ବୋହୁକୁ ପେଟ୍ରୋଲ ଢାଳି ମାରିଦେବା ଉଦ୍ୟମ: ଶ୍ବଶୁର, ଦିଅର ବିରୋଧରେ ଅଭିଯୋଗ
କେନ୍ଦ୍ରାପଡ଼ା,(ଓ୍ବାଇଏନଏସ): କେନ୍ଦ୍ରାପଡା ସଦରଥାନା ଅନ୍ତର୍ଗତ ବାରିମୂଳ ଖଣ୍ଡାସାହି ଗ୍ରାମର ଜଣେ ମହିଳାଙ୍କ ଉପରେ ପେଟ୍ରୋଲ ଢାଳି ହତ୍ୟା କରାଯିବା ଉଦ୍ୟମ ହୋଇଛି। କିନ୍ତୁ ପିଡିତା ଅଳ୍ପକେ ବଞ୍ଚି ଯାଇଛନ୍ତି। ଏହାସହ ସଂପୃକ୍ତ ମହିଳାଙ୍କୁ ଶୁଶୁର ଓ ଦିଅରମାନେ ମାଡମାରି କ୍ଷତାକ୍ତ କରିଛନ୍ତି। ଏନେଇ ପିଡିତା ସଦର ଥାନାରେ ଅଭିଯୋଗ କରିଥିଲେ ମଧ୍ୟ ପୋଲିସ ଏହାକୁ ଗୁରୁତ୍ୱ ଦେଉନାହିଁ। ତେଣୁ ବାଧ୍ୟ ହୋଇ ପିଡିତା ଏସମ୍ପର୍କରେ ଜିଲ୍ଲାପାଳଙ୍କ ନିକଟରେ ଅଭିଯୋଗ କରିଥିବା କହିଛନ୍ତି। ଜିଲ୍ଲାପାଳଙ୍କ ଅନୁପସ୍ଥିତିରେ ଅତିରିକ୍ତ ଜିଲ୍ଲାପାଳ ରବୀନ୍ଦ୍ର କୁମାର ମଲ୍ଲିକ ଅଭିଯୋଗପତ୍ର ଗ୍ରହଣ କରିଥିଲେ। ଏଥିସହ ଅଭିଯୋଗର ତଦନ୍ତ କରି ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଅତିରିକ୍ତ ଆରକ୍ଷୀ ଅଧୀକ୍ଷକଙ୍କୁ ଅତିରିକ୍ତ ଜିଲ୍ଲାପାଳ ଶ୍ରୀ ମଲ୍ଲିକ ନିର୍ଦେଶ ଦେଇଥିବା ଜଣାପଡିଛି।


