ଅସ୍ତରଙ୍ଗ ସେକ୍ସନ ଅଘୋଷିତ ବିଦ୍ୟୁତ କାଟ ନେଇ ତେଜୁଛି ଅସନ୍ତୋଷ

କାକଟପୁର /ଅସ୍ତରଙ୍ଗ(ଶୁଭାଶିଷ ଖଣ୍ଡୁଆଳ) :-ପୁରୀ ଜିଲ୍ଲା କାକଟପୁର ନିର୍ବାଚନ ମଣ୍ଡଳୀ ଅସ୍ତରଙ୍ଗ ସେକ୍ସନ ଅଂଚଳରେ ଅଘୋଷିତ ବିଦ୍ୟୁତ କାଟ ନେଇ ଅସନ୍ତୋଷ ବଢ଼ିବାରେ ଲାଗିଛି। ବୁଧବାର ସକାଳ ୮ଟାରୁ ବିଦ୍ୟୁତ ସଂଯୋଗ ବିଛିନ୍ନ ହୋଇ ଯାଇଥିବା ବେଳେ ଅପରାହ୍ନ ୩ ଘଟିକା ପରେ ପୁନର୍ବାର ଆସିଥିଲା। ପ୍ରତ୍ୟେକ ଦିନ କିଛି ନାଁ କିଛି ସମୟ ବିଦ୍ୟୁତ କାଟ ହେଉଛି। ଦିନ ତମାମ ଲୋକେ ବିଦ୍ୟୁତ ସେବାରୁ ବଞ୍ଚିତ ହୋଇଥିଲେ। ବିଶେଷ କରି ପାଣି ପମ୍ପ ଚାଲିପାରିନଥିବାରୁ ଲୋକେ ପାଣି ନିମନ୍ତେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଥିଲେ। ସେହିପରି ଅସ୍ତରଙ୍ଗ ବ୍ଲକ ଅଂଚଳର ସମସ୍ତ ସରକାରୀ ଓ ବେସରକାରୀ କାର୍ଯ୍ୟାଳୟରେ କାମ ଠପ୍ ହୋଇଯାଇଥିଲା। ବ୍ୟାଙ୍କ ଗୁଡିକରେ କାରବାର ବାଧାପ୍ରାପ୍ତ ହୋଇଥିଲା। ଜନସେବା କେନ୍ଦ୍ର ଓ ମୋ ସେବା କେନ୍ଦ୍ରକୁ ବିଭିନ୍ନ କାର୍ଯ୍ୟ ନେଇ ଆସିଥିବା ଲୋକେ ନିରାଶ ହୋଇ ଫେରିଥିଲେ।  ଅସ୍ତରଙ୍ଗ ବ୍ଲକ ସ୍ଥିତ ଉକୁଳେଇ ଅସ୍ତରଙ୍ଗ ସେକ୍ସନ ଅଂଚଳରେ ବାରମ୍ବାର ଏଭଳି ଅଘୋଷିତ ବିଦ୍ୟୁତ କାଟ ନେଇ ଉପଭୋକ୍ତା ମହଲରେ ଅସନ୍ତୋଷ ବଢ଼ି ଆନ୍ଦୋଳନ ରୂପ ନେବାକୁ ଯାଉଛି। ଟିପିସିଓଡିଏଲ ବିଦ୍ୟୁତ ବଣ୍ଟନ ଦାୟିତ୍ୱ ନେବା ପରେ ଉପଯୁକ୍ତ ସେବା ପାଇବେ ବୋଲି ଲୋକେ ଯେଉଁ ଆଶା ରଖିଥିଲେ ତାହା ଆଶାରେ ହିଁ ରହିଯାଇଛି। ବରଂ ପୂର୍ବପେକ୍ଷା ଦୁଇଗୁଣ ସମସ୍ୟା ବଢିଛି। ଉପଯୁକ୍ତ ସେବା ନ ଦେଇ କର୍ତ୍ତୃପକ୍ଷ ଉପଭୋକ୍ତାଙ୍କୁ ଶୋଷଣ କରୁଥିବା ଅଭିଯୋଗ ହେଉଛି। ଉପଭୋକ୍ତାଙ୍କ ସମସ୍ୟାକୁ ସମାଧାନ କରିବାକୁ ମାସ ମାସ ବିତି ଯାଉଛି। ପୃଥକ ପୃଥକ ବିଭାଗ ଗୁଡିକ ମଧ୍ୟରେ ସମନ୍ୱୟ ଅଭାବରୁ ଉପଭୋକ୍ତା ହନ୍ତସନ୍ତ ହେବା ସାର ହେଉଛି। ଅସ୍ତରଙ୍ଗ ସେକ୍ସନ ଅଂଚଳରେ ବିଭିନ୍ନ ସମୟରେ ଗଛଡାଳ ଲାଗିବା କିମ୍ବା ଭାଙ୍ଗିବା ପଡିବା ଯୋଗୁଁ ବିଦ୍ୟୁତ ସଂଯୋଗ ବିଛିନ୍ନ ହେଉଛି। ତୁରନ୍ତ ତାହାକୁ ମରାମତି କରାଯାଉନି। ଅନ୍ୟ ପଟେ ଅସ୍ତରଙ୍ଗ ସେକ୍ସନ ରେ ଆବଶ୍ୟକ ମୁତାବକ ଗାଡି ନଥିବା ଓ ସୀମିତ ସଂଖ୍ୟକ କର୍ମଚାରୀ ରହିଥିବାରୁ ମରାମତି କରିବାକୁ ଏକାଧିକ ଦିନ ଲାଗି ଯାଉଛି। ମାସରେ ପ୍ରାୟ ୨୦ଦିନ ବିଦ୍ୟୁତ କାଟ ହେଉଛି। ସନ୍ଧ୍ୟାରେ ବିଜୁଳି ଗଲେ ସକାଳେ କିମ୍ବା ମଧ୍ୟାହ୍ନ ରେ ଆସୁଛି। ବିଦ୍ୟୁତ ଅଚାନକ କଟିଲେ କେତେବେଳେ ଆସିବ ତାହାର ସଠିକ ଉତ୍ତର ମଧ୍ୟ ବିଭାଗୀୟ ଅଧିକାରୀ କି କର୍ମଚାରୀ ଦେଇ ପାରୁନାହାନ୍ତି। ଏଭଳି ସମସ୍ୟା କୁ ନେଇ ଉପଭୋକ୍ତା ଆନ୍ଦୋଳନ କୁ ଓଲ୍ହାଇବାକୁ ସଜବାଜ ହେଲେଣି। ବିଭାଗୀୟ ଉଚ୍ଚ କର୍ତ୍ତୃପକ୍ଷ ତୁରନ୍ତ ଏ ଦିଗରେ ପଦକ୍ଷେପ ନେଇ ସମସ୍ୟାର ସମାଧାନ କରିବାକୁ ଉପଭୋକ୍ତା ମହଲରେ ଦାବୀ ହୋଇଛି।