ହାଟଡ଼ିହିରେ ଜିଲ୍ଲାପାଳଙ୍କ ମିଳିତ ଅଭିଯୋଗ ଶୁଣାଣି : ୨୧୮ଟି ଅଭିଯୋଗର ହେଲା ଶୁଣାଣି

ହାଟଡ଼ିହି,(ଓ୍ବାଇଏନଏସ): କେନ୍ଦୁଝର ଜିଲ୍ଲା ହାଟଡିହି ବ୍ଲକରେସୋମବାର ପୂର୍ବାହ୍ନରେ ଜିଲ୍ଲାପାଳଙ୍କ ମିଳିତ ଅଭିଯୋଗ ଶୁଣାଣି ହୋଇଯାଇଛି। ହାଟଡ଼ିହି ବ୍ଲକର ବିଡିଓ  ରଞ୍ଜନ କୁମାର ପରିଡ଼ାଙ୍କ ସଂଯୋଜନାରେ ଅନୁଷ୍ଠିତ ଏହି ଶିବିରରେ  କେନ୍ଦୁଝର ଜିଲ୍ଲାପାଳ ବିଶାଲ ସିଂ,  ଜିଲ୍ଲା ମୁଖ୍ୟ ଉନ୍ନୟନ ଅଧିକାରୀ କୁମାର ନାଗଭୂଷଣ, ଆନନ୍ଦପୁର ଉପଜିଲ୍ଲାପାଳ ନୀଳମାଧବ ସୁନା, ଜିଲ୍ଲା ମୁଖ୍ୟ ଚିକିତ୍ସାଧିକାରୀ କିଶୋର କୁମାର ପୃଷ୍ଟି, ଉପଖଣ୍ଡ ଆରକ୍ଷୀ ଅଧିକାରୀ ପ୍ରସାନ୍ତ ବେହେରା ପ୍ରମୁଖ ଯୋଗଦେଇ ୨୧୮ଟି ଅଭିଯୋଗର ଶୁଣାଣି କରିଥିଲେ। ୨/୩ ମାସ ଅନ୍ତରରେ ଏହି ଶୁଣାଣି ହେଉଥିବାରୁ ବହୁ ଦୁର ଦୁରାନ୍ତରୁ ଶହ ଶହ ଲୋକ  ନିଜ ନିଜର ଅଭିଯୋଗ ନେଇ ଧାଇଁ ଆସିଥିଲେ। ଆଜିର ଅଭିଯୋଗ  ୩୫ଟି ଭତ୍ତା, ୨ଟି ରେସନ ସାମଗ୍ରୀ ବଣ୍ଟନ,  ଶିକ୍ଷା ବିଭାଗର ବଦଳି ଉପରେ ୧୧ଟି,  ଗ୍ରାମୀଣ ଆବାସ ସଂକ୍ରାନ୍ତୀୟ ଅଭିଯୋଗ ୪୫ଟି,  ମନରେଗା ଯୋଜନା ସଂକ୍ରାନ୍ତୀୟ ୩୭ଟି, ବେଆଇନ ବାଲି ଉଠାଣ ସଂକ୍ରାନ୍ତୀୟ ୩ଟି, ରାଜସ୍ଵ ବିଭାଗର ୬୮ଟି, ଆର୍ଥିକ ସହାୟତା ସଂକ୍ରାନ୍ତୀୟ ୩୧ଟି, ରାସ୍ତା ସମ୍ପର୍କିତ ଅଭିଯୋଗ ୫ଟି, ସମବାୟ ସମିତି ଦୁର୍ନୀତି ବିରୁଦ୍ଧରେ ଗୋଟିଏ ଅଭିଯୋଗ ଆସିଥିଲା। କିଛି ଭିନ୍ନକ୍ଷମ ମାନେ ସେମାନଙ୍କ ଅଙ୍ଗୁଳି ଛାପ ଉଠୁନଥିବାରୁ ଆଧାର କାର୍ଡ ହୋଇ ପାରୁନି। ଫଳରେ ସେମାନେ ସରକାରଙ୍କ ଯୋଜନାରୁ ବଞ୍ଚିତ ହେଉଛନ୍ତି ବୋଲି ଖାଣ୍ଟପାଦା ଗ୍ରାମର ଗୌତ୍ତମ ମୁଦୁଲି, ସରମଙ୍ଗା ଗ୍ରାମର କେଶବ ବେହେରା ପ୍ରମୁଖ ଅଭିଯୋଗ କରିଛନ୍ତି। ସେହିପରି ନୂଆଗାଁ ଗ୍ରାମକୁ ରାଜସ୍ଵ ଗ୍ରାମର ମାନ୍ୟତା ପ୍ରଦାନ ପାଇଁ ନୂଆଗାଁ ଗ୍ରାମବାସୀ ମାନେ ଜିଲ୍ଲାପାଳଙ୍କୁ ଲିଖିତ ଅଭିଯୋଗ କରିଛନ୍ତି। ସମସ୍ତ ତଥ୍ୟ ସହିତ କୋର୍ଟ ରାୟର ଦସ୍ତାବିଜ୍ ପ୍ରଦାନ କରିଥିଲେ ବି ରାଜସ୍ଵ ଗ୍ରାମ ଘୋଷଣାରେ କାହିଁକି ବିଳମ୍ବ ଘଟୁଛି ବୋଲି ଅଭିଯୋଗ କରିଛନ୍ତି। ସେହିପରି ବଞ୍ଚୋ ଗ୍ରାମରେ କିଛି ବ୍ୟକ୍ତି ରାସ୍ତା ଜବର ଦଖଲ କରିଥିବାରୁ ଗ୍ରାମବାସୀ ମାନେ ଅସୁବିଧା ଭୋଗୁଛନ୍ତି ବୋଲି ସରପଞ୍ଚ ପ୍ରସାନ୍ତ ରାଉତ ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି। ଏହି ଶିବିରରେ ତହସିଲଦାର ଶିବବ୍ରତ ତ୍ରିପାଠୀ, ଜିଲ୍ଲା ଶିକ୍ଷାଧିକାରୀ ପୂର୍ଣ୍ଣ ଚନ୍ଦ୍ର ବରିହା,  ଜିଲ୍ଲା ସାମାଜିକ ସୁରକ୍ଷା ଅଧିକାରୀ ବିପ୍ଳବ ସାମନ୍ତରାୟ, ମୁଖ୍ୟ ଜିଲ୍ଲା ଯୋଗାଣ ଅଧିକାରୀ ବସନ୍ତ କୁମାର ପଣ୍ଡା, ଗ୍ରାମ୍ୟ ଜଳଯୋଗାଣ ବିଭାଗର ଅଧିକ୍ଷଣ ଯନ୍ତ୍ରୀ ମାନସ ରଞ୍ଜନ ପରିଡ଼ା, ଉପଖଣ୍ଡ ସାମାଜିକ ସୁରକ୍ଷା ଅଧିକାରୀ ପ୍ରତିମା ଦଣ୍ଡପାଟ, ହଦଗଡ଼ ବନାଞ୍ଚଳ ଅଧିକାରୀ ମାର୍ଶାଲ କିସ୍କୁ,  ହାଟଡ଼ିହି ବ୍ଲକ ଶିକ୍ଷାଧିକାରୀ ରାଜୀବ ଦଳେଇ, ବ୍ଲକ ଶ୍ରମ ଅଧିକାରୀ ଶାଶ୍ଵତ ପଲେଇ, ଗ୍ରାମ୍ୟ ଉନ୍ନୟନ ବିଭାଗର ସହକାରୀ ଯନ୍ତ୍ରୀ କରୁଣାକର ନନ୍ଦ, ପୂର୍ତ୍ତ ବିଭାଗର ସହକାରୀ ଯନ୍ତ୍ରୀ କେଳୁ ଚରଣ ଦଳେଇ,  ସିଡ଼ିପିଓ ଉମାମଣି ମହାପାତ୍ରଙ୍କ ସମେତ ଅନ୍ୟାନ୍ୟ ଅଧିକାରୀ ମାନେ ସାମିଲ ହୋଇଥିଲେ। ଶେଷରେ ୯ଜଣ ଦିବ୍ୟାଙ୍ଗ ଙ୍କୁ ହୁଇଲ ଚେୟାର ବଣ୍ଟନ କରାଯାଇ ଥିଲା। ଏଥିରେ ବ୍ଲକ ଅଧ୍ୟକ୍ଷା ସାବିତ୍ରୀ ସେଠୀ ଉପସ୍ଥିତ ଥିଲେ। ବ୍ଲକ କର୍ମଚାରୀମାନେ ଶିବିର ପରିଚାଳନାରେ ସହଯୋଗ କରିଥିଲେ ।