କାର ଧକ୍କାରେ ବାଇକ ଚାଳକ ଗୁରୁତର:ଉତ୍ତେଜିତ ଲୋକଙ୍କ ରାସ୍ତା ଅବରୋଧ

ଦିଗପହଣ୍ଡି,(ଅଳକ ନାଥ ମିଶ୍ର) ଦିଗପହଣ୍ଡି – ବ୍ରହ୍ମପୁର ୧୭ ନଂ ରାଜ୍ୟ ରାଜପଥ ର  ଖେମୁଣ୍ଡି କାଳୁଆ ଛକଠାରେ ବୁଧବାର ଅପରାହ୍ନ ପ୍ରାୟ ୨ ଟାରେ ଏକ ଦ୍ରୁତଗାମୀ କାର ଧକ୍କାରେ ଜଣେ ବାଇକ ଚାଳକ ଗୁରୁତର ହୋଇଥିବା ଜଣାପଡିଛି । ଗୁରୁତର ବାଇକ ଚାଳକ ଜଣକ ହେଲେ ଦିଗପହଣ୍ଡି ଥାନା ସିଦ୍ଧେଶ୍ୱର ପଞ୍ଚାୟତ ଗୋପାଳପୁର ଗ୍ରାମର ଉଦୟନାଥ ସ୍ବାଇଁଙ୍କ ଏକମାତ୍ର ପୁଅ ଜଗନ କୁମାର ସ୍ବାଇଁ (୨୩) । ଦୁର୍ଘଟଣା ସ୍ଥଳରେ  ଉତ୍ତେଜନା ପ୍ରକାଶ ପାଇଥିଲା। ପରେ ଉତ୍ତେଜିତ ଲୋକେ  ଟାୟାର ଜାଳି ରାସ୍ତା ଅବରୋଧ କରିଥିଲେ।ଫଳରେ ବ୍ରହ୍ମପୁର – ରାୟଗଡ଼ା – କୋରାପୁଟ – ମାଲକାନାଗିରି ଜିଲା କୁ ଯାଉଥିବା ଗାଡ଼ି ଅଟକି ରହିଥିଲା। ଜଗନ ନିଜ ବାଇକ ନଂ. ( ଓଡି ୦୭ ଏକେ ୨୮୩୯) ଯୋଗେ ନିଜ ମାଆ ସୁଦଷ୍ଣା ସ୍ବାଇଁଙ୍କୁ ଆଣିବା ନିମନ୍ତେ ଗଣିଆନାଳ ଛକକୁ ଯାଉଥିଲେ । ଏହି ସମୟରେ ବ୍ରହ୍ମପୁର ଅଞ୍ଚଳର ୩  ଯୁବକ ଏକ କାର ନଂ. ( ଓ ଆର୍ ୦୭ ଜେଡ୍ ୪୨୩୨) ଯୋଗେ ମା ‘ନିଜ ବାଙ୍କେଶ୍ବରୀ ପୀଠକୁ ଏକ ଭୋଜି କାର୍ଯ୍ୟରେ ଯୋଗଦେବା ପାଇଁ ଦ୍ରୁତ ଗତିରେ ଯିବା ବାଟରେ ଜଗନଙ୍କ ବାଇକକୁ ଧକ୍କା ଦେଇଥିଲେ । ଏହି ଦୁର୍ଘଟଣାରେ କାରଟିର ସମ୍ମୁଖ ଭାଗ ସମ୍ପୂର୍ଣ୍ଣ ନଷ୍ଟ ହୋଇଥିବା ବେଳେ ବାଇକ ସହ ଜଗନ୍ ରାସ୍ତାକଡ ର  ବିଲ ଭିତରକୁ ଛିଟିକି ପଡ଼ିଥିଲେ । ରାସ୍ତାରେ ଯା ଆସ କରୁଥିବା ଲୋକେ  ଗୁରୁତର ଅବସ୍ଥାରେ ଜଗନକୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ବ୍ରହ୍ମପୁର ବଡ଼ମେଡ଼ିକାଲ ପଠାଇଥିଲେ । ପ୍ରାଥମିକ ଚିକିତ୍ସା ପରେ ଅବସ୍ଥା ସଂକଟାପନ୍ନ ଥିବାରୁ ତାଙ୍କୁ ଭୁବନେଶ୍ୱର ସ୍ଥିତ ଏମ୍ସ କୁ ସ୍ଥାନାନ୍ତରିତ କରାଯାଇଥିବା ସୂଚନା ମିଳିଛି । ଅପରପକ୍ଷରେ ଉତ୍ତ୍ୟକ୍ତ  ଲୋକେ କାର୍ ରେ ଥିବା ୩ ଯୁବକଙ୍କୁ କାବୁ କରି ଦିଗପହଣ୍ଡି ପୋଲିସରେ ଜିମା ଦେବା ସହ କ୍ଷତିପୂରଣ ଦାବିରେ ରାସ୍ତାରୋକ କରିଥିଲେ । ଦିଗପହଣ୍ଡି ପୋଲିସ ଓ ଚିକିଟି ଏସଡିପିଓ ବିଶ୍ଵାମିତ୍ର ହରପାଲ ଉତ୍ୟକ୍ତ ଲୋକଙ୍କୁ ବୁଝାସୁଝା କରିବା ପରେ ରାସ୍ତା ଅବରୋଧ ହଟିଥିଲା ।  ପୋଲିସ ଦୁର୍ଘଟଣାଗ୍ରସ୍ତ ଦୁଇଟି ଗାଡ଼ି ଜବତ କରି ଥାନାକୁ ନେଇଛନ୍ତି। ସ୍ଥାନୀୟ ସରପଞ୍ଚ ବିଜୟ ପ୍ରଧାନ ଏବଂ ସମିତି ସଭ୍ୟ ପ୍ରତିନିଧି ବାବୁନି ପ୍ରଧାନଙ୍କ ସମେତ  ପରିବାର ଲୋକେ ଦିଗପହଣ୍ଡି ଥାନାରେ ପହଞ୍ଚି ଏତଲା ଦେଇଥିବା ଜଣାପଡିଛି ।