ବନ୍ୟା ବିପନ୍ନଙ୍କୁ କଂଗ୍ରେସ ଦଳ ତରଫରୁ ଶୁଖିଲା ଖାଦ୍ୟ ଓ ଜରିପାଲ ବଣ୍ଟନ

ଧାମନଗର (ଓ୍ବାଇଏନଏସ):  ଧାମନଗର ବ୍ଲକର ବିଭିନ୍ନ ପଞ୍ଚାୟତରେ ବନ୍ୟା ବିପନ୍ନଙ୍କୁ ବ୍ଲକ କଂଗ୍ରେସ ପକ୍ଷରୁ ସୋମବାର ଶୁଖିଲା ଖାଦ୍ୟ ଓ ଜରିପାଲ ବଣ୍ଟନ କରାଯାଇଛି। ବନ୍ୟା ଯୋଗୁଁ ବ୍ଲକର ବିଭିନ୍ନ ଅଞ୍ଚଳର ଅନେକ ଗାଁ ପ୍ରଭାବିତ ହୋଇଥିବାବେଳେ ଲୋକଙ୍କ ଦୁର୍ଦ୍ଦଶା ବଢ଼ିଛି। ଅନେକ ପରିବାରଙ୍କ ଘରେ ପାଣି ପଶିବା ସହ ରାସ୍ତାଘାଟ ଜଳମଗ୍ନ ହୋଇପଡ଼ିଛି। ଫଳରେ ଦୈନନ୍ଦିନ ଜୀବନଯାପନ ସହ ଖାଦ୍ୟ, ପାନୀୟ ଜଳ ଓ ରହିବା ପାଇଁ ଆଶ୍ରୟକୁ ନେଇ ଲୋକେ ସମସ୍ୟାରେ ପଡ଼ିଛନ୍ତି। ଏଭଳି ସ୍ଥିତିରେ ବିପନ୍ନ ପରିବାରଙ୍କ ନିକଟରେ ସହାୟତା ପହଞ୍ଚାଇବା ପାଇଁ ବ୍ଲକ କଂଗ୍ରେସ ପକ୍ଷରୁ ଉଦ୍ୟମ କରାଯାଇଛି। ଧାମନଗର ଏନଏସି,କଟସାହି,ରଇପୁର,ଖପରପଦା,ସାହାସପୁର,ଧୁଷୁରୀ,ଅସୁରାଳି,ଦେହୁଡ଼ି ଆନନ୍ଦପୁର,କରଦା ଓ ଦଳାଙ୍ଗ ପଞ୍ଚାୟତରେ ଦଳୀୟ କର୍ମୀମାନେ ପହଞ୍ଚି ବନ୍ୟା ବିପନ୍ନ ପରିବାରଙ୍କୁ ଜରିପାଲ ଓ ଶୁଖିଲା ଖାଦ୍ୟ ବଣ୍ଟନ କରିଥିଲେ। ବନ୍ୟା ପରେ ଅନେକ ଅଞ୍ଚଳରେ ଲୋକଙ୍କ ସାଧାରଣ ଜୀବନଯାତ୍ରା ପ୍ରଭାବିତ ହୋଇଥିବାରୁ ଆବଶ୍ୟକ ସହାୟତା ଯୋଗାଇଦେବାକୁ କଂଗ୍ରେସ ପକ୍ଷରୁ ଗୁରୁତ୍ୱ ଦିଆଯାଇଥିବା କୁହାଯାଇଛି। ଏହି କାର୍ଯ୍ୟକ୍ରମରେ ଜିଲ୍ଲା କଂଗ୍ରେସ ଉପସଭାପତି ଅଭିଷେକ ରାଉତ,ବ୍ଲକ କଂଗ୍ରେସ ସଭାପତି ଅରବିନ୍ଦ ନାୟକ,ବରିଷ୍ଠ ନେତା ହୃଦାନନ୍ଦ ସେଠୀ,ନିମାଇଁ ଜେନା,ସୁଧୀର ଖଟୁଆ,ରବୀନ୍ଦ୍ର ନାୟକ,ଶିଶିର ଦେବତା,ଦୀନବନ୍ଧୁ ଦାସ,ରଞ୍ଜିତ ସାହାଣିଙ୍କ ସମେତ ବହୁ ଦଳୀୟ କର୍ମକର୍ତ୍ତା ଉପସ୍ଥିତ ଥିଲେ।