ଉଠାଣିସ୍ଥିତ ଶୁଖିଲାହାର ସାମିଲ ମହୁଲିଆ ଅଙ୍ଗନବାଡ଼ି ଛାତରୁ ଖସୁଛି ସିମେଣ୍ଟ କଂକ୍ରିଟ ଖଣ୍ଡ: ପ୍ରଶାସନର କୌଣସି ଦୃଷ୍ଟି ନାହିଁ

ବେତନଟୀ ( ଉଦିତ କୁମାର ପରିଡା ) : ମୟୂରଭଞ୍ଜ ଜିଲ୍ଲା ବେତନଟୀ ବ୍ଲକ ଅନ୍ତର୍ଗତ ସୁଖିଲାହାର ଅଞ୍ଚଳର ମହୁଲିଆ ଅଙ୍ଗନବାଡ଼ି କେନ୍ଦ୍ରରେ ଏକ ଗମ୍ଭୀର ସମସ୍ୟା ଦେଖାଦେଇଛି। ଏହି କେନ୍ଦ୍ରର ଛାତରୁ ସିମେଣ୍ଟ କଂକ୍ରିଟର ଖଣ୍ଡ ଖସୁଥିବା ଯୋଗୁଁ ଏଠାକୁ ଆସୁଥିବା ଗର୍ଭବତୀ ମହିଳା ଓ ଛୋଟ ଛୋଟ ପିଲାଙ୍କ ଜୀବନ ବିପଦ ମୁହାଁ ହୋଇଛି। ଏହି ଅଙ୍ଗନବାଡ଼ି କେନ୍ଦ୍ର, ଯେଉଁଠାରେ ଗର୍ଭବତୀ ମହିଳାଙ୍କୁ ସ୍ୱାସ୍ଥ୍ୟ ପରୀକ୍ଷା ଓ ପିଲାଙ୍କୁ ପୁଷ୍ଟିକର ଖାଦ୍ୟ ଓ ଶିକ୍ଷା ଯୋଗାଇ ଦିଆଯାଉଛି, ସେଠାରେ ଏଭଳି ଅବହେଳିତ ଅବସ୍ଥା ସ୍ଥାନୀୟ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ଓ ଆତଙ୍କ ସୃଷ୍ଟି କରିଛି। ସ୍ଥାନୀୟ ସୂଚନା ଅନୁସାରେ, ଅଙ୍ଗନବାଡ଼ିର ଭିତ୍ତିଭୂମି ଅତ୍ୟନ୍ତ ଜର୍ଜରିତ ଅବସ୍ଥାରେ ରହିଛି। ଛାତରେ ଫାଟ ଦେଖାଯାଇଛି, ଯେଉଁଥିରୁ ସିମେଣ୍ଟର ଖଣ୍ଡ ଖସି ପଡ଼ୁଛି। ଏହା କେବଳ ଅଙ୍ଗନବାଡ଼ି କର୍ମଚାରୀଙ୍କ ପାଇଁ ନୁହେଁ, ବରଂ ଏଠାକୁ ନିୟମିତ ଆସୁଥିବା ଗର୍ଭବତୀ ମା’ ଏବଂ ଶିଶୁମାନଙ୍କ ପାଇଁ ଏକ ବଡ଼ ବିପଦ ସାଜିଛି। ଯେକୌଣସି ସମୟରେ ବଡ଼ ଦୁର୍ଘଟଣା ଘଟିବାର ଆଶଙ୍କା ରହିଛି, ଯାହା ଜୀବନହାନୀର କାରଣ ହୋଇପାରେ। ସ୍ଥାନୀୟ ଅଭିଭାବକ ଓ ଅଙ୍ଗନବାଡ଼ି କର୍ମଚାରୀମାନେ ଏହି ସମସ୍ୟା ନେଇ ବାରମ୍ବାର ବିଭାଗୀୟ ଅଧିକାରୀଙ୍କୁ ଅବଗତ କରାଇଥିଲେ ମଧ୍ୟ, ଏପର୍ଯ୍ୟନ୍ତ କୌଣସି ମରାମତି କାର୍ଯ୍ୟ ଆରମ୍ଭ ହୋଇନାହିଁ। ଏହାକୁ ଅବହେଳା ଓ ଦାୟିତ୍ୱହୀନତାର ପରିଚାୟକ ଭାବେ ଗ୍ରାମବାସୀ ଅଭିଯୋଗ କରିଛନ୍ତି। ଏକ ଗର୍ଭବତୀ ମହିଳା ନାମ ପ୍ରକାଶ ନ କରିବା ସର୍ତ୍ତରେ କହିଛନ୍ତି, “ଆମେ ଏଠାକୁ ଆସିବାକୁ ଭୟ କରୁଛୁ, କାରଣ ଯେକୌଣସି ସମୟରେ ଛାତରୁ ଖଣ୍ଡ ଖସି ଆମ ପିଲା କିମ୍ବା ଆମ ଉପରେ ପଡ଼ିପାରେ।” ଏହି ଅଙ୍ଗନବାଡ଼ି କେନ୍ଦ୍ର ଗର୍ଭବତୀ ମହିଳା ଓ ଶିଶୁଙ୍କ ସ୍ୱାସ୍ଥ୍ୟ ଓ ପୁଷ୍ଟି ସୁନିଶ୍ଚିତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଥିବା ବେଳେ, ଏଭଳି ଜର୍ଜରିତ ଅବସ୍ଥା ସରକାରୀ ଯୋଜନାର ଉଦ୍ଦେଶ୍ୟକୁ ବିଫଳ କରୁଛି। ଗ୍ରାମବାସୀ ଓ ସ୍ଥାନୀୟ ସମାଜସେବୀ ମାନେ ତୁରନ୍ତ ଏହି ଅଙ୍ଗନବାଡ଼ିର ମରାମତି କାର୍ଯ୍ୟ ଆରମ୍ଭ କରିବାକୁ ଏବଂ ସୁରକ୍ଷିତ ପରିବେଶ ସୁନିଶ୍ଚିତ କରିବାକୁ ଜିଲା ପ୍ରଶାସନ ଓ ମହିଳା ଓ ଶିଶୁ ବିକାଶ ବିଭାଗକୁ ଦାବି କରିଛନ୍ତି। ଏହି ସମସ୍ୟାର ତୁରନ୍ତ ସମାଧାନ ନ ହେଲେ ଏକ ବଡ଼ ଦୁର୍ଘଟଣା ଘଟିବାର ଆଶଙ୍କା ରହିଛି। ସରକାରୀ ଅଧିକାରୀଙ୍କୁ ଏହି ଗୁରୁତର ବିଷୟରେ ତତ୍କାଳ ପଦକ୍ଷେପ ନେବାକୁ ଅଞ୍ଚଳବାସୀ ଜୋରଦାର ଦାବି କରୁଛନ୍ତି, ଯାହା ଦ୍ୱାରା ଗର୍ଭବତୀ ମହିଳା ଓ ଶିଶୁମାନଙ୍କ ଜୀବନ ସୁରକ୍ଷିତ ରହିପାରିବ।