ସ୍ୱାସ୍ଥ୍ୟ ସେବାରେ ଚରମ ଅବହେଳା: ରୋଗୀ ହନ୍ତସନ୍ତ 

ବେତନଟୀ ( ଉଦିତ କୁମାର ପରିଡା ) :  କେନ୍ଦ୍ର ଓ ରାଜ୍ୟ ସରକାର ପକ୍ଷରୁ ସ୍ୱାସ୍ଥ୍ୟ ସେବାରେ ଉନ୍ନତ ମାନର ଯନ୍ତ୍ରପାତି ଓ ସୁବିଧା ଯୋଗାଇ ଦେବା ପାଇଁ ପ୍ରତିବର୍ଷ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରାଯାଉଥିବା ଦାବି କରାଯାଉଥିବା ବେଳେ, ବେତନଟୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ବ୍ଲଡ ପ୍ରେସର ମାପିବା ଯନ୍ତ୍ରର ଅଭାବ ରୋଗୀମାନଙ୍କୁ ନାହିଁ ନଥିବା ଅସୁବିଧାର ସମ୍ମୁଖୀନ ହେବାକୁ ବାଧ୍ୟ କରୁଛି। ଏହି ଅବହେଳା ଏବଂ ଅବ୍ୟବସ୍ଥା ସରକାରୀ ସ୍ୱାସ୍ଥ୍ୟ ସେବାର ପ୍ରକୃତ ଚିତ୍ର ପ୍ରତି ପ୍ରଶ୍ନବାଚୀ ସୃଷ୍ଟି କରୁଛି। କିଛି ଦିନ ପୂର୍ବେ, ୩୦/୦୭/୨୦୨୫ ତାରିଖରେ, ଭାଲିଆ ଗ୍ରାମର ୬୪ ବର୍ଷୀୟ ରମାକାନ୍ତ ମହାନ୍ତ ଏବଂ ଗତକାଲି ଏସ.ଏସ. ନହଣ୍ଡାସୋଳ ଗ୍ରାମର ୫୪ ବର୍ଷୀୟ ମଙ୍ଗଲ ମାଝୀ ଏହି ଗୁରୁତର ସମସ୍ୟା ସମ୍ପର୍କରେ ଅଭିଯୋଗ ଆଣିଛନ୍ତି। ରମାକାନ୍ତଙ୍କ ପୁଅ ସରୋଜ ମହାନ୍ତ ତାଙ୍କ ଅସୁସ୍ଥ ପିତାଙ୍କୁ ବେତନଟୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଇ ଆସିଥିଲେ। ସେଠାରେ ରୋଗୀଙ୍କର ଲମ୍ବା ଧାଡ଼ି ଦେଖି ସେ ଅପେକ୍ଷା କରିଥିଲେ। କିନ୍ତୁ ସେ ଦେଖିଥିଲେ ଯେ, କାର୍ଯ୍ୟରତ ଡାକ୍ତର ସମସ୍ତ ରୋଗୀଙ୍କୁ ବାହାରେ ଥିବା ଔଷଧ ଦୋକାନକୁ ଯାଇ ବ୍ଲଡ ପ୍ରେସର ମାପି ଆସିବାକୁ ପରାମର୍ଶ ଦେଉଛନ୍ତି। ରମାକାନ୍ତଙ୍କ ସିରିଏଲ ଆସିବା ପରେ ତାଙ୍କୁ ମଧ୍ୟ ଏହି ପରାମର୍ଶ ଦିଆଯାଇଥିଲା। ପଚାରିବାରୁ କାର୍ଯ୍ୟରତ ଡାକ୍ତର ଜଣକ କହିଥିଲେ, “ଆମ ଡାକ୍ତରଖାନାରେ ଥିବା ବ୍ଲଡ ପ୍ରେସର ମାପିବା ଯନ୍ତ୍ର ସବୁ ଖରାପ, ଭୁଲ ଦେଖାଉଛି। ତେଣୁ ବାହାରୁ ମାପି ଆସ, ନହେଲେ ଔଷଧ କାମ ଦେବ ନାହିଁ।” ଏହା କେବଳ ରୋଗୀଙ୍କ ଅସୁବିଧାରେ ସୀମିତ ନାହିଁ, ବରଂ ଏହା ସରକାରୀ ସ୍ୱାସ୍ଥ୍ୟ ସେବାରେ ଥିବା ଗମ୍ଭୀର ଅବହେଳା ଓ ଅସାଧୁତାକୁ ପ୍ରତିଫଳିତ କରୁଛି। ସରକାର ଉନ୍ନତ ସ୍ୱାସ୍ଥ୍ୟ ସେବା ଯୋଗାଇ ଦେଉଥିବା ଦାବି କରୁଥିବା ବେଳେ, ଏହି ଘଟଣା କିଛି ଅସାଧୁ କର୍ମଚାରୀ ଓ ଅଯୋଗ୍ୟ ଡାକ୍ତରଙ୍କ ସ୍ୱାର୍ଥପର ଓ ଖାମଖିଆଲି ମନୋଭାବକୁ ଉଜାଗର କରୁଛି। ଏହା ସମ୍ଭବତଃ ଔଷଧ ଦୋକାନୀ ଓ କିଛି ଡାକ୍ତରଙ୍କ ମଧ୍ୟରେ ଅସାଧୁ ସମ୍ପର୍କକୁ ଇଙ୍ଗିତ କରୁଛି, ଯାହା ଭାରତୀୟ ନ୍ୟାୟ ସଂହିତା ( ବି ଏନ ଏସ ) ଅନୁଯାୟୀ ଗୁରୁତର ଅପରାଧ ହେବା ସହ ଜନସାଧାରଣଙ୍କ ସ୍ୱାସ୍ଥ୍ୟ ଓ ଜୀବନକୁ ବିପଦରେ ପକାଇପାରେ। ଏହି ବିଷୟରେ ଡାକ୍ତରଖାନାର ମୁଖ୍ୟ ଚିକିତ୍ସା ଅଧିକାରୀ ସିପୁନ ପଣ୍ଡାଙ୍କୁ ଟେଲିଫୋନ ଯୋଗେ ପଚାରିବାରୁ ସେ କହିଛନ୍ତି, “ଆମ ଡାକ୍ତରଖାନାରେ ତିନୋଟି ବ୍ଲଡ ପ୍ରେସର ମାପିବା ଯନ୍ତ୍ର ଅଛି – ଦୁଇଟି ଡିଜିଟାଲ ଓ ଗୋଟିଏ ମର୍କୁରୀ। ଗୋଟିଏ ବହିର ବିଭାଗରେ, ଗୋଟିଏ ସ୍ପେଶାଲିଷ୍ଟଙ୍କ ପାଖରେ ଏବଂ ଗୋଟିଏ ମର୍କୁରୀ ଯନ୍ତ୍ର ଏମର୍ଜେନ୍ସି ପାଇଁ ରଖାଯାଇଛି।” ତେବେ, ଏହି ଦାବି ଓ ରୋଗୀଙ୍କ ଅଭିଯୋଗ ମଧ୍ୟରେ ଥିବା ଅସଙ୍ଗତି ଗମ୍ଭୀର ପ୍ରଶ୍ନ ଉଠାଉଛି। ଯଦି ଯନ୍ତ୍ର ଉପଲବ୍ଧ ଅଛି, ତେବେ ରୋଗୀଙ୍କୁ କାହିଁକି ବାହାରେ ମାପିବାକୁ କୁହାଯାଉଛି? ଏହା କୌଣସି ଅସାଧୁ ଉଦ୍ଦେଶ୍ୟ କିମ୍ବା ଅବ୍ୟବସ୍ଥାର ପରିଚାୟକ କି? ଏହି ଘଟଣା ଭାରତୀୟ ନ୍ୟାୟ ସଂହିତାର ଧାରା ୩୧୮ (ଅବହେଳା ଯୋଗୁଁ ଜୀବନ ବିପଦରେ ପକାଇବା) ଏବଂ ଧାରା ୪୨୦ (ପ୍ରତାରଣା) ଅନୁଯାୟୀ ଅପରାଧୀକ କାର୍ଯ୍ୟକଳାପ ହୋଇପାରେ। ଏହା ସରକାରୀ ସ୍ୱାସ୍ଥ୍ୟ ସେବାରେ ପାରଦର୍ଶିତା ଓ ଦାୟିତ୍ୱବୋଧର ଅଭାବକୁ ପ୍ରମାଣ କରୁଛି। ଏହା ସହିତ, ଏହା ସ୍ୱାସ୍ଥ୍ୟ ଅଧିକାରୀଙ୍କ ଦାୟିତ୍ୱ ହୀନତା ଏବଂ ସାଧାରଣ ନାଗରିକଙ୍କ ପ୍ରତି ଅବମାନନାକୁ ପ୍ରତିଫଳିତ କରୁଛି। ଜନସାଧାରଣ ଦାବି କରୁଛନ୍ତି ଯେ ସମ୍ପୃକ୍ତ ବିଭାଗୀୟ ଅଧିକାରୀ ଓ ସରକାରୀ ତଦନ୍ତ ସଂସ୍ଥାମାନେ ଏହି ଘଟଣାକୁ ତୁରନ୍ତ ତଦନ୍ତ କରି ବେତନଟୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଉପଲବ୍ଧ ବ୍ଲଡ ପ୍ରେସର ମାପିବା ଯନ୍ତ୍ରଗୁଡ଼ିକର ଅବସ୍ଥା ଓ କାର୍ଯ୍ୟକ୍ଷମତା ଯାଞ୍ଚ କରନ୍ତୁ। ରୋଗୀଙ୍କୁ ବାହାରେ ଔଷଧ ଦୋକାନକୁ ପଠାଇବା ପଛରେ କୌଣସି ଅସାଧୁ ଉଦ୍ଦେଶ୍ୟ ଅଛି କି ନାହିଁ, ତାହାର ତଦନ୍ତ କରାଯାଉ। ଡାକ୍ତରଖାନାରେ କାର୍ଯ୍ୟରତ ଡାକ୍ତର ଓ କର୍ମଚାରୀଙ୍କ ଦାୟିତ୍ୱ ଓ କାର୍ଯ୍ୟଶୈଳୀର ସମୀକ୍ଷା କରାଯାଉ। ସ୍ୱାସ୍ଥ୍ୟ କେନ୍ଦ୍ରରେ ଆବଶ୍ୟକୀୟ ଯନ୍ତ୍ରପାତିର ନିୟମିତ ରକ୍ଷଣାବେକ୍ଷଣ ଓ ଯାଞ୍ଚ ପାଇଁ ଏକ କଡ଼ା ନୀତି ପ୍ରଣୟନ କରାଯାଉ। ବେତନଟୀ ବ୍ଲକ କଂଗ୍ରେସ ସଭାପତି କୁଷଧର ବେହେରା ଏହି ଘଟଣା କେବଳ ବେତନଟୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ସୀମିତ ନୁହେଁ, ବରଂ ଏହା ରାଜ୍ୟର ଅନ୍ୟାନ୍ୟ ସ୍ୱାସ୍ଥ୍ୟ କେନ୍ଦ୍ରଗୁଡ଼ିକରେ ମଧ୍ୟ ସମାନ ଅବସ୍ଥାର ସମ୍ଭାବନାକୁ ଇଙ୍ଗିତ କରୁଛି। ସରକାରଙ୍କୁ ଏହି ବିଷୟରେ ତୁରନ୍ତ କଡ଼ା ପଦକ୍ଷେପ ଗ୍ରହଣ କରିବାକୁ ସେ ଦାବି କରିଛନ୍ତି, ଯାହା ଦ୍ୱାରା ସାଧାରଣ ନାଗରିକଙ୍କୁ ଗୁଣାତ୍ମକ ସ୍ୱାସ୍ଥ୍ୟ ସେବା ମିଳିପାରିବ ଏବଂ ସ୍ୱାସ୍ଥ୍ୟ ବ୍ୟବସ୍ଥାରେ ପାରଦର୍ଶିତା ଓ ଦାୟିତ୍ୱବୋଧ ସୁନିଶ୍ଚିତ ହେବ ବୋଲି ସେ ମତବ୍ୟକ୍ତ କରିଛନ୍ତି। ଠିକ୍ ସେହି ଭଳି ସମାଜସେବୀ ଶିଶିର ଦାସ କହିଛନ୍ତି ଏହି ଘଟଣା ସ୍ୱାସ୍ଥ୍ୟ ସେବାରେ ଅବହେଳା ଓ ଅସାଧୁତାର ଏକ ଜ୍ୱଳନ୍ତ ଉଦାହରଣ। ସମସ୍ତ ସ୍ତରରେ କଡ଼ା ତଦନ୍ତ ଓ ଦାୟିତ୍ୱ ନିର୍ଦ୍ଧାରଣ କରାଯାଇ ଦୋଷୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ। ତତସହିତ ବେତନଟୀ ଡାକ୍ତରଖାନାର କର୍ମଚାରୀଙ୍କ ଦ୍ୱାରା ଅନେକ ସମୟରେ ରୋଗୀମାନଙ୍କୁ ଦୁର୍ବ୍ୟବହାର କରାଯାଉଥିବା ଅନେକ ରୋଗୀ ପୂବରୁ ଅଭିଯୋଗ ଆଣିଥିବା ଦେଖାଯାଇଛି।