୬୯ ତମ ଜିଲ୍ଲା ସ୍ତରୀୟ ବିଦ୍ୟାଳୟ ସମୂହ ବାଳକ ବାଳିକା କ୍ରିକେଟ ଉଦଘାଟିତ

ହାଟଡିହି (ଓ୍ବାଇଏନଏସ): ହାଟଡିହି ବ୍ଲକ ସୁନ୍ଦରାପାଳ ଠାରେ ୬୯ ତମ କେନ୍ଦୁଝର ଜିଲ୍ଲା ସ୍ତରୀୟ ବିଦ୍ୟାଳୟ ସମୂହ ୧୭ ବର୍ଷରୁ କମ ବାଳକ ବାଳିକା କ୍ରିକେଟ ଉଦଘାଟିତ ହୋଇଯାଇଛି। ଜିଲ୍ଲା ଶିକ୍ଷା ଅଧିକାରୀ ପୂର୍ଣ୍ଣ ଚନ୍ଦ୍ର ବରିହାଙ୍କ ସଭାପତିତ୍ୱରେ ଅନୁଷ୍ଠିତ ଏହି ପ୍ରତିଯୋଗିତାରେ କେନ୍ଦୁଝର ସାଂସଦ ଅନନ୍ତ ନାୟକ, ଏହାକୁ ଉଦଘାଟନ କରି କ୍ରୀଡାର ବିକାଶ ପାଇଁ ରାଜ୍ୟ ସରକାର ଓ ଭାରତ ସରକାର ସବୁ ପ୍ରକାର ପ୍ରୋତ୍ସାହନ ଯୋଗାଇ ଦେଉଛନ୍ତି। ତେଣୁ କ୍ରୀଡ଼ାବିତ ମାନେ ଏହାର ସୁବିଧା ସୁଯୋଗରଫାଇଦା ନେବାକୁ ଆହ୍ୱାନ ଦେଇଥିଲେ। ଏଥିରେ ଅନ୍ୟତମ ଅତିଥି ଭାବେ ଆନନ୍ଦପୁର ଉପଜିଲ୍ଲାପାଳ ନୀଳ ମାଧବ ସୁନା ଯୋଗଦେଇ ଛାତ୍ରଛାତ୍ରୀ ମାନେ ମୋବାଇଲ ଗେମ ନଖେଳି ଶାରୀରିକ କ୍ରୀଡା ପ୍ରତି ଆଗ୍ରହ ଦେଖାଇବାକୁ କହିଥିଲେ। ଏହାଦ୍ୱାରା ପିଲାଙ୍କ ମାନସିକ, ଶାରୀରିକ ବିକାଶ ଘଟିବ ବୋଲି କହିଥିଲେ। ଅନ୍ୟତମ ଅତିଥି ବିଜେପି ନେତା ଆଲୋକ ସେଠୀ ଯୋଗଦେଇ ପ୍ରଥମଥର ପାଇଁ ହାଟଡିହି ରେ ଜିଲ୍ଲା ସ୍ତରୀୟ କ୍ରୀଡା ଆୟୋଜନ ର ସୁଯୋଗ ଦେଇଥିବାରୁ ଜିଲ୍ଲା ପ୍ରଶାସନ କୁ ସାଧୁବାଦ ଜଣାଇଥିଲେ। ଏଥିରେ ଅନ୍ୟତମ ଅତିଥି ଭାବେ ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ଶ୍ରୀକାନ୍ତ ବେହେରା, ବିଡ଼ିଓ ରଞ୍ଜନ କୁମାର ପରିଡା, ବ୍ଲକ ଶିକ୍ଷା ଅଧିକାରୀ ରାଜୀବ ଦଳେଇ, ସାଂସଦ ପ୍ରତିନିଧି ଜ୍ଞାନ ରଞ୍ଜନ ସାମନ୍ତ ସିଂହାର, ପୂର୍ବତନ ପୌରାଧ୍ୟକ୍ଷ ରାମଚନ୍ଦ୍ର ସାହୁ, ଓଷ୍ଟାର ଜିଲ୍ଲା ସମ୍ପାଦକ ରଞ୍ଜନ ଘଡେଇ, ଓଡିଶା ଆଦର୍ଶ ବିଦ୍ୟାଳୟର ଅଧ୍ୟକ୍ଷା ଲୁନାଲିସା ସାମନ୍ତରାୟ, ସୁନ୍ଦରାପାଳ ହାଇସ୍କୁଲ ର ପ୍ରଧାନ ଶିକ୍ଷକ ଶରତ କୁମାର ଶାସିନି, ଶିକ୍ଷକ ନେତା ମୃତ୍ୟୁଞ୍ଜୟ ପଲେଇ, ନିକୁଞ୍ଜ ଓଝା ପ୍ରମୁଖ ଯୋଗଦେଇ ଥିଲେ। ଏହି ଅବସରରେ ଜାତୀୟ ସଙ୍ଗୀତ ଗାନ କରାଯିବା ସହିତ ସୁନ୍ଦରାପାଳ ସ୍କୁଲର ଛାତ୍ରୀମାନେ ସ୍ୱାଗତ ସଙ୍ଗୀତ ଓ ସ୍ୱାଗତ ନୃତ୍ୟ ପରିବେଷଣ କରିଥିଲେ।  ଏଥିରେ ଜିଲ୍ଲାର ୧୩ଟି ଯାକ ବ୍ଲକର ପ୍ରତିଯୋଗୀ ମାନେ ଯୋଗଦେଇଥିଲେ। ଆସନ୍ତା କାଲି ଏହାର ଉଦଯାପନ ସମାରୋହ ଅନୁଷ୍ଠିତ ହେବ। ଶିକ୍ଷକ ଅନିରୁଦ୍ଧ ସେଠୀ ସ୍ୱାଗତ ଭାଷଣ ଓ ଅତିଥି ପରିଚୟ ପ୍ରଦାନ କରିଥିବା ବେଳେ ଶିକ୍ଷୟିତ୍ରୀ ଅନିତା ବେହେରା ମଞ୍ଚ ସଂଯୋଜନା କରିଥିଲେ।  ଶିକ୍ଷକ ଦୁର୍ଯ୍ୟୋଧନ ଜେନା ଧନ୍ୟବାଦ ଅର୍ପଣ କରିଥିଲେ। ହାଟଡିହି ବ୍ଲକର ସମସ୍ତ ହାଇସ୍କୁଲର କ୍ରୀଡା ଶିକ୍ଷକ ମାନେ କାର୍ଯ୍ୟକ୍ରମ ପରିଚାଳନା କରିଥିଲେ।