୩କରୋନା ପଜେଟିଭ୍ ଚିହ୍ନଟପରେ ୨ଗ୍ରାମକୁ କଣ୍ଟେନମେଣ୍ଟ ଘୋଷଣା କଲେ ସରପଞ୍ଚ

ବନ୍ତ, (ଚାନ୍ଦିନୀ ମହାନ୍ତି) : ସୋମବାର ବନ୍ତ ବ୍ଲକରେ ୩ କରୋନା ପଜେଟିଭ୍ ଚିହ୍ନଟ ହୋଇଥିବା ଜଣାଯାଇଛି । ସେଥିମଧ୍ୟରୁ ଜଣେ ଆକ୍ରାନ୍ତ କେନ୍ଦୁଆପଦା ପଞ୍ଚାୟତ ଗଣ୍ଡଗରା ଗ୍ରାମର ହୋଇଥିବା ଅନ୍ୟ ୨ ଆକ୍ରାନ୍ତ ରାମକୃଷ୍ଣପୁର ଗ୍ରାମର ବୋଲି ଜଣାଯାଇଛି । ଏସମସ୍ତ ଆକ୍ରାନ୍ତ ମାନେ ମହାରାଷ୍ଟ୍ର ଫେରନ୍ତା ହୋଇଥିବା ବେଳେ ସମସ୍ତେ ଓଡଙ୍ଗ ସଙ୍ଗରୋଧ କେନ୍ଦ୍ରରେ ରହି ଘରକୁ ଫେରିଥିଲେ । ସଙ୍ଗରୋଧ କେନ୍ଦ୍ରରେ ଥିବା ବେଳେ ସେମାନଙ୍କ ନମୁନା ପରୀକ୍ଷା ପାଇଁ ଯାଇଥିଲା । ରିପୋର୍ଟ ଆସିବା ପୂର୍ବରୁ ସେମାନେ ସଙ୍ଗରୋଧ କେନ୍ଦ୍ରରୁ ଘରକୁ ଫେରିଥିଲେ । ଘରେ ଥିବା ବେଳେ ସେମାନଙ୍କ ରିପୋର୍ଟ ପଜେଟିଭ୍ ବାହାରି ଥିବା ଜଣାଯାଇଛି । କରୋନା ପଜେଟିଭ୍ ବାହାରିବା ପରେ କେନ୍ଦୁଆପଦା ସରପଞ୍ଚ ମିତାଲୀ ଜେନା ଗଣ୍ଡଗରା ଗ୍ରାମକୁ ସୋମବାର ଠାରୁ ଆସନ୍ତା ୭ ତାରିଖ ପୂବାହ୍ନ ୧୧ଟା ୩୦ ପର୍ଯ୍ୟନ୍ତ କଣ୍ଟେନମେଣ୍ଟ ଜୋନ୍ ଘୋଷଣା କରିଛନ୍ତି । ସେହିପରି ରାମକୃଷ୍ଣପୁର ସରପଞ୍ଚ ସାବିତ୍ରୀ ବିଶ୍ୱାଳ ରାମକୃଷ୍ଣପୁର ଗ୍ରାମକୁ ୭ ଦିନ ପାଇଁ କଣ୍ଟେନମେଣ୍ଟ ଜୋନ୍ ଘୋଷଣା କରିଥିବା ଜଣାଯାଇଛି ।