ଅଙ୍ଗନବାଡ଼ି କେନ୍ଦ୍ର ଉଦଘାଟନ କଲେ ସଦର ବିଧାୟକ ମାନସ କୁମାର ଦତ୍ତ

ବାଲେଶ୍ୱର, (ସରୋଜ ପଣ୍ଡା):ସଦର ନିର୍ବାଚନମଣ୍ଡଳୀ ଅନ୍ତର୍ଗତ ପରିଖି ପଂଚାୟତର ହଣାଗୋଠ ଠାରେ ଏକ ଅଙ୍ଗନବାଡ଼ି କେନ୍ଦ୍ର ଉଦଘାଟିତ ହୋଇଯାଇଛି । ସଦର ବିଧାୟକ ମାନସ କୁମାର ଦତ୍ତ ମୁଖ୍ୟଅତିଥି ଭାବେ ଯୋଗଦେଇ କେନ୍ଦ୍ରକୁ ଉଦଘାଟନ କରିବା ସହିତ ଶିଶୁମାନଙ୍କ ପ୍ରାରମ୍ଭିକ ଶିକ୍ଷା କ୍ଷେତ୍ରରେ ଅଙ୍ଗନବାଡ଼ି କେନ୍ଦ୍ରଗୁଡିକ ବେଶ ଉପାଦେୟ ସାବ୍ୟସ୍ତ ହୋଇପାରିଛି ବୋଲି ମତପ୍ରକାଶ କରିଥିଲେ । ତେବେ ଶିଶୁମାନଙ୍କ ଯତ୍ନ ସହିତ ଉତ୍ତମ ଶିକ୍ଷା ପ୍ରଦାନ ପାଇଁ ଅଙ୍ଗନବାଡ଼ି କର୍ମୀ ଓ ସହାୟିକାଙ୍କ ଭୂମିକା ଗୁରୁତ୍ୱପୂର୍ଣ୍ଣ ହୋଇଥିବା ବେଳେ ସେମାନେ ଏହି ଦାୟିତ୍ୱ ସୂଚାରୁରୁପେ ତୁଲାଇବାକୁ ବିଧାୟକ ଶ୍ରୀ ଦତ୍ତ ପରାମର୍ଶ ଦେଇଥିଲେ । ତେବେ ଏହି ଅଙ୍ଗନବାଡ଼ି କେନ୍ଦ୍ର ନିର୍ମାଣ ପାଇଁ ତାଙ୍କ ପିତା ସ୍ୱର୍ଗତଃ ବିଧାୟକ ମଦନ ମୋହନ ଦତ୍ତ ଶୁଭ ଦେଇଥିବା ବେଳେ ତାହାକୁ ଉଦଘାଟନ କରି ସେ ଗୌରବ ଅନୁଭବ କରୁଛନ୍ତି ବୋଲି ଶ୍ରୀ ଦତ୍ତ ଏହି ଅବସରରେ କହିଥିଲେ । ପରିଖି ପଂଚାୟତର ସରପଂଚ କାର୍ତ୍ତିକ ଚନ୍ଦ୍ର ରାଉତ ଓ ସ୍ଥାନୀୟ ୱାର୍ଡ ମେମ୍ବର ମାମୁନୀ ହାତୀ ଉଦଘାଟନ କାର୍ଯ୍ୟକ୍ରମରେ ଉପସ୍ଥିତ ଥିଲେ । ଏହି ଅଙ୍ଗନବାଡି ନିର୍ମାଣ ପ୍ରକଳ୍ପ ୨୦୦୯ ମସିହାରେ ଆରମ୍ଭ ହୋଇଥିବା ବେଳେ ଏଥିପାଇଁ ୭ଲକ୍ଷ ଟଙ୍କାର ବ୍ୟୟ ଅଟକଳ କରାଯାଇଥିଲା । ଏହି କେନ୍ଦ୍ରରେ ମୋଟ ୩୦ଜଣ ଶିଶୁ ପଢିବା ନେଇ ବ୍ୟବସ୍ଥା ହୋଇଥିବା ସମନ୍ୱିତ ଶିଶୁ ବିକାଶ ବିଭାଗ ପକ୍ଷରୁ ଜଣାଯାଇଛି । ଅଙ୍ଗନବାଡ଼ି କର୍ମୀ ସୁସ୍ମିତା ଜେନା ଉପସ୍ଥିତ ରହି ସମସ୍ତ କାର୍ଯ୍ୟ ପରିଚାଳନା କରିଥିଲେ । ଅନ୍ୟମାନଙ୍କ ମଧ୍ୟରେ ବରିଷ୍ଠ ନେତା ଗୌରାଙ୍ଗ ଦାସ, ଅନନ୍ତ ନାୟକ, ଅନିଲ ପାତ୍ର, ଅମଲ ପ୍ରଧାନ, ଅମଲ ପରିଡ଼ା, ରାଜୀବ କର, ବୁଲୁ ସେନାପତି, ସରୋଜ ପରିଡା, ମମତା ପ୍ରଧାନ ପ୍ରମୁଖଙ୍କ ସମେତ ସ୍ଥାନୀୟ ଅଂଚଳବାସୀ ଏହି ଉଦଘାଟନୀ ଉତ୍ସବରେ ଉପସ୍ଥିତ ଥିଲେ ।