ସମ୍ବିଧାନ ଦିବସ ପାଳନ
ବନ୍ତ,(ଚାନ୍ଦିନୀ ମହାନ୍ତି) : ବନ୍ତ ବ୍ଲକ ଆଗରପଡା ମହାବିଦ୍ୟାଳୟ +୩ ଏନ୍ଏସଏସ ଆନୁକୂଲ୍ୟରେ ୭୬ ତମ ସମ୍ବିଧାନ ଦିବସ ପାଳିତ ହୋଇଯାଇଛି । ଇଂରାଜୀ ବିଭାଗ ମୁଖ୍ୟ ବ୍ରଜମୋହନ ପତିଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ରାଜନୀତି ବିଭାଗ ମୁଖ୍ୟ ନିରଞ୍ଜନ ପାଲ ସମ୍ବିଧାନ ପ୍ରସ୍ତାବନାର ଶପଥପାଠ କରାଇବା ସହିତ ଦିବସର ଲକ୍ଷ୍ୟ ଓ ଉଦ୍ଦେଶ୍ୟ ଉପରେ ଆଲୋକପାତ କରିଥିଲେ । ଇତିହାସ ବିଭାଗର ଅଧ୍ୟାପକ ସେକ୍ ଅବୁଦୁଲ୍ ଗଫର ଅଲ୍ଲୀ ଭାରତ ପରି ଏକ ବିଶାଳ ଗଣତାନ୍ତ୍ରିକ ରାଷ୍ଟ୍ରରେ ବିଭିନ୍ନତା ମଧ୍ୟରେ ଏକତା ରକ୍ଷା କରିବାରେ ସମ୍ବିଧାନର ଭୂମିକା ଗୁରୁତ୍ୱପୂର୍ଣ୍ଣ ବୋଲି କହିଥିଲେ । ଅନ୍ୟମାନଙ୍କ ମଧ୍ୟରେ ଅଧ୍ୟାପକ ହରେକୃଷ୍ଣ ଆଇଚ, ସତ୍ୟବ୍ରତ ଦେ, ମୁଖ୍ୟ ସହାୟକ ଅଶୋକ କୁମାର ସାହୁ ପ୍ରମୁଖ ସମ୍ବିଧାନ ଦିବସ ସମ୍ପର୍କରେ ବକ୍ତବ୍ୟ ରଖିଥିଲେ । ଶ୍ରୀ ପତି ତାଙ୍କ ସଭାପତି ଅଭିଭାଷଣରେ ଭାରତୀୟ ସମ୍ବିଧାନର ଭୂମିକା ଉପରେ କହିଥିଲେ । ଜାତୀୟ ସେବା ଯୋଜନାର ପ୍ରଯୋଜକ ଅଧିକାରୀ ଅଧ୍ୟାପକ ପ୍ରକାଶ କୁମାର ରାଉତ ଧନ୍ୟବାଦ ଅର୍ପଣ କରିଥିଲେ । ଏଥିରେ ମହାବିଦ୍ୟାଳୟର ଅଧ୍ୟାପକ, ଅଧ୍ୟାପିକା, କର୍ମଚାରୀ ଓ ଛାତ୍ରଛାତ୍ରୀ ମାନେ ଉପସ୍ଥିତ ଥିଲେ ।
