଓ ସମ୍ମାନିତ ଅତିଥି ଭାବେ କଲେଜର ଭାଇସ-ପ୍ରିନ୍ସପାଲ ହରିକୃଷ୍ଣ ନାୟକ ଯୋଗଦେଇଥିଲେ। ମୁଖ୍ୟ ଅତିଥି ଡାକ୍ତର ଦୟାନିଧି ରାଉତ କୃତିତ୍ୱ ହାସଲକାରୀମାନଙ୍କୁ ଅଭିନନ୍ଦନ ଜଣାଇଥିଲେ ଏବଂ କଲେଜର ଅନ୍ତର୍ଭୁକ୍ତ ଶିକ୍ଷାଗତ ସଂସ୍କୃତିକୁ ପଦକ୍ଷେପକୁ ପ୍ରଶଂସା କରିଥିଲେ। ସେ ମାଳିଝୋଳା ମନ୍ଦିର ନିକଟରେ ଥିବା କଲେଜ ଜମିକୁ ଶୀଘ୍ର ଦଖଲ କରିବା ଉପରେ ଗୁରୁତ୍ୱାରୋପ କରିଥିଲେ। ଭବିଷ୍ୟତର ଅଭିବୃଦ୍ଧି ପାଇଁ କଲେଜର ଶିକ୍ଷାଗତ ଏବଂ ପ୍ରସାରଣ କାର୍ଯ୍ୟକଳାପକୁ ବିସ୍ତାର କରିବାକୁ ପ୍ରସ୍ତାବ ଦେଇଥିଲେ। କଲେଜର ଉପାଧ୍ୟକ୍ଷ ହରିକୃଷ୍ଣ ନାୟକ ମଧ୍ୟ ସଭାକୁ ସମ୍ବୋଧିତ କରି ଅନୁଷ୍ଠାନର ସହଯୋଗ ମନୋଭାବକୁ ପ୍ରଶଂସା କରିଥିଲେ। ମୁଖ୍ୟ ବକ୍ତା ଡକ୍ଟର ଶ୍ୟାମା ପ୍ରସାଦ ମିଶ୍ର ତାଙ୍କ ଭାଷଣରେ ଛାତ୍ରଛାତ୍ରୀମାନଙ୍କୁ ବୁଦ୍ଧି ଓ ସାଧୁତା ଉଭୟଙ୍କୁ ପୋଷଣ କରିବାକୁ ଆହ୍ୱାନ ଦେଇଥିଲେ। ପ୍ରକୃତ ସଫଳତା ସମାଜରେ ଅର୍ଥପୂର୍ଣ୍ଣ ଯୋଗଦାନ ଦେବାରେ ନିହିତ ବୋଲି ପ୍ରକାଶ କରିଥିଲେ। କଲେଜର ପ୍ରତିଷ୍ଠାତା ସଦସ୍ୟ ବୃନ୍ଦ, ତତ୍କାଳୀନ ସ୍ଥାନୀୟ ବିଧାୟକ ଉଦୟ ନାଥ ନାୟକ ଓ ଯୁବ ଗୋଷ୍ଠୀଙ୍କ ଅବଦାନକୁ ପ୍ରଶଂସା କରାଯାଇଥିଲା। ଏହି ଅବସରରେ କଲେଜର ବିଭିନ୍ନ ବିଭାଗରେ ସର୍ବାଧିକ ମାର୍କ ରଖିଥିବା ଛାତ୍ରଛାତ୍ରୀଙ୍କ ସମେତ କ୍ରୀଡା, ସେବା ଓ ସାଂସ୍କୃତିକ କ୍ଷେତ୍ରରେ ଉଲ୍ଲେଖନୀୟ ସଫଳତା ହାସଲ କରିଥିବା ଛାତ୍ରଛାତ୍ରୀ ବୃନ୍ଦଙ୍କୁ ପୁରସ୍କାର ପ୍ରଦାନ କରାଯାଇଥିଲା। ଅଧ୍ୟାପକ ଡକ୍ଟର ପ୍ରଦୀପ କୁମାର ଦାଶ ଅତିଥି ପରିଚୟ ପ୍ରଦାନ କରିଥିବା ବେଳେ ଆଇକିୟୁଏସି ସଂଯୋଜକ ଅଧ୍ୟାପକ ସୁଶାନ୍ତ କୁମାର ସାହୁ ଧନ୍ୟବାଦ ଅର୍ପଣ କରିଥିଲେ। କାର୍ଯ୍ୟକ୍ରମରେ ଅଧ୍ୟାପକ, ଅଧ୍ୟାପିକା, କର୍ମଚାରୀ ଓ ଛାତ୍ରଛାତ୍ରୀ ବୃନ୍ଦ ଯୋଗଦେଇ ସହଯୋଗ କରିଥିଲେ।