ବହୁଳ ରାସାୟନିକ ସାର ପ୍ରୟୋଗ ମହୁଚାଷରେ ବାଧକ: ବଢୁଛି ନକଲି ମହୁ ବିକ୍ରି

କାକଟପୁର /ଅସ୍ତରଙ୍ଗ (ଶୁଭାଶିଷ ଖଣ୍ଡୁଆଳ):-ନଦୀ ନାଳ ଘେରା ପୁରୀ ଜିଲ୍ଲା ଅସ୍ତରଙ୍ଗ ଦିନେ ପ୍ରାକୃତିକ ସୌନ୍ଦର୍ଯ୍ୟ ରେ ଭରିଥିଲା। ବସନ୍ତ ଋତୁ ଆସିଲେ ରଙ୍ଗ ବେରଙ୍ଗଫୁଲରେ ସମଗ୍ର ଅଞ୍ଚଳ ମହକି ଉଠୁଥିଲା। ଏଥିପାଇଁ ସେତେବେଳେ ବିଭିନ୍ନ ସ୍ଥାନରେ ମହୁମାଛି ବସା ବାନ୍ଧୁଥିବା ଦେଖିବାକୁ ମିଳୁଥିଲା। ପୁରୀ ଜିଲ୍ଲା ଅସ୍ତରଙ୍ଗ ବ୍ଲକ ଅଞ୍ଚଳ ବିଭିନ୍ନ ଗାଁରେ ମହୁବସା ଦେଖିବାକୁ ମିଳୁଥିଲା। କିନ୍ତୁ ମହୁ ଚାଷ ହ୍ରାସ ପାଇବାରୁ ସରିପୁର ଗ୍ରାମର ବିଜୟ ବିଶ୍ୱାଳ ବାକ୍ସ ମାଧ୍ୟ୍ୟମରେ ମହୁଚାଷ କରିବା ପାଇଁ ବିଭିନ୍ନ ଗ୍ରାମରେ ତାଲିମ୍ ପ୍ରଦାନ କଲେ। ଉତ୍ପାଦିତ ମହୁ ରାଜ୍ୟ ତଥା ରାଜ୍ୟ ବାହାରକୁ ରପ୍ତାନି କରାଗଲା। କିଛି ବର୍ଷ ପୂର୍ବେ ଅସ୍ତରଙ୍ଗ ବ୍ଲକ ଅଞ୍ଚଳ ଚାଷୀ ମାନେ ଏହି ଚାଷରୁ ବେଶ ଭଲ ଦୁଇ ପଇସା ରୋଜଗାର କରୁଥିଲେ। ଧୀରେ ଧୀରେ ପରିବେଶ ବିଗିଡି ଗଲା। ବାଦାମ, ସୋରିଷ, ଧନିଆ ଚାଷ କମିବାରେ ଲାଗିଲା। ଯେଉଁ ଚାଷୀ ଏହି ଚାଷ କଲେ ସେମାନେ ଫସଲରେ ବିପୁଳ ପରିମାଣରେ କୀଟନାଶକ ବ୍ୟବହାର କରିବାରୁ ମହୁମାଛି କମିବାରେ ଲାଗିଲେ। ଆମ୍ବଗଛ କମିବାରୁ ଆମ୍ବ ବଉଳ ମଧ୍ୟ ବିଶେଷ ଭାବେ ଦେଖିବାକୁ ମିଳୁନାହିଁ। ଫଳରେ ଶତାଧିକ ମହୁଚାଷୀ କ୍ଷତିଗ୍ରସ୍ତ ହେଲେ। ସରକାରଙ୍କ ଆନ୍ତରିକତା ଅଭାବରୁ ପ୍ରଶିକ୍ଷଣ ସଠିକ ଦିଆଯାଉ ନାହିଁ। ଏବେ କାଁ ଭାଁ ଚାଷୀ ଏହି ଚାଷ କରୁଥିବା ଦେଖିବାକୁ ମିଳୁଛି। ଅଳ୍ପ ଖର୍ଚ୍ଚରେ ଅଧିକ ଲାଭ ପାଉଥିବା ଚାଷୀ ଏବେ ମହୁମାଛି ସଂଗ୍ରହ କରିବାକୁ ସକ୍ଷମ ହେଉନଥିବା ପ୍ରକାଶ କରିଛନ୍ତି। ସେହିପରି ଚାଷୀ ମାନଙ୍କୁ ମଧ୍ୟ ସରକାରୀ ସ୍ତରରେ ପ୍ରୋତ୍ସାହନ ମିଳୁନଥିବାରୁ ସେମାନେ ଏଥିରୁ ମୁହଁ ମୋଡ଼ୁଛନ୍ତି ଅଭିଯୋଗ କରିଛନ୍ତି। ପୂର୍ବରୁ ଏହି ଅଂଚଳର ପ୍ରାୟ ୫୦ଖଣ୍ଡ ଗ୍ରାମର ଲୋକମାନେ ମହୁଚାଷ କରି ବାର୍ଷିକ ଶହ ଶହ ଟିଣ ମହୁ ଉତ୍ପାଦନ କରୁଥିଲେ। ବର୍ତମାନ ଅସ୍ତରଙ୍ଗ ବ୍ଲକ ଅଞ୍ଚଳର କାଁ ଭାଁ ସ୍ଥାନରେ ଏହି ଚାଷ ହେଉଥିବାରୁ ସେତେଟା ମହୁ ମିଳୁନି।ଅସ୍ତରଙ୍ଗ ବଜାର ରେ ବିଭିନ୍ନ କମ୍ପାନୀ ନାମରେ ନକଲି ମହୁ ବ୍ୟାପକ ମାତ୍ରାରେ ବିକ୍ରି ହେଉଛି। ଏହାକୁ ନେଇ ସ୍ଥାନୀୟ ଖାଉଟି ଅସନ୍ତୋଷ ପ୍ରକାଶ କରିଛନ୍ତି। ତେଣୁ ସରକାର ମହୁ ଚାଷୀଙ୍କୁ ପ୍ରୋତ୍ସାହିତ କରିବା ଦିଗରେ ପଦକ୍ଷେପ ନେବା ପାଇଁ ଦାବୀ କରିଛନ୍ତି।