ହାଟଡିହି ବିଡିଓଙ୍କ ବିରୁଦ୍ଧରେ ଥାନାରେ ରୁଜୁ ହେଲା ମାମଲା

ହାଟଡିହି, (ବିକାଶ ବିଶ୍ୱାଳ):ହାଟଡିହି ବ୍ଳକର ବିଡିଓଙ୍କ ବିରୁଦ୍ଧରେ ନନ୍ଦିପଦା ଥାନାରେ ଏକ ମାମଲା ରୁଜୁ ହୋଇଛି । ପନ୍ଦାଡୋ ଗ୍ରାମର କେଶବ ଯେନା ନାମକ ଜଣେ ବ୍ୟକ୍ତିଙ୍କ ଅଭିଯୋଗ ଆଧାରରେ ନନ୍ଦିପଦା ପୁଲିସ୍ ଥାନା କେସନଂ ୨୫୭/ ୨୦୨୪ ରେ ମାମଲା ରୁଜୁ କରିଛି । କେଶବ ଯେନାଙ୍କ ଅଭିଯୋଗ ଅନୁଯାଇ ସେ ଓ ଗ୍ରାମର ଆଉ କିଛି ଲୋକ ମିଶି ପୂର୍ବତନ ବିଧାୟକଙ୍କ ଅନୁଦାନ ପାଣ୍ଠିରେ ପନ୍ଦାଡୋ ହାଇସ୍କୁଲରେ ଏକ ଶ୍ରେଣୀ ଗୃହ ନିର୍ମାଣ କାମ କରିଥିଲେ । ୩ ମାସ ହେଲା ଘର କାମ ସମ୍ପୁର୍ଣ୍ଣ କରିଥିଲେ ମଧ୍ୟ ମାସ ମାସ ହେଲା ଏହାର ବିଲ ହେଉନାହିଁ । ବାରମ୍ବାର ବ୍ଲକକୁ ଦୌଡି ଦୌତି ନିରାଶ ହେଉଛନ୍ତି । ଗତ ୬ ତାରିଖ ଦିନ ବିଡିଓ ରାମଚଣ୍ଡୀ ଯାଇଥିବା କେଶବ ଓ ତାର ଅନ୍ୟ ସାଙ୍ଗମାନେ ବିଡିଓଙ୍କୁ ଏ ସମ୍ପର୍କରେ ପଚାରିବାରୁ ବିଡିଓ ତାଙ୍କୁ ବିରକ୍ତି ହେବା ସହ ମୁଁ ବନ୍ଧୁବାନ୍ଧବ ଧରି ବୁଲିବାକୁ ଆସିଛି ଏଠି ଏପରି ଅଭିଯୋଗ କାହିଁକି କରୁଛ କହି ଜାତିଆଣ ଆକ୍ଷେପ କରି ଗାଳି ଗୁଲଜ କରିଥିବା ଓ ଧମକ ଚ଼ମକ ଦେଇଥିବା ନେଇ ନନ୍ଦିପଦା ଥାନାରେ ଲିଖିତ ଅଭିଯୋଗ କରିଥିଲେ । ଏ ସମ୍ପର୍କରେ ବିଡିଓ ସୌମ୍ୟଶ୍ରୀ ପାଣିଗ୍ରାହୀ କହିଛନ୍ତି ଯେ ଏପରି ଅଭିଯୋଗ ସମ୍ପୁର୍ଣ୍ଣ ଭିତ୍ତିହୀନ । ଏଥିରେ କୌଣସି ସତ୍ୟତା ନାହିଁ । ଯେଉଁ ଲୋକ ଅଭିଯୋଗ କରିଛନ୍ତି ମୁଁ ତାଙ୍କୁ କେବେ ଦେଖିନାହିଁ । ଅନ୍ୟ ପକ୍ଷରେ କାମର ବିଲ ଯନ୍ତ୍ରୀ କରନ୍ତି । ବିଭିନ୍ନ ସ୍ତର ଦେଇ ଶେଷରେ ମୋ ପାଖକୁ ଆସେ l ସେପରି କିଛି ବିଲ୍ ମୋ ପାଖକୁର୍ବ ଆସିନି । ତେଣୁ ଏହା ମନଗଢା କାହାଣି । ପୁଲିସ ତଦନ୍ତ କଲେ ସବୁ ସତ୍ୟାସତ୍ୟ ଜଣା ପଡିବ ବୋଲି ବିଡିଓ କହିଛନ୍ତି ।