ସର୍ଦାର ବଲ୍ଲଭଭାଇ ପଟେଲଙ୍କ ୧୫୦ତମ ଜନ୍ମବାର୍ଷିକୀ ଉପଳକ୍ଷେ ’ଏକତା ପଦଯାତ୍ରା’

ଭୋଗରାଇ, ବାଲେଶ୍ୱର(ସରୋଜ ପଣ୍ଡା) : ଲୌହ ମାନବ ସର୍ଦାର ବଲ୍ଲଭଭାଇ ପଟେଲଙ୍କ ୧୫୦ତମ ଜନ୍ମବାର୍ଷିକୀ ଉପଲକ୍ଷେ ସମଗ୍ର ରାଜ୍ୟର ପ୍ରତ୍ୟେକ ସଂସଦୀୟ କ୍ଷେତ୍ରରେ ତିନୋଟି କରି ଏକତା ପଦଯାତ୍ରା ଆୟୋଜନର ଅଂଶ ଭାବେ, ବାଲେଶ୍ୱର ଲୋକସଭା କ୍ଷେତ୍ରର ଦ୍ୱିତୀୟ ଚରଣର ପଦଯାତ୍ରା ଆଜି ଭୋଗରାଇରେ ଉତ୍ସାହ ଓ ଆନୁଷ୍ଠାନିକ ଭିତ୍ତିରେ ଆୟୋଜିତ ହୋଇଥିଲା। ଏହି ପଦଯାତ୍ରାର ଉଦ୍ଘାଟନ ଚନ୍ଦନେଶ୍ୱରରେ ମାନ୍ୟବର ସାଂସଦ ଶ୍ରୀ ପ୍ରତାପ ଚନ୍ଦ୍ର ଷଡ଼ଙ୍ଗୀଙ୍କ କରକମଳରେ ସମ୍ପନ୍ନ ହୋଇଥିଲା। ପଦଯାତ୍ରା ଚନ୍ଦନେଶ୍ୱର ମନ୍ଦିର ଦେଇ ଆରମ୍ଭ ହୋଇ ବଗଦା ସ୍କୁଲ (ଦ୍ୱିତୀୟ କିଓସ୍କ) ପର୍ଯ୍ୟନ୍ତ ପହଞ୍ଚିଥିଲା, ତାପରେ ଚଉକି ଛକ (ତୃତୀୟ କିଓସ୍କ) ଦେଇ ଶେଷରେ ଭୋଗରାଇ ଥାନା ଛକରେ ସମାପ୍ତ ହୋଇଥିଲା। ପ୍ରତ୍ୟେକ ସ୍ଥଳରେ ବନ୍ଦେ ମାତରମ୍ ସଙ୍ଗୀତ, ନୃତ୍ୟ, ଜାତୀୟତାମୂଳକ ନାଟ୍ୟ ଓ ଅନ୍ୟାନ୍ୟ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହୋଇ ପରିବେଶକୁ ଉତ୍ସାହମୟ କରିଥିଲା। ସ୍ୱେଚ୍ଛାସେବୀ, ସ୍କୁଲ ଛାତ୍ରଛାତ୍ରୀ, ମହିଳଙ୍କ ସହ ଏକ ବିଶାଳ ରାଲୀ ପଦଯାତ୍ରାରେ ଯୋଡ଼ିଥିଲେ।  ରାଷ୍ଟ୍ରନାୟକ ସର୍ଦାର ପଟେଲଙ୍କ ବୃହତ୍ ପ୍ରତିମା ମେଢ଼ ସହ ଶତାଧିକ ଛାତ୍ର-ଛାତ୍ରୀ ଶହେ ଫୁଟ ଲମ୍ବା ତିରଙ୍ଗା ପତାକା ମୁଣ୍ଡ ଉପରେ ରଖି ଚାଲୁଥିବା ଦୃଶ୍ୟ ଅନେକଙ୍କୁ ଆକର୍ଷିତ କରିଛି। ଦେଶଭକ୍ତିର ଉତ୍ସାହ ଓ ସମ୍ମିଳନର ସୂଚନା ଏହି ଚିତ୍ର ଅନୁପମ ଥିଲା।