ଆଖୁଚାଷର ବହୁଳ ପ୍ରସାର ସଂକ୍ରାନ୍ତୀୟ ସମନ୍ୱୟ ବୈଠକ
ଆସିକା (ୱାଇଏନ୍ଏସ୍): ଗଞ୍ଜାମ ଜିଲ୍ଲାର ଏକମାତ୍ର କୃଷିଭିତ୍ତିକ ଶିଳ୍ପାନୁଷ୍ଠାନ ରୂପେ ସୁଖ୍ୟାତି ଅର୍ଜନ କରି ଉନ୍ନତମାନର ଚିନି ଓ ବୋତଲ ମଦ ଉତ୍ପାଦନ କରିବାରେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଥିବା ଆସିକା ସମବାୟ ଚିନିଶିଳ୍ପ ଲିଃ ପରିସରଭୁକ୍ତ ଅଞ୍ଚଳରେ ଯେପରି ଆଗାମୀ ଦିନରେ ଆଖୁଚାଷର ବହୁଳ ପ୍ରଚାର ଓ ପ୍ରସାର ହୋଇପାରିବ ଏବଂ ଆଖୁଚାଷୀମାନେ ଯେପରି ଆଖୁଚାଷ କରିବା ଲାଗି ଆଗ୍ରହ ସୃଷ୍ଟି କରିପାରିବେ ସେ ସଂକ୍ରାନ୍ତରେ ରୂପରେଖ ପ୍ରସ୍ତୁତ କରିବା ପାଇଁ ଗଞ୍ଜାମ ଜିଲ୍ଲାପାଳଙ୍କ ସମ୍ମିଳନୀ କକ୍ଷରେ ଛତ୍ରପୁରରେ ଏକ ସମନ୍ୱୟ ବୈଠକ ଅନୁଷ୍ଠିତ ହୋଇଯାଇଛି । ଗଞ୍ଜାମ ଜିଲ୍ଲାପାଳ ଭି.କୀର୍ତ୍ତିଭାସନଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ଆଖୁଚାଷର ବହୁଳ ପ୍ରସାର ସଂକ୍ରାନ୍ତୀୟ ଏହି ସମନ୍ୱୟ ବୈଠକରେ ସମବାୟ ଚିନିଶିଳ୍ପର ପରିଚାଳନା ନିର୍ଦ୍ଦେଶକ ଡଃ ସୁଶାନ୍ତ କୁମାର ପଣ୍ଡା, ପରିଚାଳନା ପରିଷଦର ସଭାପତି ରବିନ୍ଦ୍ର ପଣ୍ଡା, ସଂପାଦକ ସନ୍ତୋଷ କୁମାର ମଲିକ, ଆକାଉଣ୍ଟସ୍ ଅଫିସର ଚିତ୍ତ ଚିନ୍ମୟ ରଂଜନ ନାୟକ, ବରିଷ୍ଠ ପରିଚାଳକ (ପ୍ରକ୍ରିୟାକରଣ) ତଥା ଭାରପ୍ରାପ୍ତ ଆଖୁ ପରିଚାଳକ ଶ୍ରୀନିବାସ ମହାପାତ୍ର, ମୁଖ୍ୟଯନ୍ତ୍ରୀ ଇଂ କେଦାରନାଥ ସାହୁ, ସମବାୟ ଚିନିଶିଳ୍ପର ପରିଚାଳନା ପରିଷଦର ସଦସ୍ୟ ରତ୍ନାକର ସାହୁ, ଧରୁମୁ ପ୍ରଧାନ, ନିରଞ୍ଜନ ପ୍ରଧାନ, ଉଦୟନାଥ ପ୍ରଧାନ, ସରିତ ପ୍ରଧାନ, ସମବାୟ ସମିତି ସମୂହ ବ୍ରହ୍ମପୁର ମଣ୍ଡଳର ଭାରପ୍ରାପ୍ତ ଉପନିବନ୍ଧକ ଯୋଗମାୟା ସାବତ, ଆସିକା ସମବାୟ ଚିନିଶିଳ୍ପର ଆଖୁ ଉନ୍ନୟନ ପର୍ଯ୍ୟବେକ୍ଷକ ବାଇଧର ନାହାକ, ଚିରଞ୍ଜିବୀ ମହାନ୍ତି, ଧ୍ରୁବଚରଣ ସାହୁ, ଆଖୁବିଭାଗର ମୁଖ୍ୟ କିରାଣୀ ପ୍ରଶାନ୍ତ କୁମାର କର, ଆକାଉଣ୍ଟସ୍ ବିଭାଗ କିରାଣୀ ବିକାଶ ପଟ୍ଟନାୟକଙ୍କ ସମେତ ଜାତୀୟକରଣ ବ୍ୟାଙ୍କର ପଦାଧିକାରୀ, କୃଷିବିଭାଗ, ଜଳସଂପଦ ବିଭାଗ ଓ ବନବିଭାଗର ପଦାଧିକାରୀମାନେ ଯୋଗଦେଇ ଆଲୋଚନାରେ ଅଂଶଗ୍ରହଣ କରିଥିଲେ । ଆସନ୍ତା ଜାନୁୟାରୀ ମାସରେ ଆସିକା ସମବାୟ ଚିନିଶିଳ୍ପର ଆଖୁପେଡା ଋତୁ ଆରମ୍ଭ ହେବାକୁ ଥିବା ବେଳେ ଆଖୁଚାଷୀ ସଂଘର ଦାବୀକୁ ସମ୍ମାନ ଜଣାଇ ଚଳିତ ବର୍ଷ ଆଖୁଚାଷୀଙ୍କୁ ଆଖୁଦର ପ୍ରତି ମେଟ୍ରିକଟନ୍ ପିଚ୍ଛା ୩୭୦୦ ଟଙ୍କା ସହିତ ବୋନସ୍ ବାବଦକୁ ୩୦୦ ଟଙ୍କା ମିଶାଇ ସମୂଦାୟ ୪୦୦୦ ଟଙ୍କା ଦେବାକୁ ଧାର୍ଯ୍ୟ କରାଯାଇଥିବା ଜଣାପଡିଛି । ସେହିଭଳି ଆସନ୍ତା ୨୦୨୬-୨୭ ଆଖୁପେଡା ଋତୁରେ ଆଖୁର ପରିମାଣ ୬୦ ହଜାର ମେଟ୍ରିକ୍ଟନ୍ରୁ ଉର୍ଦ୍ଧ୍ୱ ହେଲେ ଚାଷୀଙ୍କୁ ଆଖୁଦର ମେଟ୍ରିକଟନ୍ ପିଚ୍ଛା ୪୦୦୦ ଟଙ୍କା ଓ ବୋନସ୍ ବାବଦକୁ ୫୦୦ ଟଙ୍କା ମିଶାଯାଇ ସମୂଦାୟ ୪୫୦୦ ଟଙ୍କା ଦେବା ପାଇଁ ଧାର୍ଯ୍ୟ କରାଯାଇଥିବା ଜଣାପଡିଛି । ଶ୍ରମିକଙ୍କ ଅଭାବଜନିତ ସମସ୍ୟାର ସମାଧାନ ପାଇଁ କୃଷି ଯନ୍ତ୍ରପାତିର ବ୍ୟବହାର ଓ କ୍ଷେତରୁ ଆଖୁକୁ କାଟିବା, ବୋଝେଇ କରିବା ଏବଂ ଗାଡିରୁ ଅନ୍ଲୋଡ୍ କରିବା ନିମନ୍ତେ ଆବଶ୍ୟକ ପଡୁଥିବା ଶ୍ରମିକ ନିଯୁକ୍ତି ପାଇଁ ଟେଣ୍ଡେର ପ୍ରକ୍ରିୟା କରିବା ସାଙ୍ଗକୁ ଜବରଦଖଲକାରୀଙ୍କ କବଳରେ ଥିବା