ଦିଗପହଣ୍ଡିରେ ଅସାମାଜିକ ଯୁବକଙ୍କ ଦୋରାତ୍ମ୍ୟ: ପୋଲିସ ପାଟ୍ରୋଲିଂ କଡାକଡି କରିବାକୁ ଦାବୀ

ଦିଗପହଣ୍ଡି, (ଅଳକ ନାଥ ମିଶ୍ର)ଦିଗପହଣ୍ଡି ସହରରେ ଅସାମାଜିକ ଯୁବକଙ୍କ ଦୌରାତ୍ମ୍ୟ ବୃଦ୍ଧି ପାଇଥିବାରୁ ସୋମବାର ଦିନ ସହରର ସଚେତନ ନାଗରିକ ଦିଗପହଣ୍ଡି ଥାନା ଭାରପ୍ରାପ୍ତ ଆଇଆଇସି ତଥା ଡିଏସପି ପ୍ରଶାନ୍ତ କୁମାର ପାତ୍ର ଏବଂ ଦିଗପହଣ୍ଡି ତହସିଲଦାର ତଥା କାର୍ଯ୍ୟ ନିର୍ବାହୀ ମାଜିଷ୍ଟ୍ରେଟ ଦାୟିତ୍ବରେ ଥିବା ଅତିରିକ୍ତ ତହସିଲଦାର ଆଶିଷ କୁମାର ନାୟକଙ୍କୁ ଭେଟି ସ୍ମାରକପତ୍ର ପ୍ରଦାନ କରିଛନ୍ତି।ବଜାର ସାହି, ଜନତା ଲେନ୍, ମେଡିକାଲ ରୋଡ଼ ସମେତ ବିଭିନ୍ନ ପାର୍କ, ବାଳିକା ହାଇସ୍କୁଲ, ମହିଳା ମହାବିଦ୍ୟାଳୟ ନିକଟରେ ସାହାଣୀ ବାଉରୀ ସାହିର କିଛି ନିର୍ଦ୍ଧିଷ୍ଟ ଯୁବକ ଓ ସେମାନଙ୍କ ସହଯୋଗୀ ମାନେ ଆଡ୍ଡା ଜମାଇ ଛାତ୍ରୀ ମାନଙ୍କୁ ଅସଦାଚରଣ କରୁଥିବା ସ୍ମାରକପତ୍ରରେ ଅଭିଯୋଗ କରାଯାଇଛି। ଅସାମାଜିକ ଯୁବକ ମାନେ ବିଭିନ୍ନ ସ୍ଥାନରୁ ମୂଲ୍ୟବାନ ସାମଗ୍ରୀ ଚୋରି କରିବା ସହ ସିସିଟିଭି କ୍ୟାମେରା, ସିମେଣ୍ଟ ତିଆରି ଚେୟାର, ପାଣି ପାଇପ୍ ମିଟର, ବ୍ୟାୟାମ ଯନ୍ତ୍ରାଂଶ ଭଳି ସରକାରୀ ତଥା ସର୍ବସାଧାରଣ ସମ୍ପତ୍ତି ଗୁଡ଼ିକୁ ନଷ୍ଟ କରି ଦେଉଛନ୍ତି। ବିଭିନ୍ନ ସ୍ଥାନରେ ପଥଚାରୀଙ୍କୁ ଆକ୍ରମଣ କରି ଲୁଟପାଟ ଚଳାଇଥିଲେ ମଧ୍ୟ ପୋଲିସର ଉଦାସୀନତା ସହରବାସୀଙ୍କୁ ତାଜୁବ କରିଛି।ଗତ କିଛି ଦିନ ତଳେ ଜଣେ ମାଛ ବ୍ୟବସାୟୀଙ୍କୁ ନିସ୍ତୁକ ମାଡ଼ ମାରି ଲହୁଲୁହାଣ କରିଥିବା ଅସାମାଜିକ ଯୁବକ ମାନେ ଅଭିଯୋଗକାରୀ ଓ ତାଙ୍କ ସମ୍ପର୍କୀୟ ମାନଙ୍କୁ ଖୋଲା ଚ୍ୟାଲେଞ୍ଜ ଓ ଧମକ ଦେଉଥିବାରୁ ତୁରନ୍ତ ସେମାନଙ୍କୁ ଗିରଫ କରିବାକୁ ଦାବୀ ହୋଇଛି। ପୋଲିସ ପାଟ୍ରୋଲିଂ କଡାକଡି କରି ସହରର ଶାନ୍ତ ପରିବେଶ ଫେରାଇବା ଦିଗରେ ପୋଲିସ ବିଫଳ ହେଲେ ଦିଗପହଣ୍ଡି ନାଗରିକ କମିଟି ପକ୍ଷରୁ ଆନ୍ଦୋଳନାତ୍ମକ ପନ୍ଥା ଗ୍ରହଣ କରାଯିବ ବୋଲି ଚେତାବନୀ ଦିଆଯାଇଛି। ସ୍ମାରକପତ୍ର ପ୍ରଦାନ ସମୟରେ ଏନଏସି ଅଧ୍ୟକ୍ଷ ପ୍ରଫୁଲ୍ଲ ପଣ୍ଡା, ଉପାଧ୍ୟକ୍ଷା ପ୍ରତିନିଧି କାପୁଲୁ କୁନା,କାଉନସିଲର ଦୀପକ କୁମାର ମିଶ୍ର, ସୁନିଲ୍ କୁମାର ପଣ୍ଡା, ଆଇନଜୀବି ହରପ୍ରସାଦ ରଥ, ରସାନନ୍ଦ ରାଉତଙ୍କ ସମେତ ବହୁ ବୁଦ୍ଧିଜୀବୀ ଉପସ୍ଥିତ ଥିଲେ।