ବିରଳା ଟାୟାର୍ସ ଶ୍ରମିକ ସମସ୍ୟା ସମାଧାନ ପାଇଁ ଦାବିପତ୍ର

ବାଲେଶ୍ୱର (ୟୁୂଏନ୍ଏସ୍): ବିରଳା ଟାୟାର୍ସରେ ଦୀର୍ଘବର୍ଷ କାର୍ଯ୍ୟ କରିଆସିଥିବା ଶ୍ରମିକ/କର୍ମଚାରୀମାନଙ୍କୁ ସେମାନଙ୍କର ଆଇନଗତ ପ୍ରାପ୍ୟ ପ୍ରଦାନ ପାଇଁ ଗତ ଜାନୁଆରୀ ୪ ତାରିଖ ଦିନ ରାଜ୍ୟ ସରକାରଙ୍କ ଶିଳ୍ପ ସଚିବଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉଚ୍ଚସ୍ତରୀୟ ବୈଠକର ନିଷ୍ପତ୍ତି ଓ ଅନ୍ୟାନ୍ୟ ସମସ୍ତ ସର୍ତ୍ତଗୁଡ଼ିକୁ ତୁରନ୍ତ କାର୍ଯ୍ୟକାରୀ କରିବାକୁ ବାଲେଶ୍ୱରର ସର୍ବପୁରାତନ ମିଳିତ ଶ୍ରମିକ କର୍ମଚାରୀ ସମନ୍ୱୟ ସମିତି ଟିୟୁଏସିସି ପକ୍ଷରୁ ଶନିବାର ଦିନ ପୂର୍ବାହ୍ନରେ ଜିଲ୍ଲାପାଳଙ୍କୁ ଦାବିପତ୍ର ଦିଆଯାଇଛି। ଟିୟୁଏସିିର ଉପାଧ୍ୟକ୍ଷ ତଥା ଆଇନଜୀବୀ ଶାନ୍ତନୁ ଦାସଙ୍କ ନେତୃତ୍ୱରେ ବିଭିନ୍ନ ଶ୍ରମିକ ସଂଗଠନର ପ୍ରତିନିଧିମାନେ ଡେପୁଟି କଲେକ୍ଟର ଗୀତା ମୁର୍ମୁଙ୍କୁ ସାକ୍ଷାତ କରି ଦାବିପତ୍ର ପ୍ରଦାନ କରିଥିଲେ। ଗତ ଉଚ୍ଚସ୍ତରୀୟ ବୈଠକର ନିଷ୍ପତ୍ତି ଅନୁଯାୟୀ ବାଲେଶ୍ୱର ଜିଲ୍ଲାପାଳଙ୍କୁ ଶ୍ରମିକମାନଙ୍କ ସମସ୍ୟା ଗୁଡ଼ିକର ସୁସମାଧାନ ପାଇଁ ନୋଡ଼ାଲ୍ ଅଫିସରଭାବେ ଦାୟିତ୍ୱ ଦିଆଯାଇଥିଲା। ତେଣୁ ଉପରୋକ୍ତ ନିଷ୍ପତ୍ତିକୁ ତୁରନ୍ତ କାର୍ଯ୍ୟକାରୀ କରି ପୁରାତନ ଶ୍ରମିକମାନଙ୍କୁ ନ୍ୟାୟ ପ୍ରଦାନ ସହ ବିରଳା କାରଖାନାକୁ ପୂର୍ଣ୍ଣ କାର୍ଯ୍ୟକ୍ଷମ କରିବାକୁ ଦାବି କରାଯାଇଛି। ଏହି ଦାବିପତ୍ର ପ୍ରଦାନ ବେଳେ ଟିୟୁଏସିସି ପକ୍ଷରୁ ଭରତ ଚନ୍ଦ୍ର ସେଠୀ, ନିରଞ୍ଜନ ପରିଡ଼ା, ଶରତ ଚନ୍ଦ୍ର ଦଳାଇ, ବନ୍ଦନା ବିଶ୍ୱାସ, ପୂର୍ଣ୍ଣଚନ୍ଦ୍ର ପାତ୍ର, ବିରଳା ଟାୟାର୍ସ ଶ୍ରମିକ ସଂଗଠନମାନଙ୍କର ମିଳିତ ମଞ୍ଚର ପ୍ରତିନିଧି ଦୁକୁଲ ଚନ୍ଦ୍ର ଘଡ଼ାଇ, ସୁବାସ ପ୍ରଧାନ, ସୁବାସ ପାଣିଗ୍ରାହୀ, ଚନ୍ଦନ ଆଚାର୍ଯ୍ୟ, ଚନ୍ଦ୍ରକାନ୍ତ ମାଝୀ, ତ୍ରିନାଥ ପ୍ରଧାନ, ଦୀପକ ସାହୁ, ପୀତବାସ ବିଶ୍ୱାଳ, ଗଦାଧର ବାରିକ, ପ୍ରାଣବନ୍ଧୁ ଦାସ ଓ ପ୍ରଦ୍ୟୁମ୍ନ ମାସନ୍ତ ପ୍ରମୁଖ ଉପସ୍ଥିତ ଥିଲେ। ଟିୟୁଏସିସି ପକ୍ଷରୁ ଆସନ୍ତା ଦଶ ତାରିଖ ଦିନ ବିରଳା ଶ୍ରମିକମାନଙ୍କ ସମସ୍ୟା ଓ ସମାଧାନ ଦାବିକୁ ନେଇ ଏକ ଜିଲ୍ଲାସ୍ତରୀୟ ଆଲୋଚନାଚକ୍ର ଅନୁଷ୍ଠିତ ହେବ ବୋଲି ଟିୟୁଏସିସିର ଅଧ୍ୟକ୍ଷ ପ୍ରଦୀପ୍ତ ପଣ୍ଡା ଓ ସାଧାରଣ ସଂପାଦକ ଗୌରାଙ୍ଗ ପାଣିଗ୍ରାହୀ ଏକ ବିବୃତ୍ତିରେ ପ୍ରକାଶ କରିଛନ୍ତି।