ଆସିକା ସମବ୍ୟା ଚିନିଶିଳ୍ପକୁ ମୂଲ୍ୟବାନ୍ ଜାଗାକୁ ଉଦ୍ଧାର କରିବା ସମେତ ବିଭିନ୍ନ ବିଷୟ ଉପରେ ପୁଙ୍ଖାନୁପୁଙ୍ଖ ଭାବେ ଆଲୋଚନା କରାଯାଇଥିବା ଲକ୍ଷ୍ୟ କରାଯାଇଥିଲା । ଆସିକା ସମବାୟ ଚିନିଶିଳ୍ପର ପରିଚାଳନା ନିର୍ଦ୍ଦେଶକ ଡଃ ସୁଶାନ୍ତ କୁମାର ପଣ୍ଡା ଓ ପରିଚାଳନା ପରିଷଦର ସଭାପତି ରବିନ୍ଦ୍ର ପଣ୍ଡାଙ୍କ ଅହରହ ପ୍ରୟାସ, ମାର୍ଗଦର୍ଶନ ଓ ପ୍ରେରଣାରେ ଏହି ପୁରାତନ ଶିଳ୍ପାନୁଷ୍ଠାନ ପ୍ରଗତିପଥରେ ଆଗେଇ ଚାଲିଥିଲା ବେଳେ ସାଂପ୍ରତିକ ପରିସ୍ଥିତିରେ ଗଞ୍ଜାମ ଜିଲ୍ଲାର ଆସିକା, ଧରାକୋଟ, ଶେରଗଡ, ସୋରଡା, ବେଲଗୁଣ୍ଠା, ଜଗନ୍ନାଥପ୍ରସାଦ, ବୁଗୁଡା, ଭଂଜନଗର, ହିଞ୍ଜିଳିକାଟୁ, ପୁରୁଷୋତ୍ତମପୁର, କବିସୂର୍ଯ୍ୟନଗର, ପୋଲସରା, ଖଲିକୋଟ, ବେଗୁନିଆପଡା, ସାନଖେମୁଣ୍ଡି, ଦିଗପହଣ୍ଡି ବ୍ଳକ ପରିସରଭୁକ୍ତ ଅଞ୍ଚଳର ୧୨୧୯ ଏକର ଜମିରେ ଆଖୁଚାଷ କରିଥିଲା ବେଳେ ଆଖୁଚାଷର ବହୁଳ ପ୍ରସାର ପାଇଁ ବ୍ୟାପକ ପଦକ୍ଷେପ ମାନ ନିଆଯାଉଥିବା ଦେଖିବାକୁ ମିଳୁଛି । ଆସିକା ସମବାୟ ଚିନିଶିଳ୍ପରେ ବନ୍ଦ ହୋଇପଡିରହିଥିବା ଡିଷ୍ଟିଲେରୀ ୟୁନିଟ୍କୁ କାର୍ଯ୍ୟକ୍ଷମ କରିବା ସାଙ୍ଗକୁ ଉତ୍ପାଦିତ ଆସିକା ଫର୍ଟିର ବୋତଲକୁ ଆହୁରି ଅଧିକ ଆକର୍ଷଣୀୟ କରିବା ସାଙ୍ଗକୁ ବିଭିନ୍ନ ଚାଷୀକଲ୍ୟାଣକାରୀ ପଦକ୍ଷେପ ଉପରେ ବିସ୍ତୃତ ଭାବେ ଆଲୋଚନା କରାଯାଇଥିବା ଜଣାପଡିଛି । ଆଖୁଚାଷର ବହୁଳ ପ୍ରଚାର ଓ ପ୍ରସାର ପାଇଁ ଜିଲ୍ଲା ପ୍ରଶାସନର ଆହ୍ୱାନକ୍ରମେ ଅନୁଷ୍ଠିତ ହୋଇଥିବା ଏହି ସମନ୍ୱୟ ବୈଠକରେ ବିଭିନ୍ନ ବିଭାଗର ବହୁ ପଦାଧିକାରୀ ଯୋଗଦେଇଥିବା ଲକ୍ଷ୍ୟ କରାଯାଇଥିଲା ।
