ଓଡ଼ିଆ ପକ୍ଷ ୨୦୨୫ର ଚତୁର୍ଥ ଦିବସ: ‘ଓଡ଼ିଆରେ ନାମ ଫଳକ ଅଭିଯାନ’ ନିମନ୍ତେ ସଚେତନତା ପଦଯାତ୍ରା
ବାଲେଶ୍ୱର (ୟୁଏନ୍ଏସ୍): ଓଡ଼ିଆ ଭାଷାର ମର୍ଯ୍ୟାଦା ଓ ସମ୍ମାନ ବୃଦ୍ଧି ପାଇଁ ସାରା ରାଜ୍ୟରେ ଓଡ଼ିଆ ପକ୍ଷ-୨୦୨୫ର ଚତୁର୍ଥ ଦିବସରେ ଓଡ଼ିଆରେ ନାମ ଫଳକ ଅଭିଯାନ ଆୟୋଜିତ ହୋଇଯାଇଛି । ଏହି ପରିପ୍ରେକ୍ଷୀରେ ଆଜି ଜିଲ୍ଲା ପ୍ରଶାସନ ଏବଂ ଜିଲ୍ଲା ଶ୍ରମ ବିଭାଗ ଆନୁକୂଲ୍ୟରେ ବାଲେଶ୍ୱର ପୌରପାଳିକା, ଜଳେଶ୍ୱର ପୌରପାଳିକା ଏବଂ ନୀଳଗିରି ବିଜ୍ଞାପିତ ଅଂଚଳରେ ସଚେତନତା ପଦଯାତ୍ରା ଅଭିଯାନର ଶୁଭାରମ୍ଭ ହୋଇଛି । ଜିଲ୍ଲାର ବିଭିନ୍ନ ଗୁରୁତ୍ବପୂର୍ଣ୍ଣ ବଜାରରେ ପଦଯାତ୍ରା ମାଧ୍ୟମରେ ଦୋକାନ ବଜାର, ଶିଳ୍ପ ଅନୁଷ୍ଠାନ, ଶିକ୍ଷାନୁଷ୍ଠାନ, ବାଣିଜ୍ୟିକ ପ୍ରତିଷ୍ଠାନ ଓ ଜିଲ୍ଲାରେ ପ୍ରତିଷ୍ଠିତ ହୋଇଥିବା ସମସ୍ତ ସଂସ୍ଥା ନିଜର ନାମଫଳକକୁ ଓଡ଼ିଆରେ ଲେଖିବା ପାଇଁ ପ୍ରଶାସନ ପକ୍ଷରୁ ସଂସ୍ଥାର ମାଲିକ, କର୍ତ୍ତୃପକ୍ଷ ତଥା ଜନସାଧାରଣଙ୍କୁ ଓଡ଼ିଆରେ ନାମଫଳକ ଲେଖିବା ପାଇଁ ଉତ୍ସାହିତ କରାଯାଇଛି । ଏଠାରେ ସୂଚନା ଥାଉ କି, ଉକ୍ତ ସଚେତନତା ପଦଯାତ୍ରାରେ ବାଲେଶ୍ୱର ପୌରପାଳିକାର ସର୍ବମୋଟ ୭୦ ଜଣ, ଜଳେଶ୍ୱର ପୌରପାଳିକାର ୬୩ ଜଣ ଏବଂ ନୀଳଗିରି ବିଜ୍ଞାପିତ ଅଂଚଳର ୬୫ ଜଣ ବୁଦ୍ଧିଜୀବୀ ଓ ଜନସାଧାରଣ ଯୋଗଦାନ କରିଥିଲେ I
