ବିଦ୍ୟୁତ୍ ଖୁଣ୍ଟରୁ ପଡ଼ି କର୍ମଚାରୀ ମୃତ କ୍ଷତିପୂରଣ ଦାବିରେ ରାସ୍ତାରୋକ

ପୁରୀ (ଜୁଗାବ୍ଦ ନ୍ୟୁଜ୍‍): ମଙ୍ଗଳବାର ଅପରାହ୍ଣରେ ପୁରୀରେ ବିଦ୍ୟୁତ୍ ମରାମତି କାମ ଚାଲିଥିବାବେଳେ ଏକ ଖୁଣ୍ଟରୁ ଜଣେ ବିଦ୍ୟୁୃତ୍ କର୍ମଚାରୀ ଖସିପଡ଼ି ମୃତ୍ୟୁବରଣ କରିଛନ୍ତି । ମୃତକ ହେଲେ ମଙ୍ଗରାଜ ରାଓ, ଘର ବାଲି ନେଳିଆସାହି । ପରିବାରକୁ କ୍ଷତିପୂରଣ ଦାବିରେ ମେଡିକାଲ ଛକଠାରେ ପରିବାର ସଦସ୍ୟ ଓ କର୍ମଚାରୀ ସମୂହ ଭାବେ ରାସ୍ତା ଅବରୋଧ କରିଥିଲେ । ଖବର ପାଇ ସେସୁ ବିଭାଗ ବରିଷ୍ଠ ଅଧିକାରୀମାନେ କ୍ଷତିପୂରଣ ଦେବାକୁ ପ୍ରତିଶ୍ରୁତି ଦେବାପରେ ରାସ୍ତାରୋକ ହଟିଥିଲା । ଖବରରୁ ଜଣାଯାଇଛି ଯେ, ଆଜି ଅପରାହ୍ଣରେ ପୁରୀର ଭିଆଇପି ରୋଡରେ ଏକ ଖୁଣ୍ଟରେ ଚଢ଼ି ବିଦ୍ୟୁତ୍ ମରାମତି କରୁଥିବାବେଳେ ହଠାତ୍ ଖସି ପଡ଼ିଥିଲେ । ସଙ୍ଗେ ସଙ୍ଗେ ତାଙ୍କୁ ଜିଲ୍ଲା ମେଡିକାଲରେ ଭର୍ତ୍ତି କରାଯାଇଥିଲା । ମାତ୍ର ସେଠାରୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏହାକୁ ନେଇ ମେଡିକାଲରେ ଉତ୍ତେଜନା ପ୍ରକାଶ ପାଇଥିଲା ଏବଂ ପରେ ରାସ୍ତାରୋକ କରିଥିଲେ ।