ପୋଖରୀ ପାଣିରେ ବୁଡି ୨ ଭଉଣୀ ମୃତ

ହିଞ୍ଜିଳିକାଟୁ, (ଶେଷଦେବ ସାହୁ): ଦୁନିଆରେ ପାଦ ଥାପିବା ପୂର୍ବରୁ ସାନ ଓ ବଡ଼ ୨ ଜଣ କଁଅଳ ଶିଶୁ କନ୍ୟାଙ୍କ ଅକାଳ ବିୟୋଗ ଘଟିଛି। କେହି କିଛି ଭାବିବା ପୂର୍ବରୁ ପାଣିରେ ବୁଡି ୨ ଅଲିଅଳ ଭଉଣୀଙ୍କ ପ୍ରାଣବାୟୁ ଚାଲି ଯାଇଛି।ଏଭଳି ଏକ ଛାତି ଥରା ଘଟଣା ସମସ୍ତଙ୍କୁ ସ୍ତମ୍ବିଭୁତ କରିଛି। ଘଟଣାଟି ରବିବାର ସକାଳେ ହିଞ୍ଜିଳି ଥାନା କିର୍ତ୍ତୀପୁର ଗ୍ରାମ ପୋଖରୀ ପାଣିରେ ବୁଡି ୧୦ବର୍ଷ ଓ ୭ ବର୍ଷର ୨ ଭଉଣୀଙ୍କ ଜୀବନ ଦୀପ ଲିଭି ଯାଇଛି। ମୃତକା ମାନେ ହେଲେ କବିସୂର୍ଯ୍ୟନଗର ଥାନା ଜରଡ ଗ୍ରାମର ଅବକାଶ ରାଉତଙ୍କ କନ୍ୟା ରୋଷନୀ ରାଉତ (୧୦) ଓ ସାନ ଝିଅ ସନ୍ଧ୍ୟାରାଣୀ ରାଉତ (୭) । ପ୍ରକାଶ ଯେ, ଜରଡ ଗ୍ରାମର ଅବକାଶ ରାଉତଙ୍କ ପାରିବାରିକ କଳହ ଯୋଗୁଁ ସ୍ତ୍ରୀ ଓ ୨ ଝିଅ ଦୀର୍ଘ ଦିନ ଧରି ଅଜା ଘର ଗ୍ରାମ ହିଞ୍ଜିଳି ଥାନା କିର୍ତ୍ତୀପୁର ଗ୍ରାମରେ ରହି ଆସୁଥିଲେ। ରବିବାର ୨ ଭଉଣୀ ସନ୍ଧ୍ୟା ଓ ରୋଷନୀ ଗାଧୋଇବା ପାଇଁ ଅଜା ନାର୍ସୁ ପୋଲାଇଙ୍କ ସହ ଗ୍ରାମ ପୋଖରୀକୁ ଆସିଥିଲେ। ୨ ଭଉଣୀଙ୍କୁ ଗାଧୋଇବା ପରେ ପୋଖରୀ କୁଳରେ ଛିଡା କରି ଅଜା ପୋଷାକ ସଫା କରିବା ପାଇଁ ପୋଖରୀକୁ ଯାଇଥିଲେ । ଏହି ସମୟରେ ୨ ଭଉଣୀ ଗାଧୋଇବା ପାଇଁ ପୁଣି ପୋଖରୀ ପାଣି ଭିତରକୁ ଯାଇ ଅସାବଧାନତା ବଶତଃ ପୋଖରୀ ପାଣିରେ ବୁଡି ଯାଇଥିଲେ। ଅଜା ପୋଷାକ ସଫା କରିବା ପରେ  ୨ ନାତୁଣୀ ପୋଖରୀ ନିକଟରେ ନଥିବା ଦେଖି ଘରକୁ ଫେରି ଯାଇଥିବା ସନ୍ଦେହ କରି ଘରକୁ ଫେରିଥିଲେ । ଘରକୁ ଫେରିବା ପରେ ଘର ମଧ୍ୟରେ ୨ ନାତୁଣୀଙ୍କୁ ନ ପାଇ ଗ୍ରାମବାସୀଙ୍କ ସହାୟତାରେ ପୋଖରୀ ପାଣିରେ ଖୋଜାଖୋଜି କରିଥିଲେ। ପୋଖରୀ ପାଣି ଭିତରୁ ଗ୍ରାମବାସୀ ୨ ଭଉଣୀଙ୍କ ମୃତ ଦେହକୁ ଉଦ୍ଧାର କରିଥିଲେ। ଖବର ପାଇ ହିଞ୍ଜିଳି ପୁଲିସ ଘଟଣା ସ୍ଥଳରେ ପହଞ୍ଚି ୨ ଭଉଣୀଙ୍କ ମୃତ ଦେହକୁ ଜବତ କରିଛି। ଏ ନେଇ ହିଞ୍ଜିଳି ଥାନାରେ କେସ ନମ୍ବର ୩୨/୨୩  ଓ ୩୩/୨୩ରେ ୨ଟି ପୃଥକ ଅପମୃତ୍ୟୁ ମାମଲା ରୁଜୁ କରି ବ୍ୟବଚ୍ଛେଦ ସକାଶେ ବ୍ରହ୍ମପୁର ବଡ ଡାକ୍ତରଖାନାକୁ ପଠାଇ ଘଟଣାର ତଦନ୍ତ ଚଳାଇଛି।ଘଟଣା ପରେ ପରିବାରରେ କାନ୍ଦ ବୋବାଳିରେ ଫାଟି ପଡୁଥିବା ବେଳେ ଗ୍ରାମରେ ଶୋକର ଛାୟା ଖେଳିଯାଇଛି।