ଅନୁକୂଳ ପରିବେଶ ସତ୍ବେ ନାହିଁ ପ୍ରୋତ୍ସାହନ :ବନ୍ଦ ହେଲାଣି ଆଖୁଚାଷ

କାକଟପୁର /ଅସ୍ତରଙ୍ଗ(ଶୁଭାଶିଷ ଖଣ୍ଡୁଆଳ) :-ଉପକୂଳବର୍ତ୍ତୀ ପୁରୀ ଜିଲ୍ଲା ଅସ୍ତରଙ୍ଗ ଓ କାକଟପୁର ବ୍ଲକ ଏକଦା ଆଖୁଚାଷ ପାଈଁ ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲା। ବର୍ତମାନ ସମୟରେ ଏହି ଚାଷ ବୁଡିବାକୁ ବସିଛି। ଆଖୁ ଫସଲ ପାଈଁ ସ୍ଥାନୀୟ ଅଞ୍ଚଳ ପରିବେଶ ଅନୁକୂଳ ଥିବା ସତ୍ବେ ସରକାର ଙ୍କ ହେୟ ମନୋଭାବ ଯୋଗୁଁ ସାଧାରଣ ଚାଷୀ ଏହି ଚାଷରୁ ମୁହଁ ଫେରାଉଛନ୍ତି। ଅତୀତ ରେ ଅସ୍ତରଙ୍ଗ ଓ କାକଟପୁର ବ୍ଲକ ବହୁଳ ଭାବରେ ଆଖୁ ଚାଷ ହେଉଥିଲା। ବ୍ଲକର ମୁଖ୍ୟତଃ ଅସ୍ତରଙ୍ଗ ବ୍ଲକର ନଗର, ଆଳସାହି, ତାଳଦା, ସରିପୁର, ନୂଆଗଡ, ଶିଶୁଅ, ପାଟଳଦା, କାକଟପୁର ବ୍ଲକର କୁରୁଜଙ୍ଘ, ପାଟପୁର, ପାଟସୁନ୍ଦରପୁର, ଲତାହରଣ ଆଦି ଅଞ୍ଚଳର ସହ ସହ ହେକ୍ଟର ଜମିରେ ଏହି ଫସଲ ଚାଷ ହେଉଥିଲା। ଏଥିସହିତ ଏହାକୁ ଲକ୍ଷ୍ୟ କରି ପଡୋଶୀ ବ୍ଲକର ଅଞ୍ଚଳରେ ମଧ୍ୟ ଏହି ଚାଷ ଏକର ଏକର ଜମିରେ ହେଉଥିଲା। ସ୍ଥାନୀୟ ପରିବେଶ ଓ ଜଳବାୟୁ ଆଖୁଚାଷ ପାଈଁ ସମ୍ପୂର୍ଣ୍ଣ ଅନୁକୂଳ ହେଉଥିବା ହେତୁ ଅନେକ ଲୋକ ଏହାକୁ ଜୀବନ ଜୀବିକାର ମୁଖ୍ୟ ମାଧ୍ୟ୍ୟମ କରି ପରିବାର ପ୍ରତିପୋଷଣ କରୁଥିଲେ। ଏଠାରେ ଏତେ ପରିମାଣରେ ଆଖୁ ଉତ୍ପାଦନ ହେଉଥିଲା ଯେ ସିଧା ସଳଖ ଟ୍ରକ ଟ୍ରକ ଆଖୁ ବାହାରକୁ ଯାଉଥିଲା। ଏହା ସ୍ଥାନୀୟ ଅର୍ଥନୀତିକୁ ଅନେକାଂଶ ଭଲ ସ୍ଥିତିରେ ରଖିଥିଲା। ପରିଚାଳନା ଗତ ତ୍ରୁଟି ପାଈଁ କିଛିବର୍ଷ ହେବ ଆଖୁଚାଷ ବନ୍ଦ ହୋଇଯାଇଛି। ଆନ୍ଦ୍ରପ୍ରଦେଶ ଏକ ଘରୋଇ ସଂସ୍ଥା ଆସି ଅସ୍ତରଙ୍ଗ ଅଞ୍ଚଳରେ ଆଖୁଚାଷ ପାଈଁ ପ୍ରୋତ୍ସାହନ ଯୋଗାଇ ଦେଇଥିଲା। କୌଣସି କାରଣରୁ ଏହି ସଂସ୍ଥା ଅଧାରୁ ପଳାଇଯାଇଥିଲା। ଏହା ମଧ୍ୟ ଆଖୁ ଚାଷ ଓ ଚାଷୀଙ୍କ ପ୍ରଭାବିତ କରିଥିଲା। ଶହ ଶହ ଚାଷୀ ଆଖୁ ଚାଷ କରିଥିଲେ ମଧ୍ୟ ଉପଯୁକ୍ତ ବଜାର ଦର ନ ମିଳିବା ଏବଂ ବାହାରକୁ ଆଖୁ ରପ୍ତାନି କରି ଉଚିତ ମୂଲ୍ୟ ନ ପାଇବା କାରଣରୁ ଚାଷୀଙ୍କ ମନୋବଳ ଭାଙ୍ଗି ଯାଇଥିଲା। କୃଷି ଓ କୃଷକର ଉର୍ନ୍ନତି ଆଣିବା ପାଈଁ ସରକାର ବିଭିନ୍ନ ଆର୍ଥିକ ସହାୟତା ପ୍ରଦାନ କରୁଥିବା ବେଳେ ଅସ୍ତରଙ୍ଗ ବ୍ଲକ ଅଞ୍ଚଳର ଆଖୁଚାଷୀ ଏଥିରୁ ବଂଚିତ ହୋଇଛନ୍ତି। କୃଷି ବିଭାଗ ଆଖୁ ଚାଷ ପାଈଁ କେବେ ଆନ୍ତରିକତା ଦେଖାଉନଥିବା ବେଳେ କ୍ରମଶଃ ଏହି ଚାଷ ଅଞ୍ଚଳରୁ ଏକ ପ୍ରକାର ଲୋପ ପାଇବାକୁ ବସିଲାଣି। କ୍ଵଚିତ କେଉଁଠି ଅଳ୍ପ ପରିମାଣ ଚାଷ ହେଉଛି। ଦିନକୁ ଦିନ ଆଖିରୁ ପ୍ରସ୍ତୁତ ଗୁଡରୁ ଚାହିଦା ବଢୁଥିବା ବେଳେ ଆଖୁଚାଷ ପ୍ରତି ଚାଷୀଙ୍କୁ ଆକୃଷ୍ଟ କରିବା ପାଈଁ କୃଷି ବିଭାଗ ଆଖି ଦୃଶିଆ ପଦକ୍ଷେପ ନେବାର ଆବଶ୍ୟକତା ରହିଛି।