ପୋଲିସ ପେଟ୍ରୋଲିଂ ଗାଡି ଧକ୍କାରେ ଗାଈ ମୃତ

ବନ୍ତ, (ଚାନ୍ଦିନୀ ମହାନ୍ତି):ଶୁକ୍ରବାର ରାତିରେ ବନ୍ତ ଥାନା ଅଧିନ ସେଣ୍ଢତୀରା ବଜାରରେ ପୋଲିସ ପେଟ୍ରୋଲିଂ ଗାଡି ଧକ୍କାରେ ଗୋଟିଏ ଗାଈର ମୃତ୍ୟୁ ଘଟିଥିବା ଜଣାଯାଇଛି । ଡ୍ରାଇଭରଙ୍କ ବେପରୁଆ ଗାଡି ଚାଳନା ଯୋଗୁ ଏଭଳି ଦୁର୍ଘଟଣା ଘଟିଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି । ଶନିବାର ସକାଳେ ମୃତ ଗାଈଟି ରାସ୍ତା ଉପରେ ପଡିଥିବା ଦେଖି ଶ୍ରୀ ଗଣେଶ ୟୁଥ୍ କ୍ଲବର ସଦସ୍ୟଙ୍କ ସମେତ ବଜାରର କିଛି ସ୍ୱେଚ୍ଛାସେବୀ ଯୁବକ ମୃତ ଗାଈଟିକୁ ରାସ୍ତାରୁ ଉଠାଇ ସତ୍କାର କରିଥିଲେ । ପ୍ରକାଶ ଯେ, ଗତ କିଛି ଦିନ ଧରି ସ୍ଥାନୀୟ ଅଞ୍ଚଳର କିଛି ଗୋରୁଗାଈ ରାତିରେ ଘରକୁ ନଯାଇ ସେଣ୍ଢତୀରା ବଜାରରେ ଶୋଇଆସୁଛନ୍ତି । ଶୁକ୍ରବାର ବିଳମ୍ବିତ ରାତିରେ ଗୋଟିଏ ଗାଈ ବଜାର ରାସ୍ତା ପାଶ୍ୱର୍ରେ ଶୋଇଥିବା ବେଳେ ଥାନା ପେଟ୍ରୋଲିଂ ଗାଡି ତାକୁ ଧକ୍କା ଦେଇ ପଳାଇ ଯାଇଥିଲା । ପରେ ଗୁରୁତର ଆହତ ଗାଈଟି ମୃତ୍ୟୁ ବରଣ କରିଥିଲା । ଦୁର୍ଘଟଣା ସମୟରେ ବାହାରକୁ ଉଠିଥିବା ଜଣେ ଯୁବକ ଏହା ଦେଖିଥିଲେ ମଧ୍ୟ ପୋଲିସ ଗାଡି ଜାଣି କିଛି କହିନଥିଲେ । ଏହାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି ।