ଲୁଟେରା ଗିରଫ, ୧୫ ମୋବାଇଲ ଫୋନ ଜବତ

ହିଞ୍ଜିଳିକାଟୁ, (ଶେଷଦେବ ସାହୁ):ହିଞ୍ଜିଳିକାଟୁ ସହର ଜନଗହଳି ପୂର୍ଣ୍ଣ ସ୍ଥାନ ଭାବେ ପରିଚିତି ପନିପରିବା ବଜାରରୁ ବିଭିନ୍ନ ସମୟରେ ଲୁଟ୍ ହୋଇଥିବା ମୋବାଇଲ ଫୋନ ଗୁଡିକୁ ହିଞ୍ଜିଳି ପୋଲିସ ଶନିବାର ସକାଳେ ଜବତ କରିବା ସହ ଜଣଙ୍କୁ ଗିରଫ କରିଛି । ଗିରଫ ଜଣଙ୍କ ହେଲେ ହିଞ୍ଜିଳି ଥାନା ତଥା ହିଞ୍ଜିଳିକାଟୁ ପୌରାଞ୍ଚଳ ଆଙ୍କୋରଡା କବିଚନ୍ଦ୍ର ମାର୍ଗ ଅଞ୍ଚଳର ମଙ୍ଗୁଳୁ ବେହେରା (୨୭) । ଏ ନେଇ ହିଞ୍ଜିଳି ଥାନାରେ କେସ ନଂ – ୩୬୫/୨୩ ରେ ଏକ ମାମଲା ରୁଜୁ କରି ଗିରଫ ଯୁବକଙ୍କୁ କୋର୍ଟ ଚାଲାଣ କରାଯାଇଥିବା ଥାନା ଭାରପ୍ରାପ୍ତ ଅଧିକାରୀ ଅଭିମନ୍ୟୁ ଦାସ କହିଛନ୍ତି। ପୁଲିସ ସୂଚନା ଅନୁସାରେ ହିଞ୍ଜିଳିକାଟୁ ପୌରାଞ୍ଚଳ କବିଚନ୍ଦ୍ର ମାର୍ଗର ମଙ୍ଗୁଳୁ ଗତ କିଛି ଦିନ ଧରି ପନିପରିବା ବଜାରର ଜନଗହଳି ପୂର୍ଣ୍ଣ ସ୍ଥାନରୁ କୌଶଳ କ୍ରମେ ଲୋକଙ୍କ ମୋବାଇଲ ଲୁଟି ନେଇଥିଲେ। ଶନିବାର ସକାଳେ ହିଞ୍ଜିଳି ପୋଲିସ ପାଟ୍ରୋଲି କରୁଥିବା ବେଳେ ଲୁଟେରା ଜଣଙ୍କ ପୁଲିସ ଗାଡ଼ିକୁ ଦେଖି ଦୌଡିଥିଲେ। ପୁଲିସ ସନ୍ଦେହ କରି ଲୁଟେରାଙ୍କ ପିଛା କରି କାବୁ କରିଥିଲା। କାବୁ ସମୟରେ ଲୁଟେରାଙ୍କ ଠାରୁ ୪ଟି ମୋବାଇଲ ଫୋନ ଜବତ କରିଥିବା ବେଳେ ପଚରାଉଚରା ସମୟରେ ବିଭିନ୍ନ ବ୍ରାଣ୍ଡର ଆଉ ୧୧ଟି ମୋବାଇଲ ଫୋନ ଚୋରୀ କରିଥିବା ସ୍ବୀକାର କରିଥିଲେ। ଚଢ଼ାଉ ବେଳେ ଏଏସଆଇ କାଳିଚରଣ ସ୍ବାଇଁ, ହାବିଲଦାର ପ୍ରମୋଦ କୁମାର ଗନ୍ତାୟତ, କନେଷ୍ଟବଳ ନରେଶ କୁମାର ପ୍ରଧାନ ସାମିଲ ହୋଇଥିଲେ।