ସ୍ୱାସ୍ଥ୍ୟ ସେବା ପ୍ରହସନ: ବିନା ଡାକ୍ତର ଓ ବିନା ଫାର୍ମାସିଷ୍ଟରେ ଚାଲିଛି ଡାକ୍ତରଖାନା

ହାଟଡିହି (ଓ୍ବାଇଏନଏସ) : ସରକାର ଗ୍ରାମାଞ୍ଚଳରେ ସ୍ୱାସ୍ଥ୍ୟ ସେବା ଯୋଗାଇ ଦେବାକୁ କେତେ କଣ ଯୋଜନା କରୁଛନ୍ତି। ଗ୍ରାମାଞ୍ଚଳ ଡାକ୍ତରଖାନା ମାନଙ୍କରେ ରକ୍ତ, ମଳ, ମୂତ୍ର ପରୀକ୍ଷା କରିବା ସହିତ ରୋଗୀମାନେ ସହଜରେ ଚିକିତ୍ସା ସୁବିଧା ପାଇ ପାରିବେ ସେନେଇ ସବୁପ୍ରକାର ପଦକ୍ଷେପ ନେଇଛନ୍ତି। ସେଥିପାଇଁ ପର୍ଯ୍ୟାପ୍ତ ଘର ନିର୍ମାଣ ମଧ୍ୟ ହୋଇଛି।  ହେଲେ ଅନେକ ଡାକ୍ତରଖାନା ରେ ଡାକ୍ତର ଓ ଫାର୍ମାସିଷ୍ଟ ନଥିବାରୁ ରୋଗୀମାନେ ସ୍ୱାସ୍ଥ୍ୟ ସେବାରୁ ବଞ୍ଚିତ ହେଉଛନ୍ତି। ଯାହାର ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି କେନ୍ଦୁଝର ଜିଲ୍ଲା ଆନନ୍ଦପୁର ଉପଖଣ୍ଡ ଓରାଳି ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ଓ ସୁନ୍ଦରା ପାଳ ସ୍ୱାସ୍ଥ୍ୟ କେନ୍ଦ୍ରରେ। ଓରାଳି ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର ଉପରେ ଓରାଳି, ଖେତୁଆଳି, କରଞ୍ଜପଦି, ବଣିଆରୀ, ମୁଦୁଲିପଦା, ନନ୍ଦିପଦା, ଆଦି ଅନେକ ଗ୍ରାମର ଲୋକମାନେ ସ୍ୱାସ୍ଥ୍ୟସେବା ନିର୍ଭର କରିଥାନ୍ତି। କିନ୍ତୁ ଏହି ଡାକ୍ତରଖାନାରେ ଥିବା ଫାର୍ମାସିଷ୍ଟ ନିର୍ମଳ ସାହୁଙ୍କ ଅବସର ପରେ ଆଜକୁ ୬ମାସ ହେଲା ନୂତନ ଫାର୍ମାସିଷ୍ଟ ନିଯୁକ୍ତ ହୋଇ ନାହାନ୍ତି। ଏଠାରେ ଥିବା ଡାକ୍ତର ଉଚ୍ଚ ଶିକ୍ଷା ପାଇଁ ଛୁଟିରେ ଯାଇଥିବାରୁ ରୋଗୀ ଦେଖିବାକୁ କିମ୍ବା ଔଷଧ ଦେବାକୁ କେହି ନାହାନ୍ତି। ଫଳରେ ରୋଗୀମାନେ ଆସି ନିରାଶ ରେ ଫେରୁଛନ୍ତି। ଡାକ୍ତରଖାନା ଥାଇ ଯଦି ଡାକ୍ତର କି ଫାର୍ମାସିଷ୍ଟ ନରହିବେ ସେ ଡାକ୍ତରଖାନା ଥାଇ ଲାଭ ବା କଣ ବୋଲି ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ସେହିପରି ସୁନ୍ଦରାପାଳ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ସମାନ ଅବସ୍ଥା। ଏଠାରେ ନିୟୋଜିତ ଥିବା ଫାର୍ମାସିଷ୍ଟ ରାମ ଚନ୍ଦ୍ର ଜେନାଙ୍କ ଅବସର ପରେ ଫାର୍ମାସିଷ୍ଟ ପଦବୀ ଖାଲି ପଡିଛି। ଏଠାରେ ଥିବା ଡାକ୍ତର ଉଚ୍ଚ ଶିକ୍ଷା ପାଇଁ ଛୁଟିରେ ପଳାଇ ଥିବାରୁ ଏବେ ରୋଗୀ ସେବା ସମ୍ପୂର୍ଣ୍ଣ ଠପ ହୋଇଯାଇଛି। ଏହା ଏକ ଆଦିବାସୀ ବହୁଳ ଅଞ୍ଚଳ ହୋଇଥିବା ବେଳେ ପ୍ରତିଦିନ ଆଖପାଖ ଅଞ୍ଚଳର ରୋଗୀମାନେ ସ୍ୱାସ୍ଥ୍ୟ ସେବା ପାଇବା ପାଇଁ ଧାଇଁ ଆସିଥାନ୍ତି। ଏବେ ରୋଗୀମାନେ ଡାକ୍ତରଖାନା କୁ ଆସି ନିରାଶରେ ଫେରୁଛନ୍ତି। ଯାହାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ସେହିପରି ଟୁକୁଣା ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ଦୀର୍ଘଦିନ ହେଲା ଫାର୍ମାସିଷ୍ଟ ପଦବୀ ଖାଲି ପଡିଥିବାରୁ ରୋଗୀଙ୍କୁ ଔଷଧ ବଣ୍ଟନ କରିବାରେ ନାନା ସମସ୍ୟା ଉପୁଜୁଛି। ସେହିପରି ସୋସୋ ଡାକ୍ତରଖାନାରେ ବର୍ଷେ ହେଲା ଡାକ୍ତର ନଥିବାରୁ ରୋଗୀମାନେ ପଡୋଶୀ ଜିଲ୍ଲା ଆଗରପଡା କିମ୍ବା ଭଦ୍ରକ ଡାକ୍ତରଖାନାକୁ ଯିବାକୁ ବାଧ୍ୟ ହେଉଛନ୍ତି। ଖୋଦ ମୁଖ୍ୟମନ୍ତ୍ରୀଙ୍କ ଜିଲ୍ଲାରେ ଯଦି ସ୍ୱାସ୍ଥ୍ୟ ସେବାର ଏପରି ବିକଳ ଚିତ୍ର ଦେଖିବାକୁ ମିଳୁଛି ତେବେ ଅନ୍ୟ ଜିଲ୍ଲାର ଗ୍ରାମାଞ୍ଚଳ ମାନଙ୍କରେ କିପରି ସ୍ୱାସ୍ଥ୍ୟ ସେବା ମିଳୁଥିବ ତାହା ଏଥିରୁ ସ୍ପଷ୍ଟ ପ୍ରତୀୟମାନ ହେଉଛି। ସ୍ୱାସ୍ଥ୍ୟବିଭାଗ ଏଥିପ୍ରତି ଗୁରୁତ୍ୱ ଦେଇ ତୁରନ୍ତ ଡାକ୍ତର ଓ ଫାର୍ମାସିଷ୍ଟ ନିଯୁକ୍ତ କରିବାକୁ ଦାବି ହେଉଛି।