ଅବ୍ୟବସ୍ଥା ମଧ୍ୟରେ ଆଳି ବଜାରଦାଣ୍ଡି ଅଙ୍ଗନୱାଡି କେନ୍ଦ୍ର

କେନ୍ଦ୍ରାପଡ଼ା,(ଓ୍ବାଇଏନଏସ): କେନ୍ଦ୍ରାପଡା ଜିଲ୍ଲାର ଆଳି ବ୍ଲକ ଅନ୍ତର୍ଗତ ମହୁ ବଜାରଦାଣ୍ଡି ଅଙ୍ଗନୱାଡିକେନ୍ଦ୍ରରେ ନାନା ସମସ୍ୟା ଉପୁଜୁ ଥିବାରୁ ଦାୟୀତ୍ୱରେ ଥିବା ଅଧିକାରୀ ଓ କର୍ମଚାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ହାଇକୋର୍ଟ କେନ୍ଦ୍ରାପଡା ଜିଲ୍ଲାପାଳଙ୍କୁ ନିର୍ଦେଶ ଦେଇଛନ୍ତି। କଣ କାର୍ଯ୍ୟାନୁଷ୍ଠାନ ଗ୍ରହଣ କରାଗଲା ତାହାକୁ ୮ସପ୍ତାହ ମଧ୍ୟରେ ଆବେଦନକାରୀଙ୍କୁ ଅବଗତ କରିବା ପାଇଁ କୋର୍ଟ ନିର୍ଦେଶ ଦେଇଛନ୍ତି। ଏଠାରେ ସୂଚନା ଯୋଗ୍ୟ ଯେ ମହୁ ବଜାରଦାଣ୍ଡି ଅଙ୍ଗନୱାଡିକେନ୍ଦ୍ରରେ ବିଭିନ୍ନ ଅନିୟମିତତା ଓ ବେଆଇନ କାର୍ଯ୍ୟ କରାଯାଇଥିବା ସମ୍ପର୍କରେ ସଂପୃକ୍ତ ୱାର୍ଡର ୱାର୍ଡସଭ୍ୟ ଓ ଗ୍ରାମବାସୀମାନେ ଆଳି ସମନ୍ୱିତ ଶିଶୁ ବିକାଶ ଯୋଜନା (ଆଇ. ସି. ଡି. ଏସ.)ର ଶିଶୁ ବିକାଶ ପ୍ରକଳ୍ପ ଅଧିକାରୀଙ୍କ ନିକଟରେ ବାରମ୍ବାର ଅଭିଯୋଗ କରିଥିଲେ। ଫଳରେ ଶିଶୁ ବିକାଶ ପ୍ରକଳ୍ପ ଅଧିକାରୀ ସେହିସବୁ ଅଭିଯୋଗର ତଦନ୍ତ କରିବା ପାଇଁ କ୍ଷେତ୍ରପରିଦର୍ଶିକାଙ୍କୁ ନିର୍ଦେଶ ଦେଇଥିଲେ। ନିର୍ଦେଶ ପାଇବା ପରେ କ୍ଷେତ୍ରପରିଦର୍ଶିକା ସୁଭାଷିନୀ ନାୟକ ବଜାରଦାଣ୍ଡି ଅଙ୍ଗନୱାଡିକେନ୍ଦ୍ରର କର୍ମୀ ଆରତୀ ତ୍ରିପାଠୀଙ୍କୁ ପତ୍ର ସଂଖ୍ୟା-୧ ତା ୧୮. ୧୨. ୨୦୨୩ରିଖ ଓ ପତ୍ର ସଂଖ୍ୟା- ୨ ତା ୨୬. ୦୩. ୨୦୨୪ରିଖରେ ଦୁଇ ଦୁଇଟି ନୋଟିସ କରିଥିଲେ ମଧ୍ୟ ସଂପୃକ୍ତ କେନ୍ଦ୍ରର କର୍ମୀ ସେହି ନୋଟିସର କୈାଣସି ଉତ୍ତର ଦେଇନଥିଲେ। ତେଣୁ କ୍ଷେତ୍ରପରିଦର୍ଶିକା, ଶିଶୁ ବିକାଶ ପ୍ରକଳ୍ପ ଅଧିକାରୀ, ଆଳି ଆଇ.