ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ ନାଉଗାଁ ଶାଖା ପକ୍ଷରୁ ‘ମା’ ପାଇଁ ଗଛ ଟିଏ ‘କାର୍ଯ୍ୟକ୍ରମ

ନାଉଗାଁ, (ଯୁଗାବ୍ଦ ନ୍ୟୁଜ):ଜଗତସିଂହପୁର ଜିଲ୍ଲା ନାଉଗାଁ ବ୍ଳକ ଅନ୍ତର୍ଗତ ଷ୍ଟେଟ ବ୍ୟାଙ୍କ ଅଫ ଇଣ୍ଡିଆର ନାଉଗାଁ ଶାଖା ପକ୍ଷରୁ ମା’ ପାଇଁ ଗଛ ଟିଏ କାର୍ଯ୍ୟକ୍ରମ ଗୁରୁବାର ଅନୁଷ୍ଠିତ ହୋଇଯାଇଛି । ବ୍ୟାଙ୍କ ଶାଖା ପରିଚାଳକ ପ୍ରଣୟ କୁମାର ସାମଲଙ୍କ ନେତୃତ୍ୱରେ ନୂଆଗାଁ ପଂଚାୟତ ଗନ୍ଧଣ ଗ୍ରାମର ଆଖଣ୍ଡଳମଣୀ ମନ୍ଦିର ପରିସର, ରୋହିଆ ପଂଚାୟତର ଅମୃତ ସରୋବର ଚତୁଃପାଶ୍ୱର୍ରେ ବିଭିନ୍ନ ପ୍ରକାର ଔଷଧୀୟ ଚାରାରୋପଣ କରାଯାଇଥିଲା । ପରିବେଶରୁ ଦିନକୁ ଦିନ ବୃକ୍ଷ ହ୍ରାସ ପାଉଥିବା ବେଳେ ପାଣିପାଗରେ ଅନିୟମିତତା ଦେଖାଦେଉଛି । ଏତଦ୍ ବ୍ୟତିତ ଗ୍ରାମାଂଚଳରୁ କ୍ରମଶଃ ଔଷଧୀୟ ବୃକ୍ଷ ଲୋପ ପାଇବାକୁ ବସିଲାଣି । ପରିବେଶକୁ ସୁସ୍ଥ ସୁନ୍ଦର କରିବା ପାଇଁ ବୃକ୍ଷର ଆବଶ୍ୟକତା ରହିଛି । ତେଣୁ ଆମେ ଯେପରି ନିଜ ମାକୁ ଭଲ ପାଇ ଥାଉ ଓ ମା ଯେପରି ଶିଶୁର ଯତ୍ନ ନିଏ , ସେହିପରି ଭାବେ ସମସ୍ତେ କିଛି ନା କିଛି ବୃକ୍ଷ ରୋପଣ କରି ନିଜ ମା ପରି ଯତ୍ନନେବାକୁ ଶାଖା ପରିଚାଳକ ସାମଲ ଆହ୍ୱାନ ଦେଇଥିଲେ । ଏହି କାର୍ଯ୍ୟକ୍ରମରେ ବ୍ୟାଙ୍କର କର୍ମଚାରୀ ଶିବଶଙ୍କର ସାହିଲ, ଅନନ୍ତ ବିଶ୍ୱାଳ, ଇତିଶ୍ରୀ ସ୍ୱାଇଁ ପ୍ରମୁଖ ଯୋଗ ଦେଇଥିବା ବେଳେ ଗ୍ରାହକ ସେବା କେନ୍ଦ୍ରର ପରିଚାଳକ ଅନିଲ କୁମାର ଲେଙ୍କା ପରିଚାଳନା କରିଥିଲେ ।