ସି.ଡି.ଏସ.ର ପି.ଆଇ.ଓ, କନିଷ୍ଠ ସହକାରୀ ପ୍ରମୁଖ ତା ୨.୦୪.୨୦୨୪ରିଖରେ ସଂପୃକ୍ତ ଅଙ୍ଗନୱାଡି କେନ୍ଦ୍ରରେ ପହଞ୍ଚି ତଦନ୍ତ କରିଥିଲେ। ତଦନ୍ତରୁ ଜଣାପଡିଥିଲା ଯେ ସେହି କେନ୍ଦ୍ରରେ ୨୦୨୨ମସିହାରୁ ତଦନ୍ତ ଦିନ ପର୍ଯ୍ୟନ୍ତ କୈାଣସି ମାତୃ କମିଟି, ଯାଞ୍ଚ କମିଟି ଓ ଗ୍ରାମ କଲ୍ୟାଣ କମିଟି ଗଠନ କରାଯାଇନାହିଁ। ସେହି କେନ୍ଦ୍ରରେ ମୋଟ ୨୬ଜଣ ଶିଶୁ ଥିବା ସ୍ଥଳେ ତଦନ୍ତ ଦିନ ମାତ୍ର ୬ଜଣ ଶିଶୁ ପ୍ରାକ୍ ବିଦ୍ୟାଳୟରେ ଉପସ୍ଥିତ ଥିଲେ। କେନ୍ଦ୍ରରେ କୈାଣସି ରେକର୍ଡ ବା ରେଜିଷ୍ଟର ନଥିଲା। ଏହାବ୍ୟତିତ ସଂପୃକ୍ତ ଅଙ୍ଗନୱାଡିକର୍ମୀ ଭି. ଏଚ. ଏନ. ଡି., ଇମୁନାଇଜେସନ ଓ ଗୃହ ପରିଦର୍ଶନରେ ଉପସ୍ଥିତ ରହୁନଥିବା ତଦନ୍ତରୁ ଜଣାପଡିଥିଲା। ପ୍ରତିବର୍ଷ ସରକାର ଶିଶୁଙ୍କ ଖେଳନା ପାଇଁ ଅର୍ଥ ଦେଉଥିବା ବେଳେ ସେହି କେନ୍ଦ୍ରରେ କୈାଣସି ଖେଳଣା ନଥିବାର ତଦନ୍ତ କମିଟି ଦେଖିବାକୁ ପାଇଥିଲା। ସରକାରଙ୍କ ନୂଆ ସ୍କିମ ସମ୍ପର୍କରେ ହିତାଧିକାରୀମାନେ ଅବଗତ ନଥିବା ଦେଖାଯାଇଥିଲା। ସମନ୍ୱିତ ଶିଶୁ ବିକାଶ ଯୋଜନାର ୬ଟି ସେବା ମଧ୍ୟରୁ କୈାଣସି ଗୋଟିଏ ମଧ୍ୟ ସେବାର ନମୁନା ସଂପୃକ୍ତ କେନ୍ଦ୍ରର କର୍ମୀ ତଦନ୍ତ କମିଟିକୁ ଦେଖାଇପାରିନଥିଲେ। ସେହି କେନ୍ଦ୍ରର ସହାୟିକା ଅବସର ନେବା ପରଠାରୁ ନିୟମିତ ରୋଷେଇ କରାନଯାଇ ଶିଶୁଙ୍କୁ ବିସ୍କୁଟ ଦିଆଯାଉଥିବା ଗ୍ରାମବାସୀଙ୍କ ଉପସ୍ଥିତିରେ ଅଙ୍ଗନୱାଡିକର୍ମୀ ନିଜେ ସ୍ୱୀକାର କରିଥିଲେ। ଏଥିସହିତ ଟିଏଚଆର ବଣ୍ଟନରେ କର୍ମୀ ବ୍ୟତିକ୍ରମ କରିଥିବା ପ୍ରମାଣିତ ହୋଇଥିବା ତଦନ୍ତ କମିଟି ଜାଣିବାକୁ ପାଇଥିଲା। ସଂପୃକ୍ତ କର୍ମୀଙ୍କ ଏତାଦୃଶ ମନମୁଖୀ କାର୍ଯ୍ୟ କେନ୍ଦ୍ର ପରିଚାଳନା ଓ କୋମଳମତି ଶିଶୁମାନଙ୍କ ବିକାଶ ଉପରେ ବାଧା ସୃଷ୍ଟି କରିଥିବା ତଦନ୍ତ କମିଟି ଉପଲବ୍ଧି କରିଥିଲେ। ଏସମ୍ପର୍କରେ ଆଳିର ଶିଶୁ ବିକାଶ ପ୍ରକଳ୍ପ ଅଧିକାରୀ ସଂପୃକ୍ତ କେନ୍ଦ୍ରର କର୍ମୀଙ୍କୁ ତିନିଦିନ ମଧ୍ୟରେ କୈଫିୟତ ଦେବାକୁ ତା୫.୦୪.୨୦୨୪ରିଖରେ କାରଣ ଦର୍ଶାଅ ନୋଟିସ ପଠାଇଥିଲେ। କିନ୍ତୁ ପରବର୍ତ୍ତୀ ସମୟରେ ଶିଶୁ ବିକାଶ ପ୍ରକଳ୍ପ ଅଧିକାରୀ ଏହି ଘଟଣାରେ ଆଉ କୈାଣସି କାର୍ଯ୍ୟାନୁଷ୍ଠାନ ଗ୍ରହଣ କରିନଥିଲେ। ତେଣୁ ସୂଚନା ଅଧିକାର କର୍ମୀ ଦୁଷ୍ମନ୍ତ ନାରାୟଣ ଆଚାର୍ଯ୍ୟ ଏସମ୍ପର୍କରେ ଆଳି ବ୍ଲକର ଶିଶୁ ବିକାଶ ପ୍ରକଳ୍ପ ଅଧିକାରୀ, ଜିଲ୍ଲା ସମାଜ ମଙ୍ଗଳ ଅଧିକାରୀ, ଉପଜିଲ୍ଲାପାଳ, ଜିଲ୍ଲାପାଳ ଓ ମହିଳା ଏବଂ ଶିଶୁ ବିକାଶ ବିଭାଗର ଶାସନ ସଚିବଙ୍କୁ ଏସମ୍ପର୍କରେ ବାରମ୍ବାର ଅଭିଯୋଗ ଓ ଅବଗତ କରିଥିଲେ ମଧ୍ୟ କୈାଣସି ସୁଫଳ ପାଇନଥିଲେ। ଫଳରେ ଏନେଇ ଓଡିଶା ଉଚ୍ଚ ନ୍ୟାୟାଳୟରେ ଶ୍ରୀ ଆଚାର୍ଯ୍ୟ ଡବ୍ଲୁପିସି ନଂ- ୩୧୩୯୯/୨୦୨୫ରେ ଏକ ରିଟପିଟିସନ ଦାୟର କରିଥିଲେ। ସେହି ରିଟପିଟିସନର ବିଚାର କରି ଉଚ୍ଚ ନ୍ୟାୟାଳୟ ଉପରୋକ୍ତ ଆଦେଶ ଦେଇଛନ୍ତି। ଆବେଦନକାରୀଙ୍କ ପକ୍ଷରୁ ଆଇନଜୀବୀ ଶ୍ରୀ ଅଖଣ୍ଡ କୋର୍ଟରେ ମକ୍କଦ୍ଦମା ପରିଚାଳନା କରୁଥିଲେ।